សហជីពទ្រទ្រង់សិទ្ធិការងារឲ្យបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (NAGA World) បានអំពាវនាវស្វែងរកជំនួយពីសាធារណជន សប្បុរសជនជាតិ និងអន្តរជាតិ ព្រមទាំងស្ថាប័នសប្បុរសធម៌នានា ឲ្យជួយចូលរួមឧបត្ថម្ភជាស្បៀងអាហារ ឬថវិកា និងសម្ភារៈផ្សេងៗដល់ក្រុមកូដករដែលកំពុងប្រឈមនឹងការខ្វះខាតសព្វថ្ងៃនេះ។
សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ បានចេញសេចក្តីប្រកាសស្វែងរកជំនួយសប្បុរសធម៌កាលពីថ្ងៃទី២៧ ខែមេសា ឆ្នាំ២០២២ ថា ដើម្បីការពារសេរីភាពសហជីព សិទ្ធិការងារ និងយុត្តិធម៌សង្គម កម្មករនិយោជិតទាំងអស់ដែលភាគច្រើនជាស្ត្រី សុខចិត្តប្រឈមនឹងជីវភាពរស់នៅដែលលំបាកគ្មានប្រាក់ចំណូល ខណៈការចំណាយលើជីវភាពប្រចាំថ្ងៃនៅជាបន្ទុកធ្ងន់ធ្ងរដដែល។
ប្រភពដដែលអះអាងថា ទោះបីជាមានការដោះលែងថ្នាក់ដឹកនាំ និងសកម្មជនសហជីពឱ្យនៅក្រៅឃុំជាបណ្ដោះអាសន្នកាលពីពេលកន្លងទៅក្តី ប៉ុន្តែក្រុមហ៊ុនណាហ្គាវើលដ៍មិនមានចេតនាដោះស្រាយបញ្ហាដែលខ្លួនបានបង្កឡើងជាមួយបុគ្គលិកនោះឡើយ ហើយតែងតែបដិសេធរាល់សំណើរបស់កម្មករនិយោជិតគ្រប់លក្ខខណ្ឌទាំងអស់ ដែលជាហេតុធ្វើឲ្យកម្មករនិយោជិតទាំងនេះបាត់បង់ប្រាក់ចំណូលរហូតដល់សព្វថ្ងៃនេះ។
សហជីពទ្រទ្រង់សិទ្ធិការងារនេះ បញ្ជាក់ថា កម្មករនិយោជិតដែលជាសមាជិកសហជីពទ្រទ្រង់សិទ្ធិការងារបុគ្គលិកកម្មករខ្មែរ ដែលភាគច្រើនជាស្ត្រី បានតស៊ូមតិដើម្បីសិទ្ធិសេរីភាពសហជីព និងសិទ្ធិការងាររបស់ខ្លួនអស់រយៈពេលជាច្រើនខែមកហើយ ក្នុងនោះក៏មានការចាប់ឃុំខ្លួនពីសំណាក់អាជ្ញាធរកម្ពុជាថែមទៀត ប៉ុន្តែពួកគាត់នៅតែមិនអាចទទួលបាននូវដំណោះស្រាយសមរម្យណាមួយពីក្រុមហ៊ុនណាហ្គាវើលដ៍នេះឡើយ។
ការប្រកាសស្វែងរកជំនួយសប្បុរសធម៌នេះ ធ្វើឡើងបន្ទាប់ពីកម្មករនិយោជិតនៃក្រុមហ៊ុនណាហ្គាវើលដ៍ កំពុងជួបបញ្ហាសេដ្ឋកិច្ចក្នុងគ្រួសារធ្ងន់ធ្ងរ ស្របពេលដែលក្រុមហ៊ុនណាហ្គាវើលដ៍នៅតែមិនផ្តល់ដំណោះស្រាយសមរម្យណាមួយដល់ពួកគេ។
កាលពីថ្ងៃទី១៨ ខែធ្នូ ឆ្នាំ២០២១ បុគ្គលិកក្រុមហ៊ុនបនល្បែងណាហ្គាវើលដ៍ (Naga World) ជាង ១ពាន់នាក់ បានប្រមូលផ្តុំគ្នាធ្វើកូដកម្មដោយសន្តិវិធីនៅសួនច្បារខាងមុខអគារក្រុមហ៊ុន ដើម្បីទាមទារឲ្យថៅកែក្រុមហ៊ុនទទួលយកថ្នាក់ដឹកនាំសហជីព និងបុគ្គលិក ៣៦៥នាក់ ដែលក្រុមហ៊ុនបានបញ្ឈប់ពីការងារកន្លងមកឱ្យចូលធ្វើការវិញ។
យ៉ាងណាក៏ដោយ ក្រោយកម្មករនិយោជិតទាំងនោះប្រមូលផ្ដុំគ្នាតវ៉ាជាមួយក្រុមហ៊ុន ស្ថាប័នមានសមត្ថកិច្ច ដូចជាតុលាការ ក្រសួងការងារ ព្រមទាំងអាជ្ញាធរ ជាដើម គឺពួកគេបានរងចោទប្រកាន់ថាជាការធ្វើបាតុកម្មដោយខុសច្បាប់ ក្នុងនោះអាជ្ញាធរបានប្រើហិង្សាបង្ក្រាប ដោយការចាប់ឃុំខ្លួនកម្មករ និងថ្នាក់ដឹកនាំសហជីព ដោយចោទប្រកាន់ពីបទញុះញង់ឲ្យមានផែនការធ្វើបដិវត្តន៍ពណ៌ជាដើម។
គិតត្រឹមថ្ងៃទី២៨ ខែមេសា ឆ្នាំ២០២២ នេះ មានរយៈពេលជាង ៤ខែហើយ ដែលកម្មករនិយោជិតនៃក្រុមហ៊ុនណាហ្គាវើលដ៍ បានទាមទារឲ្យក្រុមហ៊ុនផ្តល់ដំណោះស្រាយជូនពួកគេចំពោះបុគ្គលិកដែលក្រុមហ៊ុនបានបញ្ឈប់ផ្ទុយពីច្បាប់ការងារកន្លងមក ប៉ុន្តែក្រុមហ៊ុននៅតែបដិសេធចរចាជាមួយក្រុមកូដករទាំងនោះរហូត។
ជុំវិញបញ្ហានេះ អង្គការសមាគមដែលធ្វើការលើវិស័យសិទ្ធិមនុស្ស ដូចជាមជ្ឈមណ្ឌលសិទ្ធិមនុស្សកម្ពុជា (CCHR) សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា (អាដហុក) និងមជ្ឈមណ្ឌលសាមគ្គីភាព ព្រមទាំងអង្គការសង់ត្រាល់ ជាដើម បានចេញផ្សាយរបាយការណ៍រួមគ្នានៅថ្ងៃទី២៨ ខែមេសា ឆ្នាំ២០២២ ស្ដីពីការឃ្លាំមើលសេរីភាពមូលដ្ឋាននៅកម្ពុជា ថារដ្ឋាភិបាលកម្ពុជាកំពុងប្រើប្រាស់ច្បាប់មួយចំនួនដែលខ្លួនបានតាក់តែងឡើង ដើម្បីកាត់បន្ថយលំហសេរីភាពពលរដ្ឋ និងរឹតត្បិតការអនុវត្តសេរីភាពមូលដ្ឋាន ជាជាងការការពារសិទ្ធិពលរដ្ឋដូចដែលមានចែងក្នុងរដ្ឋធម្មនុញ្ញ។
អង្គការសង្គមស៊ីវិលទាំងនោះបញ្ជាក់ថា ការវិវឌ្ឍសំខាន់ៗមួយចំនួននៃការរឹតត្បិតសេរីភាពពីសំណាក់រដ្ឋាភិបាលកម្ពុជាសព្វថ្ងៃនេះ រួមមានការតាក់តែងឯកសារគតិយុត្តិថ្មីៗដែលអាចប៉ះពាល់ដល់លទ្ធភាពរបស់ពលរដ្ឋក្នុងការអនុវត្តសេរីភាពមូលដ្ឋានរបស់ខ្លួន ការព្យាយាមជាច្រើនរបស់រដ្ឋាភិបាលក្នុងការជ្រៀតជ្រែកដោយបំពានជាញឹកញាប់ទៅលើការជួបប្រជុំជាសាធារណៈ និងការបង្កើនការរឹតត្បិតទៅលើការបញ្ចេញមតិតាមប្រព័ន្ធអនឡាញ ជាដើម៕