អ្នកឃ្លាំមើលសង្គម លោក វ៉ន ចាន់ឡូត ចាត់ទុកការធ្វើវិសោធនកម្មច្បាប់ស្តីអំពីការដកសញ្ជាតិខ្មែរពីកំណើត បង្ហាញឱ្យឃើញពីទំហំនៃការបែកបាក់ជាតិខ្មែរកាន់តែខ្លាំង និងកាន់តែពិបាករកចំណុចផ្សះផ្សា។
លោក វ៉ន ចាន់ឡូត សរសេរលើគណនីហ្វេសប៊ុករបស់ខ្លួននៅថ្ងៃទី១ កញ្ញា ថា រាជរដ្ឋាភិបាលខ្មែរចេះអត់ធ្មត់ចំពោះសត្រូវដែលឈ្លានពានទឹកដីរបស់ខ្លួន និងសត្រូវដែលបានសម្លាប់ពលរដ្ឋ និងកម្លាំងការពារជាតិខ្មែរ ចុះហេតុអ្វីរដ្ឋាភិបាលមិនអាចអត់ធ្មត់ចំពោះខ្មែរដូចគ្នា ដើម្បីស្វែងរកការចរចាបង្រួបបង្រួមជាតិ។ ត្រង់ចំណុចនេះ លោក ខឹម វាសនា ប្រធានគណបក្សសម្ព័ន្ធប្រជាធិបតេយ្យ ឬបក្សជួង ធ្លាប់បរិយាយតាមវេទិកាសាធារណៈជាច្រើនឆ្នាំមុនថា រដ្ឋាភិបាលសព្វថ្ងៃមិនមែនជារដ្ឋាភិបាលខ្មែរទេ។
នៅចុងខែសីហា លោក ហ៊ុន សែន ប្រធានគណបក្សប្រជាជនកម្ពុជា បានទៅចូលរួមក្នុងបុណ្យជាតិយៀកណាម ខួប ៨០ឆ្នាំ នៃការទាមទារឯករាជ្យពីបារាំង និងជប៉ុន ផ្តើមពីការបះបោរពីអាទិត្យ កាន់កាប់ទីតាំងមហាអំណាចបរទេសទាំងពីរ នាខែសីហា ឆ្នាំ១៩៤៥ ដោយថ្លែងគោរពសរសើរមេដឹកនាំចលនាវៀតមិញ ប្រធាន ហូ ជី មិញ។
លោក វ៉ន ចាន់ឡូត បញ្ជាក់ថា យោងតាមខ្លឹមសារនៃច្បាប់ស្ដីពីការដកសញ្ជាតិខ្មែរនេះ គឺសំដៅប្រឆាំងលើក្រុមអ្នករិះគន់នៅឯនាយសមុទ្រ ប៉ុន្តែច្បាប់នេះទំនងជានឹងជំរុញឱ្យចលនាប្រឆាំងក្រៅប្រទេសកាន់តែមានសន្ទុះ និងឥទ្ធិពលទៅវិញ។
អគ្គលេខាធិការដ្ឋានព្រឹទ្ធសភា បានចេញសេចក្តីប្រកាសព័ត៌មាននៅថ្ងៃទី១ កញ្ញា នេះថា សមាជិកព្រឹទ្ធសភាចំនួន ៥៤នាក់ បានលើកដៃអនុម័តគាំទ្រសេចក្តីព្រាងច្បាប់ស្តីអំពីវិសោធនកម្មច្បាប់ស្ដីពីសញ្ជាតិជាឯកច្ឆន្ទឥតកែប្រែ ក្នុងកិច្ចប្រជុំវិសាមញ្ញនៅថ្ងៃទី១ ខែកញ្ញា ឆ្នាំ២០២៥ នេះ។
ប្រភពដដែល អះអាងថា សេចក្តីព្រាងច្បាប់នេះរៀបចំឡើងក្នុងគោលបំណងកែសម្រួល និងបន្ថែមរបបគតិយុត្តិអំពីការបាត់សញ្ជាតិខ្មែរ តាមរយៈការដកសញ្ជាតិខ្មែរលើជនដែលរស់នៅលើទឹកដីប្រទេសកម្ពុជា ឬនៅក្រៅប្រទេស ដើម្បីឱ្យស្របតាមមាត្រា៣៣ថ្មី នៃរដ្ឋធម្មនុញ្ញ។
អគ្គលេខាធិការដ្ឋានព្រឹទ្ធសភា បញ្ជាក់ថា សេចក្តីព្រាងច្បាប់នេះ គឺជាឧបករណ៍គតិយុត្តិដ៏សំខាន់ដែលធានាធម្មនុញ្ញភាព ធានាការពារសន្តិភាព អធិបតេយ្យជាតិ និងទប់ស្កាត់រាល់សកម្មភាពទាំងឡាយណាដែលបំផ្លាញឧត្ដមប្រយោជន៍ជាតិ សេចក្តីថ្លៃថ្នូររបស់ជាតិ និងប្រជាជនកម្ពុជា ហើយក៏បង្ហាញឱ្យឃើញអំពីភាពរឹងមាំនៃក្របខ័ណ្ឌច្បាប់ក្នុងការពង្រឹងកិច្ចការពារជាតិដែរ។
កាលពីថ្ងៃទី១៤ ខែកក្កដា ឆ្នាំ២០២៥ មេដឹកនាំបក្សកាន់អំណាច លោក ហ៊ុន សែន ធ្លាប់បានព្រមានថា មានខ្មែរមួយក្រុមកំពុងគប់គិតគ្នាជាមួយថៃ គ្រោងបង្កើតកម្លាំងវាយប្រហារកម្ពុជា ដូច្នេះបុគ្គលទាំងនោះកំពុងប្រព្រឹត្តអំពើក្បត់ជាតិ ហើយពួកគេក៏ជាគោលដៅនៃច្បាប់ដកសញ្ជាតិនេះដែរ។
នាយករដ្ឋមន្ត្រី ហ៊ុន ម៉ា ណែត កាលពីខែកក្កដា កន្លងទៅ ថ្លែងទៅកាន់ប្រជាពលរដ្ឋភាគខាងជើងខេត្តកំពង់ធំ ថា៖ «មានប្រទេសចំនួន១៥០ ក្នុងចំណោមប្រទេសចំនួន២០០ ជាសមាជិកអង្គការសហប្រជាជាតិ មានច្បាប់ដកសញ្ជាតិដើម រួមទាំងសហរដ្ឋអាមេរិកផង។»
អ្វីដែលលោកមិនដឹង ទោះជារៀននៅសហរដ្ឋអាមេរិកក្តីនោះ ឬមិនបានប្រាប់ប្រជាពលរដ្ឋអស់នោះ គឺប្រព័ន្ធច្បាប់រកយុត្តិធម៌ក្នុងប្រទេសប្រជាធិបតេយ្យ មានឯករាជភាព មិនធ្វើតាមចំណង់អ្នកនយោបាយចង់បាន ក្រមព្រហ្មទណ្ឌ និងក្រមរដ្ឋប្បវេណីអត់លាយឡំគ្នានោះទេ។
លោក ហ៊ុន ម៉ាណែត បន្ថែមថា៖ «កុំព្រួយបារម្ភ! បើអ្នកជាអ្នកស្នេហាជាតិពិតប្រាកដ មិនប្រឆាំងនឹងផលប្រយោជន៍ជាតិនោះ។ បើអ្នកគប់គិតនឹងបរទេសបំផ្លាញផលប្រយោជន៍ជាតិ នោះអ្នកមិនមែនជាជនជាតិកម្ពុជា ទេ។»
ក្នុងន័យនេះ អ្នកសង្កេតការណ៍រិះគន់ថា លោកចង់ឲ្យពលរដ្ឋខ្មែររបស់លោកមួយនគរ បិទត្រចៀក បិទភ្នែក និងបិទមាត់៖ កុំស្តាប់ កុំមើល កុំឃើញ កុំនិយាយស្តីរឿងខុសឆ្គងក្នុងការដឹកនាំប្រទេស គឺចាំស្តាប់តែរដ្ឋាភិបាល ឬធ្វើតាមតែទិសបក្សមួយផ្លូវតែប៉ុណ្ណោះ បើចង់បានសុខ។ ផ្ទុយទៅវិញ ពលរដ្ឋខ្មែរនៅចងចាំថា ឪពុកគាត់ មីងមាគាត់ សុទ្ធតែជាអ្នកគប់គិតនឹងបក្សកុម្មុយនីស្តយៀកណាម ឲ្យលើកទ័ពមករំលោភឈ្លានពាន ត្រួតត្រា កាន់កាប់ប្រទេសកម្ពុជា បង្កវិនាសកម្មក្នុងផែនការ «ក៥» ហើយឲ្យពលរដ្ឋខ្មែរមួយភាគធំ ត្រូវដឹងគុណ សងគុណមួយជីវិត។ ម្យ៉ាងទៀត បើពលរដ្ឋខ្មែរមិនអើពើរឿងនយោបាយទេ គឺមានន័យទុកឲ្យតែអ្នកមានអំណាចសម្រេចវាសនាខ្លួនឲ្យរហូតថ្ងៃស្លាប់ និងបន្តបំផ្លាញប្រទេសជាតិ។
ទាក់ទងនឹងការដកសញ្ជាតិខ្មែរនេះ អង្គការការពារសិទ្ធិមនុស្ស ដូចជា Human Rights Watch ជាដើម នៅថ្ងៃទី១ កញ្ញា នេះថ្លែងថា ការធ្វើវិសោធនកម្មច្បាប់ដកសញ្ជាតិខ្មែរ គឺស្មើបង្កើតឧបករណ៍ដ៏គ្រោះថ្នាក់បំបិទមាត់ពលរដ្ឋដែលមានមតិផ្ទុយពីគោលនយោបាយរដ្ឋាភិបាល និងកំណត់អ្នកណាជាខ្មែរ អ្នកណាមិនមែនខ្មែរ។
Bryony Lau នាយិការងនៃអង្គការ Human Rights Watch ផ្នែកកិច្ចការអាស៊ី ថ្លែងថា៖ «ច្បាប់នេះពង្រេចពង្រឹលសិទ្ធិមូលដ្ឋានខាងសញ្ជាតិ ហើយនឹងធ្វើឲ្យសកម្មជន អ្នកសារព័ត៌មាន អ្នកនយោបាយជំទាស់ និងពលរដ្ឋឯទៀត ជាមនុស្សគ្មានប្រទេសរស់នៅ។ ជាមួយគ្នានេះ សមាជិកក្រុមគ្រួសារលោក ហ៊ុន សែន អ្នកខ្លះមានសញ្ជាតិពីរ អ្នកខ្លះមានសញ្ជាតិបី ដូចជាគ្រួសារលោក នេត សាវឿន ជាដើម។»
ជាមួយគ្នានេះ តំណាងរាស្ត្រគណបក្សសង្គ្រោះជាតិ លោក សួន រីដា បានចាត់ទុកការអនុម័តឱ្យមានច្បាប់ដកសញ្ជាតិខ្មែរពីពលរដ្ឋខ្មែរនេះ គឺជាចេតនាដើម្បីបំបែកបំបាក់ជាតិកាន់តែខ្លាំង ជាជាងការពង្រឹងនីតិរដ្ឋ និងការផ្សះផ្សាជាតិដែលកំពុងបែកបាក់ស្រាប់ទៅហើយនោះ៕
© 2025, ឌឹ ខេមបូឌា ដេលី. All rights reserved.