ឯកអគ្គរាជទូតអូស្ត្រាលីប្រចាំនៅកម្ពុជា ស្នើឲ្យរដ្ឋមន្ត្រីក្រសួងយុត្តិធម៌ ធានាអំពីសិទ្ធិចូលរួមក្នុងការបោះឆ្នោតដោយសេរីរបស់បក្សប្រឆាំង និងសង្គមស៊ីវិល ដើម្បីធានាបាននូវលទ្ធផលពិតប្រាកដ។
ការលើកឡើងរបស់ឯកអគ្គរាជទូតអូស្ត្រាលីប្រចាំនៅកម្ពុជា លោក ប៉ាប្លូ កង់ (Pablo Kang) បានធ្វើឡើងក្នុងជំនួបជាមួយរដ្ឋមន្ត្រីក្រសួងយុតិ្តធម៌ លោក កើត រិទ្ធ នៅថ្ងៃសុក្រ ទី២២ មេសា។
ស្ថានទូតអូស្ត្រាលី បានសរសេរលើគណនីហ្វេសប៊ុករបស់ខ្លួនថា ក្នុងកិច្ចសន្ទនាជាមួយរដ្ឋមន្ត្រីក្រសួងយុត្តិធម៌ លោក កើត រិទ្ធ គឺលោក កង់ (Kang) បានពិភាក្សាអំពីកិច្ចសហប្រតិបត្តិការដ៏យូរអង្វែងរបស់អូស្ត្រាលីលើការអនុវត្តច្បាប់ និងបញ្ហាយុត្តិធម៌ រួមទាំងសន្តិសុខតាមព្រំដែន ក៏ដូចជាការបោះឆ្នោតឃុំ-សង្កាត់នាពេលខាងមុខ និងសេចក្តីព្រាងច្បាប់ផ្សេងៗ។
ក្នុងជំនួបនោះ លោក ប៉ាប្លូ កង់ (Pablo Kang) ក៏បានលើកទឹកចិត្តឱ្យអាជ្ញាធរកម្ពុជាធានាឱ្យគណបក្សប្រឆាំង និងក្រុមសង្គមស៊ីវិលអាចចូលរួមក្នុងការបោះឆ្នោតដោយសេរី ដើម្បីធានាបាននូវលទ្ធផលពិតប្រាកដ។
កាលពីថ្ងៃទី៧ ខែមករា ឆ្នាំ២០២២ ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស អ្នកស្រី មីឆែល ប៉ាហ្សេលែត ក៏បានជំរុញទៅអាជ្ញាធរកម្ពុជាឱ្យការពារសិទ្ធិសេរីភាពមូលដ្ឋាន ដោយថាសិទ្ធិនេះមានសារសំខាន់ណាស់ ខណៈកម្ពុជាឈានឆ្ពោះទៅកាន់ការបោះឆ្នោតឃុំ-សង្កាត់ខាងមុខ នៅគ្រាដែលគណបក្សជំទាស់ធំជាងគេរបស់ប្រទេសនេះពុំត្រូវបានអនុញ្ញាតឱ្យចូលរួមប្រកួតប្រជែង។
ទន្ទឹមគ្នានេះដែរ អ្នកស្រីថា ថ្នាក់ដឹកនាំ និងអ្នកគាំទ្រជាច្រើនរបស់គណបក្សជំទាស់ត្រូវរស់នៅនិរទេសខ្លួននៅក្រៅស្រុក ជាប់ឃុំ និងប្រឈមនឹងការធ្វើទុក្ខបុកម្នេញ ដោយសារសកម្មភាពស្របច្បាប់របស់ខ្លួនស្របតាមច្បាប់អន្តរជាតិ។
ការលើកឡើងរបស់ឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្ស និងឯកអគ្គរាជទូតអូស្ត្រាលីប្រចាំនៅប្រទេសកម្ពុជា លោក ប៉ាប្លូ កង់ ធ្វើឡើងស្របពេលដែលកម្ពុជានឹងរៀបចំការបោះឆ្នោតឃុំ-សង្កាត់អាណត្តិទី៥ នៅថ្ងៃអាទិត្យ ទី៥ ខែមិថុនា ឆ្នាំ២០២២ ខណៈការបោះឆ្នោតថ្នាក់ជាតិ ឆ្នាំ២០២៣ ខាងមុខនេះ ត្រូវគេរិះគន់ថាជាសមាសភាពដែលរៀបចំឡើងដោយបក្សកាន់អំណាច៕