29 C
Phnom Penh

បក្ស​ភ្លើង​ទៀន​ថា​ខ្លួន​មិន​ជាប់​ពាក់ព័ន្ធ​នឹង​ថ្នាក់​ដឹកនាំ​ណា​មួយ​នៃ​បក្ស​សង្គ្រោះ​ជាតិ​ទេ

ដោយ ឌឹ ខេមបូឌា ដេលី

បទវិភាគ

គណបក្ស​ភ្លើង​ទៀន អះអាង​ថា ខ្លួន​មិន​បាន​ជាប់​ពាក់ព័ន្ធ ឬ​មាន​ទំនាក់ទំនង​ជាមួយ​ថ្នាក់​ដឹកនាំ​នៃ​គណបក្ស​សង្គ្រោះ​ជាតិ​នៅ​ក្រៅ​ប្រទេស​នោះ​ទេ ខណៈ​បក្ស​នេះ​នៅតែ​រង​ការ​សង្ស័យ​ថា អតីត​មេដឹកនាំ​បក្ស​ប្រឆាំង លោក សម រង្ស៊ី និង​មន្ត្រី​ជាន់ខ្ពស់​ជាច្រើន​ទៀត​នៅ​ពី​ក្រោយ​ខ្នង។

គណបក្ស​ភ្លើង​ទៀន បាន​ចេញ​សេចក្តី​ថ្លែងការណ៍​របស់​ខ្លួន​កាលពី​ថ្ងៃទី​២៨ ខែ​ឧសភា ឆ្នាំ​២០២២ ថា កាលពី​ពេល​ថ្មីៗ​នេះ​មាន​ការ​ផ្សព្វផ្សាយ​នូវ​សកម្មភាព​ឃោសនា​របស់​ខ្លួន​ពី​សំណាក់​ថ្នាក់​ដឹកនាំ​មួយ​ចំនួន​នៃ​គណបក្ស​សង្គ្រោះ​ជាតិ​នៅ​ក្រៅ​ប្រទេស ដែល​នាំ​ឱ្យ​មាន​ការ​ភ័ន្តច្រឡំ​ពី​សំណាក់​មតិ​សាធារណជន​ថា ពួកគេ​កំពុង​នៅ​ពីក្រោយ​នៃ​សកម្មភាព​របស់​គណបក្ស​ភ្លើង​ទៀន។

ប្រភព​ដដែល​អះអាង​ថា កន្លងមក​ខ្លួន​បាន​ណែនាំ​ដល់​ថ្នាក់​ដឹកនាំ​របស់​ខ្លួន​ក្នុង​ពេល​ឃោសនា​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​អាណត្តិ​ទី​៥ នេះ ឱ្យ​អនុវត្ត​ឱ្យ​បាន​ខ្ជាប់​នូវ​សកម្មភាព​ឃោសនា​បោះឆ្នោត​ស្រប​តាម​ច្បាប់​ស្ដីពី​ការ​បោះឆ្នោត បទបញ្ជា និង​នីតិវិធី​នៃ​ការ​ឃោសនា​បោះឆ្នោត រួម​ទាំង​សេចក្តី​ណែនាំ​ផ្សេងៗ​ចែង​ដោយ​គណៈកម្មាធិការ​ជាតិ​រៀបចំ​ការ​បោះឆ្នោត​ឱ្យ​បាន​ត្រឹមត្រូវ​ជាទីបំផុត។

ការ​អះអាង​នេះ ធ្វើឡើង​បន្ទាប់ពី​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​ភាគី​លោក សម រង្ស៊ី បាន​បង្ហាញ​ពី​ការ​គាំទ្រ​របស់​ពួកគេ​ចំពោះ​សកម្មភាព​ឃោសនា​បោះឆ្នោត​របស់​គណបក្ស​ភ្លើង​ទៀន​ជាបន្តបន្ទាប់​ក្នុង​រយៈពេល​ចុងក្រោយ​នេះ។

អ្នក​នាំពាក្យ​គណបក្ស​ប្រជាជន​កម្ពុជា លោក សុខ ឥសាន មាន​ប្រសាសន៍​ថា ការ​ចេញ​សេចក្តី​ថ្លែងការណ៍​របស់​គណបក្ស​ភ្លើង​ទៀន គឺ​គ្រាន់តែ​ជា​លេស​ដោះសា និង​ដើម្បី​ការពារ​ខ្លួន​តែប៉ុណ្ណោះ។ លោក​ថា ដើម្បី​វាយតម្លៃ​ថា​គណបក្ស​ភ្លើង​ទៀន​មាន​ទំនាក់ទំនង និង​ជាប់​ពាក់ព័ន្ធ​ជាមួយ​ថ្នាក់​ដឹកនាំ​គណបក្ស​សង្គ្រោះ​ជាតិ ឬ​មិន​ជាប់​ពាក់ព័ន្ធ ទុក​ឱ្យ​សមត្ថកិច្ច និង​ស្ថាប័ន​អនុវត្ត​ច្បាប់​សិក្សា​ស្រាវជ្រាវ​លើ​អង្គហេតុ​ជាក់ស្តែង​វិញ។

អនុប្រធាន​គណបក្ស​សង្គ្រោះ​ជាតិ លោក អេង ឆៃអ៊ាង បាន​បង្ហោះ​វីដេអូ​សកម្មភាព​របស់​គណបក្ស​ភ្លើង​ទៀន​កាលពី​ថ្ងៃទី​១៨ ខែ​ឧសភា ឆ្នាំ​២០២២ និង​សកម្មភាព​នានា​ជាបន្តបន្ទាប់​មក​ទៀត ក្នុង​នោះ​ក៏​មាន​សកម្មភាព​ឃោសនា​របស់​គណបក្ស​នេះ​កាលពី​ពេល​ថ្មីៗ​នេះ​ផង​ដែរ ខណៈ​អ្នកស្រី មូរ សុខហួរ ដែល​ជា​អនុប្រធាន​គណបក្ស​សង្គ្រោះ​ជាតិ​ដែរ​នោះ ក៏​បាន​បង្ហោះ​សកម្មភាព​ឃោសនា​របស់​គណបក្ស​ភ្លើង​ទៀន​ថែម​ទៀត​អំឡុង​ពេល​នៃ​ការ​ឃោសនា​បោះឆ្នោត​នេះ។

ដោយឡែក​អតីត​មេដឹកនាំ​បក្ស​ប្រឆាំង លោក សម រង្ស៊ី ក៏​ធ្លាប់​បាន​ធ្វើ​សកម្មភាព​នយោបាយ​ដែល​គេ​មើល​ឃើញ​ថា​ជា​ចេតនា​បង្ហាញ​ពី​ការ​ជួយ​ផ្សព្វផ្សាយ​សកម្មភាព​គណបក្ស​ភ្លើង​ទៀន​ជា​ហូរហែ​ផង​ដែរ។ រាល់​ពេល​មាន​ពិធី​ជួបជុំ​សកម្មជន​របស់​ខ្លួន ដោយ​មាន​ការ​អុជ​ទៀន​ជា​សញ្ញា ដោយ​ពោល​នូវ​ពាក្យ​ថា «គំនិត​ខ្ញុំ​កើត​កំណើត​ខ្ញុំ​មាន អុជ​ភ្លើង​ទៀន​ដើម្បី​សង្គ្រោះ​ជាតិ»

ក្រៅពី​នេះ​ទៀត កាលពី​ថ្ងៃទី​១ ខែ​មេសា ឆ្នាំ​២០២២ អតីត​មេដឹកនាំ​បក្ស​ប្រឆាំង​រូប​នេះ​ធ្លាប់​បាន​បញ្ជាក់​ថា ក្រោយពី​គណបក្ស​សង្គ្រោះ​ជាតិ​ត្រូវ​បាន​គេ​រំលាយ​ដោយ​អត្តនោម័តិ​ក្នុង​ឆ្នាំ​២០១៧ មាន​គណបក្ស​មួយ​ទៀត​មាន​អាយុកាល​យូរ​មក​ហើយ គឺ​គណបក្ស​ភ្លើង​ទៀន​ដែល​បាន​រក្សា​ព្រលឹង​គណបក្ស​សង្គ្រោះ​ជាតិ​ទៅ​ថ្ងៃ​អនាគត។

មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មាជ សុវណ្ណារ៉ា បាន​ប្រាប់​សារព័ត៌មាន The Cambodia Daily នៅ​ថ្ងៃទី​៣០ ឧសភា ថា ការ​ប្រកាស​ពី​ជំហរ​របស់​គណបក្ស​ភ្លើង​ទៀន ជា​រឿង​ត្រឹមត្រូវ​តាម​ផ្លូវ​ច្បាប់ ប៉ុន្តែ​ខ្លឹមសារ​ពិត​នៃ​សកម្មភាព​របស់​គណបក្ស​ភ្លើង​ទៀន នៅតែ​មិន​អាច​កុហក​ប្រជាពលរដ្ឋ​ខ្មែរ​បាន ព្រោះ​ថា​សកម្មភាព​របស់​គណបក្ស​នេះ​តាំងពី​ចាប់ផ្តើម​សម្រេច​ចូលរួម​ការ​បោះឆ្នោត​រហូត​មក​ដល់​ពេលនេះ បាន​បង្ហាញ​យ៉ាង​ច្បាស់​ពី​ការ​ជ្រោមជ្រែង​របស់​មន្ត្រី​បក្ស​ប្រឆាំង​ភាគី​លោក សម រង្ស៊ី នៅ​ពីក្រោយ។

លោក​អះអាង​ថា តាមរយៈ​សកម្មភាព​មន្ត្រី​បក្ស​ប្រឆាំង​ភាគី​លោក សម រង្ស៊ី នា​ពេល​កន្លងមក នៅ​ពេល​ដែល​គណបក្ស​ភ្លើង​ទៀន​សម្រេច​ចូលរួម​ការ​បោះឆ្នោត បាន​បង្ហាញ​នូវ​សកម្មភាព​នៃ​ការ​ជួយ​រុញ​ច្រាន​គណបក្ស​នេះ​ដោយ​ប្រយោល តាមរយៈ​នៃ​ការ​អុជ​ទៀន​តាម​កម្មវិធី​ជួបជុំ​អ្នក​គាំទ្រ​របស់​ពួកគេ និង​ការ​អំពាវនាវ​ឱ្យ​ប្រជាពលរដ្ឋ​ចូលរួម​ការ​បោះឆ្នោត​ឱ្យ​គណបក្ស​ភ្លើង​ទៀន ជាដើម។

មន្ត្រី​ជាន់ខ្ពស់​បក្ស​ប្រឆាំង​រូប​នេះ​បញ្ជាក់​ថា អ្វី​ដែល​អន្តរជាតិ និង​ពលរដ្ឋ​ខ្មែរ​ត្រូវការ​នៅ​ពេលនេះ គឺ​គណបក្ស​ប្រឆាំង​មួយ​ដែល​មាន​សក្ដានុពល​តាម​ផ្លូវ​ច្បាប់ និង​ជា​គណបក្ស​ដែល​ជា​តំណាង​ឆន្ទៈ​របស់​ប្រជាពលរដ្ឋ​ខ្មែរ​ជិត​កន្លះ​ប្រទេស​ដែល​ត្រូវ​គេ​រំលាយ និង​បើក​ឱកាស​ឱ្យ​ប្រធាន​បក្ស​ប្រឆាំង​ដ៏​ធំ​មួយ​នេះ គឺ​លោក កឹម សុខា អាច​ចូល​ប្រឡូក​ក្នុង​ទីលាន​នយោបាយ​នៅ​កម្ពុជា​ឡើងវិញ។

កាលពី​ឆ្នាំ​២០១២ គណបក្ស សម រង្ស៊ី និង​គណបក្ស​សិទ្ធិមនុស្ស បាន​រួម​បញ្ចូល​គ្នា​បង្កើត​ទៅ​ជា​គណបក្ស​សង្គ្រោះ​ជាតិ ប៉ុន្តែ​ក្រោយ​គណបក្ស​សង្គ្រោះ​ជាតិ ត្រូវ​បាន​រំលាយ​កាលពី​ឆ្នាំ​២០១៧ គណបក្ស សម រង្ស៊ី បាន​ប្តូរ​ឈ្មោះ​របស់​ខ្លួន​ទៅ​ជា​គណបក្ស​ភ្លើង​ទៀន​វិញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស