ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ និងអតីតប្រធានសហព័ន្ធសហជីពសេរីកម្មករកម្ពុជា លោក ជា មុនី បានបដិសេធចំពោះការចោទប្រកាន់ថា ពួកលោកពាក់ព័ន្ធនឹងលោក សម រង្ស៊ី ក្នុងការរៀបចំផែនការប្រមូលមនុស្ស ៣ម៉ឺននាក់ និង PassApp ឱ្យបានជាងមួយពាន់គ្រឿង ដើម្បីអុកឡុកការបោះឆ្នោតនៅប្រទេសកម្ពុជា ។ PassApp ជាឈ្មោះក្រុមរថយន្តឈ្នួលតាក់ស៊ីមានទីតាំងក្នុងរាជធានីភ្នំពេញ។
ការបដិសេធពីលោក វន់ ពៅ ធ្វើឡើងបន្ទាប់ពីហ្វេសប៊ុកឈ្មោះ Jasmine Angkor បានបង្ហោះសារថា លោក សម រង្ស៊ី កំពុងប្រមូលកម្លាំងពីខេត្តឱ្យឡើងមករាជធានីភ្នំពេញឲ្យបានយ៉ាងតិច ៣ម៉ឺននាក់ អុកឡុកបំផ្លាញការបោះឆ្នោតក្រុមប្រឹក្សាឃុំ-សង្កាត់។ ហ្វេសប៊ុកឈ្មោះ Jasmine Angkor ថាអ្នកដែលប្រមូលកម្លាំង គឺលោក ជា មុនី ប្រមូលកម្មករ និងលោក វន់ ពៅ ប្រមូល PassApp។
បើតាមហ្វេសប៊ុកឈ្មោះ Jasmine Angkor ដដែលថា បច្ចុប្បន្នសមត្ថកិច្ចមិនទាន់ដឹងរឿងនេះទេ ប៉ុន្តែសមត្ថកិច្ចត្រូវទប់ស្កាត់ឲ្យខាងតែបាន។ ការបង្ហោះសាររបស់ឈ្មោះ Jasmine Angkor ដោយភ្ជាប់នឹងរូបលោក ប៊ុត ធារី ហៅ សុគន្ធ ធារី ដែលជាមនុស្សជំនិតលោក សម រង្ស៊ី បានចេញពីប្រទេសកម្ពុជាទៅប្រទេសបារាំង វិញ។
ការបង្ហោះសារឈ្មោះ Jasmine Angkor បានធ្វើឡើងស្របពេលដែលអតីតប្រធានសហព័ន្ធសហជីពសេរីកម្មករកម្ពុជា លោក ជា មុនី ត្រូវជាប្អូនប្រុសរបស់លោក ជា វិជ្ជា មេដឹកនាំសហជីពដ៏ល្បីល្បាញ បានប្រកាសចូលរួមជីវភាពនយោបាយជាមួយគណបក្សភ្លើងទៀន នៅថ្ងៃទី៣០ ខែឧសភា ឆ្នាំ២០២២។
អតីតប្រធានសហព័ន្ធសហជីពសេរីកម្មករកម្ពុជា លោក ជា មុនី បានបញ្ជាក់ប្រាប់សារព័ត៌មានក្នុងស្រុកថា លោកពុំមានមនុស្សទាក់ទងឱ្យរកប្រមូលមនុស្សប្រមូលផ្ដុំជាមួយលោក វន់ ពៅ នោះទេ។ លោកបដិសេធចំពោះការចោទប្រកាន់គ្មានមូលដ្ឋានមួយនេះ។
ទោះជាយ៉ាងណាក៏ដោយ សម្រាប់ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ បានបដិសេធចំពោះការបង្ហោះសាររបស់ឈ្មោះ Jasmine Angkor និងចាត់ទុកការបង្ហោះព័ត៌មាននេះថាជាព័ត៌មានក្លែងក្លាយ ប្រឌិត និងបំផ្លើស ដើម្បីចោទប្រកាន់លើរូបលោក។ លោកសរសេរលើហ្វេសប៊ុកដោយស្នើសមត្ថកិច្ចជួយស្រាវជ្រាវស្វែងរកម្ចាស់គណនីបណ្ដាញសង្គម (Account Facebook) នេះមកបំភ្លឺ ដើម្បីផ្តល់យុត្តិធម៌ដល់រូបលោកផង៕