ថ្លែងចេញតាមរយៈលិខិតដែលផ្ញើចេញពីពន្ធនាគារក្នុងប្រទេសរុស្ស៊ី អតីតអ្នកឧកញ៉ា ហេង សិទ្ធី និងជានាយកគ្រប់គ្រងក្រុមហ៊ុន Maritime Group ស្នើឲ្យនាយករដ្ឋមន្ត្រីកម្ពុជា លោក ហ៊ុន ម៉ាណែត មេត្តាពិនិត្យមើលឡើងវិញនូវទង្វើខុសច្បាប់មួយចំនួនរបស់មន្ត្រីក្រសួងមហាផ្ទៃ និងរដ្ឋមន្ត្រីក្រសួងយុត្តិធម៌ ពីព្រោះលោកពុំបានប្រព្រឹត្តទោសកំហុសដូចអ្វីដែលក្រសួងទាំងពីរនេះបានប្រឌិតនោះឡើយ។
បើតាមលិខិតរបស់លោក ហេង សិទ្ធី បានសរសេរថា ក្នុងសំណុំរឿងរបស់លោក គឺលោកបានបកអាក្រាតមន្ត្រីទាំងពីរក្រសួងនោះ ដែលបានប្រព្រឹត្តអំពើពុករលួយ និងជាប់ពាក់ព័ន្ធក្នុងឧក្រិដ្ឋកម្មតាមអ៊ីនធឺណិត។
លោក ហេង សិទ្ធី បានសរសេររៀបរាប់ថា លោកគ្មានអ្វីនឹងខ្លាចទៅស្រុកខ្មែរនោះទេ បើទោះបីគ្មានប៉ូលិសអន្តរជាតិ Interpol ក៏លោកនៅតែទៅស្រុកខ្មែរដែរ ព្រោះជាប្រទេសរបស់លោក។ លោកស្នើសុំឲ្យលោក ហ៊ុន ម៉ាណែត ពិនិត្យមើលឡើងវិញនូវទង្វើខុសច្បាប់មួយចំនួនរបស់មន្ត្រីក្រសួងមហាផ្ទៃ និងរដ្ឋមន្ត្រីក្រសួងយុត្តិធម៌។
លោក ហេង សិទ្ធី អះអាងថា វាជាសំណាងមួយដែរដែលពេលនេះអាជ្ញាធររុស្ស៊ី ធ្វើតាមច្បាប់ និងការពារអាយុជីវិតរបស់លោកពីគម្រោងធ្វើឃាតនានា ហើយលោកក៏សូមបញ្ជាក់ប្រាប់បងប្អូនប្រជាពលរដ្ឋខ្មែរថា ការដកលិខិតឆ្លងដែនរបស់លោក ជាទង្វើខុសច្បាប់រដ្ឋធម្មនុញ្ញកម្ពុជា មាត្រា៣៣ និងខុសច្បាប់អន្តរជាតិស្ដីពីការការពារ ប្រឆាំង និងការដកហូតសញ្ជាតិតាមអំពើចិត្តមាត្រា១៧។
កតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយ (ICCPR) មាត្រា១២ ធានានូវសេរីភាពក្នុងការធ្វើចលនា។
លោកអះអាងថា ការប្រឌិតរឿងដើម្បីដាក់លោកចូល Interpol គឺជាអំពើខុសច្បាប់។
លោក ហេង សិទ្ធី បានចោទលោក ស សុខា រដ្ឋមន្ត្រីក្រសួងមហាផ្ទៃ លោក កើត រិទ្ធ រដ្ឋមន្ត្រីក្រសួងយុត្តិធម៌ ពីបទ «ពុករលួយ និងជាប់ពាក់ព័ន្ធក្នុងឧក្រិដ្ឋកម្មតាមអ៊ីនធឺណិត»។ លោកអះអាងថា លោក ស សុខា តែងតែទទួលសំណូកពីឧក្រិដ្ឋជនក្នុងពេលបង្ក្រាបល្បែងស៊ីសងខុសច្បាប់ និងទទួលសំណូកពីឧក្រិដ្ឋជនផ្តល់កម្ចីអនឡាញខុសច្បាប់ រួមទាំងចេញមុខការពារក្រុមឧក្រិដ្ឋជនខុសច្បាប់ផ្សេងទៀតដែលកំពុងប្រព្រឹត្តនៅក្នុងប្រទេសកម្ពុជាផងដែរ។
លោកបន្តថា លោក ស សុខា ក៏បានគាបសង្កត់អគ្គនាយកដ្ឋានក្រោមបង្គាប់ទាំងអស់ ឱ្យរកលុយឱ្យខ្លួនរាល់ពេលបំពេញភារកិច្ចថែមទៀត។
លោក ហេង សិទ្ធី ក៏បានបង្ហោះពាក្យបណ្ដឹងចុះថ្ងៃទី៣ ខែមករា ឆ្នាំ២០២៤ របស់ខ្លួន ដោយទាមទារឱ្យលោក កើត រិទ្ធ រដ្ឋមន្ត្រីក្រសួងយុត្តិធម៌ បើកការស៊ើបអង្កេតលើលោក ហ៊ុន តូ ផងដែរ។
អតីតអ្នកឧកញ៉ារូបនេះ ក៏បានចោទប្រកាន់មន្ត្រីជាន់ខ្ពស់មួយចំនួនទៀតផងដែរ ពីបទ ពុករលួយ និងជាប់ពាក់ព័ន្ធក្នុងឧក្រិដ្ឋកម្មតាមអ៊ីនធឺណិត។ លោកបានចោទថា លោក គួច ចំរើន ដែលបច្ចុប្បន្នជាអភិបាលខេត្តកណ្តាល មានលុយរាប់រយលានដុល្លារជារូបិយប័ណ្ណគ្រីបតូ ក្នុងពេលកាន់តំណែងជាអភិបាលខេត្តព្រះសីហនុ (២០១៩-២០២៤)។ លើសពីនេះ លោកបានចោទប្រកាន់អ្នកឧកញ៉ា ហ៊ុន តូ ដែលជាក្មួយប្រុសរបស់លោក ហ៊ុន សែន ថាបានលួចលុយចំនួន ៩លានដុល្លារពីអ្នកវិនិយោគចិន ដើម្បីសុំការអនុម័តគម្រោងជីករ៉ែ។
បន្ថែមលើនេះ លោក ហេង សិទ្ធី ក៏បានដាក់ពាក្យបណ្ដឹងទៅកាន់អង្គភាពប្រឆាំងអំពើពុករលួយ ក្រសួងមហាផ្ទៃ និងខុទ្ទកាល័យលោក ហ៊ុន ម៉ាណែត ដើម្បីឱ្យស៊ើបអង្កេតលើមន្ត្រីពាក់ព័ន្ធ ប៉ុន្តែគ្មានការស៊ើបអង្កេតនោះទេ៕
© 2025, ឌឹ ខេមបូឌា ដេលី. All rights reserved.