មេដឹកនាំប្រទេសអូស្ត្រាលី ឥណ្ឌា ជប៉ុន និងសហរដ្ឋអាមេរិក បានជួបប្រជុំគ្នាកាលពីថ្ងៃអង្គារនៅក្នុងទីក្រុងតូក្យូ ប្រទេសជប៉ុន ដោយបានសន្យាធ្វើឱ្យប្រសើរឡើងនូវតំបន់ឥណ្ឌូ-ប៉ាស៊ីហ្វិក បើកចំហ និងសេរីភាព តែសង្គ្រាមរុស្ស៊ីលើកទ័ពឈ្លានពានអ៊ុយក្រែន ត្រូវចាត់ទុកថាជាវិបត្តិពិភពលោក។ នេះបើតាមទីភ្នាក់ងារសារព័ត៌មាន AFP ដែលបានចុះផ្សាយនៅថ្ងៃទី២៥ ឧសភា។
ថ្លែងនៅឯជំនួបកំពូលរបស់សម្ពន្ធមិត្តដែលហៅថាក្រុមប្រទេសចតុភាគី ឬ Quad នោះ ប្រធានាធិបតីសហរដ្ឋអាមេរិក លោក ចូ បៃដិន (Joe Biden) មានប្រសាសន៍ថា ការឈ្លានពានរបស់រុស្ស៊ី ទៅលើប្រទេសអ៊ុយក្រែន គឺជាបញ្ហាលើសពីបញ្ហាអឺរ៉ុបទៅទៀត ហើយធ្លាក់ជាបញ្ហារបស់ពិភពលោកទាំងមូល។
លោកប្រធានាធិបតីមានប្រសាសន៍ទៀតថា គោលការណ៍នៃបូរណភាពទឹកដី និងអធិបតេយ្យភាព ច្បាប់អន្តរជាតិ សិទ្ធិមនុស្ស ត្រូវតែការពារដោយមិនគិតថានៅទីកន្លែងណាដែលត្រូវគេរំលោភនៅក្នុងពិភពលោក។
ជាមួយគ្នានេះ នាយករដ្ឋមន្ត្រីជប៉ុន លោក Fumio Kishida ក៏បានលើកឡើងអំពីជម្លោះនៅអ៊ុយក្រែន ផងដែរ។ លោកបានថ្លែងថា គេមិនអាចអនុញ្ញាតឱ្យបញ្ហាដដែលនេះកើតឡើងនៅក្នុងតំបន់ឥណ្ឌូ-ប៉ាស៊ីហ្វិកឡើយ។ លោក Fumio Kishida មិនបាននិយាយចំពោះប្រទេសណានោះទេ តែនៅចុងក្រោយនេះ ទាំងរុស្ស៊ី និងចិន តែងតែបញ្ជូននាវាចម្បាំងរបស់ពួកគេមកធ្វើសមយុទ្ធនៅសមុទ្រប៉ាស៊ីហ្វិកខាងលិចនៅក្បែរដែនកោះប្រទេសជប៉ុន។
ជាក់ស្ដែង កាលពីថ្ងៃទី២៤ ឧសភា យ៉ាងតិចយន្តហោះទម្លាក់គ្រាប់បែករបស់ចិន និងរុស្ស៊ី ចំនួន ៤គ្រឿង បានធ្វើសមយុទ្ធនៅលំហអាកាសអន្តរជាតិជាប់នឹងដែនអាកាសប្រទេសជប៉ុន ដែលបង្ខំឲ្យជប៉ុនបញ្ចេញយន្តហោះចម្បាំងជាច្រើនគ្រឿងហោះឃ្លាំមើលយន្តហោះទាំងនោះ។
សមយុទ្ធយន្តហោះទម្លាក់គ្រាប់បែករបស់ចិន និងរុស្ស៊ី ធ្វើឡើងចំពេលក្រុមមេដឹកនាំចតុភាគី អាមេរិក ឥណ្ឌា ជប៉ុន និងអូស្ត្រាលី កំពុងជួបប្រជុំគ្នានៅលើទឹកដីប្រទេសជប៉ុន ដែលមានរបៀបវារៈអំពីស្ថានការណ៍សឹកនៅអ៊ុយក្រែន បញ្ហាកូរ៉េខាងជើងបាញ់មីស៊ីលបង្កសង្គ្រាមនៅលើឧបទ្វីប និងឥទ្ធិពលរបស់ចិន នៅក្នុងតំបន់។
មេដឹកនាំនៃក្រុមចតុភាគី Quad បានថ្កោលទោសការឈ្លានពានរបស់រុស្ស៊ីលើប្រទេសអ៊ុយក្រែន ដោយបានសម្រេចដាក់ទណ្ឌកម្មសេដ្ឋកិច្ចលើរបបក្រុងមូស្គូ។
តែបែបនេះក្ដី ចំពោះប្រទេសឥណ្ឌាដែលមិនបានសម្រេចចូលរួមដាក់ទណ្ឌកម្មលើប្រទេសរុស្ស៊ី នាយករដ្ឋមន្ត្រីឥណ្ឌា លោក Narendra Modi មិនបានបង្ហាញពីការប្ដេជ្ញាចិត្តថានឹងត្រូវចូលរួមជាមួយសហគមន៍អន្តរជាតិយ៉ាងណានោះទេ តែលោកចង់ឃើញសង្គ្រាមនៅលើទឹកដីអ៊ុយក្រែន ត្រូវរកពេលវេលាដើម្បីបិទបញ្ចប់។ លោក Narendra Modi កាលពីពេលថ្មីៗនេះបានសម្ដែងការសោកស្ដាយចំពោះភាពខ្លោចផ្សាដោយសារតែសង្គ្រាម ដែលនាំឱ្យឥណ្ឌាសម្រេចបញ្ជូនស្បៀងទៅជួយជនភៀសខ្លួនអ៊ុយក្រែន។
ដោយឡែកនាយករដ្ឋមន្ត្រីជាប់ឆ្នោតថ្មីរបស់អូស្ត្រាលី លោក Anthony Albanese ក៏បានចូលរួមថ្កោលទោសរុស្ស៊ីឈ្លានពានអ៊ុយក្រែនផងដែរ។
លោកប្រធានាធិបតី បៃដិន បានទៅដល់ប្រទេសជប៉ុន ដែលជាផ្នែកមួយនៃដំណើរទស្សនកិច្ចលើកដំបូងរបស់លោកទៅកាន់តំបន់អាស៊ីក្នុងឋានៈជាប្រធានាធិបតីអាមេរិក បន្ទាប់ពីលោកធ្វើដំណើរទៅកាន់ប្រទេសកូរ៉េខាងត្បូង ដោយបានជួបនឹងលោក Yoon Suk-yeol ប្រធានាធិបតីកូរ៉េខាងត្បូង ហើយជំនួបនេះធ្វើឡើងនៅទីក្រុងសេអ៊ូល កាលពីថ្ងៃសុក្រ សប្ដាហ៍កន្លងមកនេះ។
ចំពោះបញ្ហាសង្គ្រាមនៅលើទឹកដីអ៊ុយក្រែន ប្រទេសចំនួន២០ បានស្នើផ្តល់កញ្ចប់ជំនួយសន្តិសុខថ្មីដល់ប្រទេសមួយនេះ ដើម្បីប្រយុទ្ធប្រឆាំងនឹងការឈ្លានពានពីសំណាក់ប្រទេសរុស្ស៊ី។
នៅក្នុងកិច្ចប្រជុំមួយជាមួយសម្ពន្ធមិត្តកាលពីថ្ងៃចន្ទ ទី២៣ ខែឧសភា រដ្ឋមន្ត្រីការពារជាតិអាមេរិក Lloyd Austin និយាយថា ថ្ងៃនេះលោកបានជួបជាមួយសមភាគីអ៊ុយក្រែន លោក Oleksiy Reznikov ដោយលោកបានដឹងអំពីតម្រូវការអាទិភាពរបស់អ៊ុយក្រែន និងស្ថានភាពជាក់ស្តែងនៅក្នុងសមរភូមិនៅលើទឹកដីអ៊ុយក្រែន។ លោកបានបន្តថា ប្រទេសជាច្រើនបានសន្យាផ្តល់គ្រាប់កាំភ្លើងធំ មីស៊ីលប្រឆាំងនាវា រថក្រោះ និងរថពាសដែក និងអាវុធផ្សេងៗទៀត។ លោកអះអាងប្រាប់ទៅលោករដ្ឋមន្ត្រីការពារជាតិអ៊ុយក្រែនថា មានប្រទេសផ្សេងៗមួយចំនួនទៀតក៏បានស្នើផ្តល់ការហ្វឹកហ្វឺនដល់កងទ័ពអ៊ុយក្រែនផងដែរ។ បើតាមលោក Austin ប្រទេសដាណឺម៉ាក បានសន្យាផ្តល់ប្រព័ន្ធមីស៊ីលប្រឆាំងនាវា ហើយសាធារណរដ្ឋឆែក បានស្នើផ្តល់ឧទ្ធម្ភាគចក្រប្រយុទ្ធរថក្រោះ និងប្រព័ន្ធការពារគ្រាប់មីស៊ីល។
លោក Austin ឱ្យដឹងទៀតថា ចាប់តាំងពីកិច្ចប្រជុំលើកទីមួយរបស់ក្រុមរដ្ឋមន្ត្រីការពារជាតិ ៤០ប្រទេស កាលពីខែមេសា នៅឯមូលដ្ឋានកងទ័ពអាមេរិកក្នុងប្រទេសអាល្លឺម៉ង់ មានការជួយឧបត្ថម្ភ និងការដឹកជញ្ជូនបរិក្ខារយោធាទៅកាន់ប្រទេសអ៊ុយក្រែន។ លោកថា ប្រទេសអ៊ីស្រាអែល ក៏ជួយបរិក្ខារយោធាផងដែរ។
ដោយឡែករដ្ឋមន្ត្រីការពារជាតិអ៊ុយក្រែន លោក Oleksiy Reznikov បានថ្លែងប្រាប់ក្រុមប្រទេសនៅក្នុងកិច្ចប្រជុំនេះ ដោយលើកឡើងថា ស្ថានភាពសង្គ្រាមនៅពេលនេះនៅក្នុងប្រទេសរបស់លោកមានរយៈពេល ៣ខែមកហើយ។ លោក Reznikov បានឱ្យដឹងថា ភាគីជម្លោះទាំងពីរកំពុងបន្តប្រយុទ្ធគ្នាយ៉ាងខ្លាំងនៅសមរភូមិនៅភាគខាងកើត និងខាងត្បូងអ៊ុយក្រែន។
នៅខណៈនេះដែរ រដ្ឋមន្ត្រីការបរទេសសហរដ្ឋអាមេរិក លោក Antony Blinken បាននិយាយជាមួយនឹងសមភាគីអ៊ុយក្រែន លោក Dmytro Kuleba។ ប្រមុខការទូតពីរប្រទេសនេះបានពិភាក្សាអំពីកិច្ចប្រឹងប្រែងការទូតជាបន្តទៀត ដើម្បីដោះស្រាយផលវិបាកនៃសង្គ្រាមរបស់រុស្ស៊ីវាយលើអ៊ុយក្រែន។
បើតាមអ្នកនាំពាក្យក្រសួងការបរទេសអាមេរិក លោក Ned Price បានបញ្ជាក់នៅក្នុងសេចក្ដីថ្លែងការណ៍ថា លោក Blinken បានកត់សម្គាល់ថា វិបត្តិសន្តិសុខស្បៀងអាហារនៅលើពិភពលោកដែលបណ្ដាលមកពីសង្គ្រាមដ៏ឃោរឃៅរបស់ប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) តម្រូវឱ្យមានការឆ្លើយតបរួមគ្នា ហើយថារបបលោក ពូទីន ត្រូវតែទទួលខុសត្រូវរឿងនេះចំពោះមុខច្បាប់អន្តរជាតិ៕