កម្ពុជានឹងប្រារព្ធពិធីបុណ្យឆ្លងឆ្នាំប្រពៃណីជាតិខ្មែរ ឆ្នាំឆ្លូវ ត្រីស័ក ពុទ្ធសករាជ ២៥៦៥ ចូលឆ្នាំខាល ចត្វាស័ក ពុទ្ធសករាជ ២៥៦៦ រយៈពេល ៣ថ្ងៃ ចាប់ផ្តើមពីថ្ងៃព្រហស្បតិ៍ ទី១៤ និងបញ្ចប់ទៅវិញនៅថ្ងៃសៅរ៍ ទី១៦ ចុងសប្តាហ៍នេះ បន្ទាប់ពីខកខានអស់រយៈពេល ២ឆ្នាំមកហើយដោយសារការឆ្លងរាលដាលជំងឺកូវីដ-១៩។
ព្រះរាជាណាចក្រកម្ពុជាបានប្រកាន់យកទំនៀមទម្លាប់ប្រពៃណីជាតិរបស់ខ្លួនក្នុងការប្រារព្ធពិធីបុណ្យចូលឆ្នាំរយៈពេល ៣ថ្ងៃ នៅថ្ងៃដំបូងគឺជាថ្ងៃមហាសង្ក្រាន្ត ថ្ងៃទី២ គឺជា ថ្ងៃវារៈវ័នបត និងថ្ងៃទី៣ គឺជា ថ្ងៃវារៈឡើងស័ក ហើយថ្ងៃចូលឆ្នាំប្រពៃណីជាតិខ្មែរនេះតែងតែប្រារព្ធឡើងនៅថ្ងៃទី១៣ ឬថ្ងៃទី១៤ ខែមេសា ត្រូវនឹងខែចេត្រ ជារៀងរាល់ឆ្នាំ។ ប៉ុន្តែបើថ្ងៃចូលឆ្នាំថ្មីជាន់លើថ្ងៃដូចគ្នានឹងឆ្នាំចាស់ នោះគេនឹងរំកិលមកថ្ងៃបន្ទាប់វិញ។ ជាក់ស្តែងកាលពីឆ្នាំចាស់ ឆ្នាំ២០២១ ថ្ងៃចូលឆ្នាំត្រូវបានកំណត់យកថ្ងៃពុធ ទី១៤ ខែមេសា ដូច្នេះឆ្នាំ២០២២ នេះ មិនត្រូវបានកំណត់យកថ្ងៃពុធ ទី១៤ ខែមេសា ទៀតនោះទេ គេត្រូវរំកិលមកថ្ងៃព្រហស្បតិ៍ ជំនួសវិញ។
ការប្រារព្ធពិធីបុណ្យចូលឆ្នាំសម្រាប់ប្រជាជនខ្មែរនេះ តែងធ្វើឡើងជារៀងរាល់ឆ្នាំនៅពាក់កណ្តាលខែមេសា ឬខែចេត្រ ដែលជាពិធីបុណ្យមួយក្នុងចំណោមពិធីបុណ្យប្រពៃណីជាច្រើនទៀតរបស់ពលរដ្ឋកម្ពុជា។
សង្ក្រាន្តឆ្នាំថ្មី ឆ្នាំខាល ចត្វាស័ក ពុទ្ធសករាជ ២៥៦៦ នឹងឈានចូលមកដល់នៅថ្ងៃព្រហស្បតិ៍ ១៣កើត ខែចេត្រ ត្រូវនឹងថ្ងៃទី១៤ ខែមេសា ឆ្នាំ២០២២ វេលាម៉ោង ១០.០០នាទីព្រឹកតាមកាលកំណត់។
ទេវតាឆ្នាំថ្មីឆ្នាំខាល ព្រះនាម កិរិណីទេវី តំណាងឲ្យថ្ងៃព្រហស្បតិ៍ ដែលជាបុត្រីទី៥ ក្នុងចំណោមបុត្រីទាំង៧ នៃកបិលមហាព្រហ្ម ដែលគង់នៅឋានចាតុមហារាជិការ នឹងយាងចុះមកថែរក្សាភពផែនដីនេះបន្តពីទេវតាឆ្នាំចាស់។
ព្រះនាង កិរិណីទេវី ទ្រង់អម្ពរដោយពណ៌បៃតង សៀតផ្កាចំប៉ីនៅត្រង់ព្រះការណ៍ ឬត្រចៀក ដែលមានគ្រឿងប្រដាប់ដោយត្បូងមរកត ក្នុងនោះព្រះហស្ដស្តាំកាន់កង្វេរដំរី ព្រះហស្ដឆ្វេងកាន់រន្ទះ គង់លើខ្នងសត្វដំរីជាយានជំនិះ ហើយទ្រង់សោយសណ្ដែក ល្ង ជាព្រះក្រយា។
ជុំវិញការប្រារព្ធពិធីបុណ្យចូលឆ្នាំនេះ ពលរដ្ឋខ្មែរតែងតែរៀបចំពិធីនៅតាមគេហដ្ឋានរៀងៗខ្លួន ដើម្បីទទួលទេវតាឆ្នាំថ្មី មុននឹងពិធីចូលឆ្នាំខ្មែរចាប់ផ្តើមដោយការបូជាគ្រឿងសក្ការៈជាច្រើន ដូចជាបាយសី ស្លាធម៌ ធូប ទៀន ទឹកអប់ ផ្កាភ្ញី និងផ្លែឈើជាច្រើនមុខផងដែរ។
រយៈពេល ៣ថ្ងៃនៃការប្រារព្ធពិធីបុណ្យចូលឆ្នាំខ្មែរនេះ នឹងប្រព្រឹត្តទៅនៅថ្ងៃទី១ គឺមហាសង្ក្រាន្ត ពលរដ្ឋខ្មែរតែងយកចង្ហាន់ទៅប្រគេនព្រះសង្ឃនៅតាមវត្តអារាម ចំណែកថ្ងៃទី២ គឺជាថ្ងៃវារៈវ័នបត ប្រជាពលរដ្ឋខ្មែរតែងជូនសម្លៀកបំពាក់ និងគ្រឿងបរិក្ខារផ្សេងៗដល់អ្នកមានគុណ ដូចជាឪពុកម្តាយ ជីដូនជីតា ជាដើម និងនិមន្តព្រះសង្ឃបង្សុកូលដើម្បីបញ្ជូនមគ្គផលដល់វិញ្ញាណក្ខន្ធបុព្វការីជនដែលបានស្លាប់ទៅ ជាដើម។
ដោយឡែកនៅថ្ងៃទី៣ គឺជាថ្ងៃវារៈឡើងស័ក គេតែស្រង់ទឹកដល់ព្រះពុទ្ធបដិមា និងព្រះសង្ឃ ដើម្បីសុំខមាទោសនៅថ្ងៃចុងក្រោយនៃពិធីបុណ្យចូលឆ្នាំប្រពៃណីជាតិរបស់ខ្លួន។
ជុំវិញការប្រារព្ធពិធីបុណ្យចូលឆ្នាំខ្មែរនេះ ពលករខ្មែរដែលកំពុងបម្រើការនៅប្រទេសថៃ បាននាំគ្នាសម្រុកមកស្រុកកំណើតវិញតាមច្រកជាច្រើនកន្លែង ដូចជាច្រកដូង ច្រកព្រុំ ច្រកអូរអន្លក់ និងច្រកឡែម ជាដើម ដើម្បីចូលរួមពិធីបុណ្យចូលឆ្នាំថ្មីនៅស្រុកកំណើតរបស់ខ្លួន។
ទិន្នន័យសង្គមស៊ីវិលបង្ហាញថា រយៈពេលត្រឹមតែ ៧ថ្ងៃប៉ុណ្ណោះ ដោយរាប់ចាប់តាំងពីថ្ងៃទី១ ដល់ទី៧ ខែមេសា ឆ្នាំ២០២២ នេះ ពលករខ្មែរបាននាំគ្នាវិលត្រឡប់ពីប្រទេសថៃ មកកម្ពុជាវិញសរុបជាង ៥ពាន់នាក់ហើយ ក្នុងនោះពលករខ្មែរដែលអាជ្ញាធរថៃ ចាប់បញ្ជូនមកវិញមានចំនួនជាង ៣ពាន់នាក់ផងដែរ។
ចំណែកកម្មករមួយចំនួនដែលធ្វើការនៅក្នុងប្រទេស បានស្នើឲ្យរដ្ឋាភិបាលចាត់វិធានការយ៉ាងណាកុំឱ្យមានការដំឡើងថ្លៃរថយន្តឈ្នួលតាមចិត្តនាអំឡុងពេលបុណ្យចូលឆ្នាំថ្មីប្រពៃណីជាតិខាងមុខនេះ ដើម្បីជួយសម្រួលដល់ពួកគេអាចធ្វើដំណើរទៅជួបជុំគ្រួសារ៕