ក្រសួងការបរទេសអាមេរិក រកឃើញថា សមាជិកនៃកងកម្លាំងរបស់រដ្ឋាភិបាលកម្ពុជាមួយចំនួន បានជាប់ពាក់ព័ន្ធនឹងអំពើរំលោភសិទ្ធិមនុស្សធ្ងន់ធ្ងរ ដែលជំរុញឱ្យអំពើនិទ្ទណ្ឌភាពនៅតែបន្តកើតមានឡើងនៅកម្ពុជា។
នៅក្នុងរបាយការណ៍ប្រចាំឆ្នាំរបស់ក្រសួងការបរទេសអាមេរិក ស្ដីពី «ការគោរពសិទ្ធិមនុស្សនៅកម្ពុជាឆ្នាំ២០២១» ដែលមានកម្រាស់ជាង ៤០ទំព័រចេញផ្សាយនៅថ្ងៃទី១២ ខែមេសា ឱ្យដឹងថា ករណីរំលោភបំពានសិទ្ធិមនុស្សនៅកម្ពុជា មានដូចជាការធ្វើទារុណកម្មដោយអំពើឃោរឃៅ ការចាប់ឃុំឃាំងមនុស្សតាមអំពើចិត្ត និងការប្រឆាំងអ្នកទោសនយោបាយ ជាដើម។
ក្រៅពីបញ្ហានេះ ក៏មានការតាមដានការប្រាស្រ័យទាក់ទងគ្នាតាមប្រព័ន្ធអេឡិចត្រូនិកក្នុងជីវិតឯកជនរបស់ពលរដ្ឋតាមទំនើងចិត្ត និងការរឹតត្បិតយ៉ាងធ្ងន់ធ្ងរទៅលើសេរីភាពបញ្ចេញមតិ សេរីភាពសារព័ត៌មាន និងសេរីភាពនៅលើអ៊ីនធឺណិត រួមទាំងការប្រព្រឹត្តអំពើហិង្សា និងការគំរាមកំហែង ចាប់ខ្លួន ឬកាត់ទោសអ្នកសារព័ត៌មានដោយអយុត្តិធម៌។
ចំណែកសេរីភាពនៃការជួបប្រជុំដោយសន្តិវិធី និងសេរីភាពក្នុងការបង្កើតសមាគមវិញ ក៏នៅតែមានការរឹតត្បិតខ្លាំង ដោយការធ្វើទុក្ខបុកម្នេញលើអង្គការសិទ្ធិមនុស្សជាតិ និងអន្តរជាតិ។
ជាមួយគ្នានេះ ក្រសួងការបរទេសអាមេរិក ក៏បានរកឃើញដែរថា រដ្ឋាភិបាលកម្ពុជាបច្ចុប្បន្នកំពុងកាត់បន្ថយសិទ្ធិរបស់ពលរដ្ឋក្នុងការផ្លាស់ប្ដូររដ្ឋាភិបាលដោយសន្តិវិធីតាមរយៈការបោះឆ្នោតដោយសេរី និងយុត្តិធម៌។ ខណៈអំពើពុករលួយនៅក្នុងប្រព័ន្ធតុលាការក៏កំពុងរីករាលដាល ដោយសារតែរដ្ឋាភិបាលខ្វះការស៊ើបអង្កេត និងដាក់ទោសទណ្ឌចំពោះអំពើហិង្សាលើស្ត្រី ការជួញដូរមនុស្ស និងទម្រង់នៃពលកម្មកុមារ ជាដើម។
របាយការណ៍ប្រចាំឆ្នាំដដែលបន្តថា អំពើរំលោភបំពានសិទ្ធិមនុស្សទាំងអស់នេះបានធ្វើឡើងដោយមន្ត្រី ឬកងកម្លាំងមានសមត្ថកិច្ចមួយចំនួនដែលជាអ្នករក្សាសន្តិសុខ ក្នុងនោះមាននគរបាលជាតិ កងយោធពលខេមរភូមិន្ទ និងអាជ្ញាធរស៊ីវិល ដែលជាក្រុមប្រដាប់អាវុធរបស់គណបក្សកាន់អំណាចដែលដឹកនាំដោយលោក ហ៊ុន សែន។ ករណីនេះ បានជំរុញឱ្យវប្បធម៌និទ្ទណ្ឌភាពបន្តរីករាលដាល ដោយសារតែមន្ត្រីរដ្ឋាភិបាលមានទាំងកម្លាំងនគរបាលផង បានរំលោភសិទ្ធិមនុស្ស និងប្រព្រឹត្តអំពើពុករលួយ។
ក្រសួងការបរទេសអាមេរិកដដែលបន្តទៀតថា ទោះបីជាមន្ត្រីរដ្ឋាភិបាលទាំងនោះបានរំលោភសិទ្ធិមនុស្សធ្ងន់ធ្ងរក្ដី ប៉ុន្តែពួកគេមិនត្រូវចាត់វិធានការច្បាប់នោះទេ ដោយសារមន្ត្រីរដ្ឋាភិបាល និងសមាជិកគ្រួសាររបស់ពួកគេមានអភ័យឯកសិទ្ធិ ដែលធ្វើឱ្យពួកគេរួចផុតពីការដាក់ទោសទណ្ឌតាមច្បាប់ផងដែរ។
របាយការណ៍បានលើកឡើងពីករណីរបស់តុលាការខេត្តបាត់ដំបង កាលពីឆ្នាំ២០២០ បានកាត់ទោសទៅលើមន្ត្រីកងរាជអាវុធហត្ថ ២នាក់ឈ្មោះ សរ ប៊ុនសឿង និងឈ្មោះ ឆយ រតនា ឱ្យជាប់ពន្ធនាគារម្នាក់ ៤ឆ្នាំ និងម្នាក់ ៧ឆ្នាំ ក្រោយពីពួកគេបានធ្វើទារុណកម្មលើជនជាប់ឃុំឈ្មោះ ទុយ ស្រស់ រហូតដល់ស្លាប់បាត់បង់ជីវិត ខណៈទោសរបស់ពួកគេអាចជាប់ពន្ធនាគាររហូតដល់ ១០ ទៅ ២០ឆ្នាំ ប៉ុន្តែសំណុំរឿងនេះបានបាត់ដំណឹងឈឹងនៅខែធ្នូ ឆ្នាំ២០២១ បន្ទាប់ពីសាច់ញាតិបានប្តឹងឧទ្ធរណ៍។
អ្នកនាំពាក្យគណៈកម្មាធិការសិទ្ធិមនុស្សរដ្ឋាភិបាល លោក កត្តា អ៊ន បានប្រាប់សារព័ត៌មានក្នុងស្រុកដោយច្រានចោលចំពោះការចោទប្រកាន់នេះ។ លោកថា របាយការណ៍របស់ក្រសួងការបរទេសអាមេរិក មិនឆ្លុះបញ្ចាំងពីការពិតនៅកម្ពុជានោះទេ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានថ្លែងប្រាប់កាសែត The Cambodia Daily ថា លោកតែងតែសង្កេតឃើញថា រដ្ឋាភិបាលកម្ពុជាតែងតែច្រានចោលរាល់របាយការណ៍ដែលឆ្លុះបញ្ចាំងអំពីការពិត។ លោកថា តាមពិតរដ្ឋាភិបាលគួរតែទទួលស្គាល់របាយការណ៍នោះ ហើយយកមកដោះស្រាយតាមការរកឃើញរបស់គេ ដើម្បីធ្វើឱ្យស្ថានភាពការគោរពសិទ្ធិមនុស្សនៅកម្ពុជាបានល្អប្រសើរ និងជៀសវាងការដាក់សម្ពាធណាមួយពីសំណាក់រដ្ឋាភិបាលអាមេរិក៕