ក្រសួងកសិកម្ម រុក្ខាប្រមាញ់ និងនេសាទ ប្រកាសថា មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប នឹងផ្តល់រង្វាន់ ១ពាន់ដុល្លារអាមេរិកដល់អ្នកដែលបង្ហាញពីអត្តសញ្ញាណជនល្មើសដែលបានចូលទៅកាប់ដើមគ្រញូងចំនួន ៤ដើមក្នុងតំបន់តំបន់ស្ដារ និងអភិវឌ្ឍន៍ព្រៃឈើបន្ទាយស្រី។
ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីជូនដំណឹងកាលពីថ្ងៃទី១៦ ខែមិថុនា ឆ្នាំ២០២២ នេះថា មានជនខិលខូចលួចចូលកាប់ដើមឈើប្រភេទគ្រញូងចំនួន ៤ដើមដែលមានអាយុកាលប្រមាណជា ៥០ឆ្នាំមកហើយ ដែលជាបទល្មើសឧក្រិដ្ឋក្នុងការបំផ្លិចបំផ្លាញទ្រព្យសម្បត្តិសាធារណៈ។
ប្រភពដដែលអះអាងថា ប្រភេទពូជឈើគ្រញូងនេះ គឺជាទ្រព្យសម្បត្តិដ៏មានតម្លៃរបស់រដ្ឋដែលត្រូវបានដាំដុះ និងថែទាំយ៉ាងយកចិត្តទុកដាក់ក្នុងចម្ការពូជឈើគ្រញូងដែលមានទំហំដីជិត ២ពាន់ហិកតារ ក្នុងគោលបំណងថែរក្សាជីវចម្រុះ និងអភិរក្សធនធានធម្មជាតិក្នុងតំបន់ទេសចរណ៍ និងសម្រាប់ស្រាវជ្រាវវិទ្យាសាស្ត្រផងដែរ។
ក្រសួងកសិកម្ម រុក្ខាប្រមាញ់ និងនេសាទ បញ្ជាក់ថា តំបន់ស្ដារ និងអភិវឌ្ឍន៍ព្រៃឈើ ស្ថិតក្នុងភូមិសាស្ត្រឃុំកន្ទួត ស្រុកស្វាយលើ និងឃុំឃុនរាម ស្រុកបន្ទាយស្រី ខេត្តសៀមរាប ត្រូវបានគ្រប់គ្រង និងអភិរក្សតាំងពីឆ្នាំ២០០១ មក ដែលចាត់ទុកជាតំបន់មានសក្ដានុពលធនធានព្រៃឈើដ៏មានតម្លៃដែលក្រសួងកសិកម្ម បានចេញប្រកាសទទួលស្គាល់ជាតំបន់ស្ដារ និងអភិវឌ្ឍន៍ព្រៃឈើកាលពីឆ្នាំ២០១៦ កន្លងទៅ។
ការចេញសេចក្តីប្រកាសព័ត៌មាននេះ ធ្វើឡើងដើម្បីជូនដំណឹងដល់សាធារណជនឱ្យជួយបង្ហាញពីអត្តសញ្ញាណជនល្មើសដែលបានចូលទៅកាប់ដើមឈើគ្រញូងក្នុងតំបន់អភិរក្សកាលពីពេលថ្មីៗនេះ។
តំបន់ស្ដារ និងអភិវឌ្ឍន៍ព្រៃឈើបន្ទាយស្រី ស្ថិតក្នុងឃុំឃុនរាម ស្រុកបន្ទាយស្រី និងឃុំកន្ទួត ស្រុកស្វាយលើ ខេត្តសៀមរាប មានចម្ងាយ ៦០គីឡូម៉ែត្រពីក្រុងសៀមរាប ដែលត្រូវបានបង្កើតឡើងជាប្រភពគ្រាប់ពូជឈើក្នុងព្រៃធម្មជាតិនៃប្រភេទឈើគ្រញូង ក្នុងទំហំដី ១៨៨៨ហិកតារ ក្នុងឆ្នាំ២០១០ និងបានទទួលស្គាល់ពីក្រសួងកសិកម្មនៅឆ្នាំ២០១៦ ដែលបានពង្រីកផ្ទៃដីដល់ទៅ ២៨៣៥ហិកតារ។
តំបន់ស្ដារ និងអភិវឌ្ឍន៍ព្រៃឈើបន្ទាយស្រី នេះ ស្ថិតក្រោមការទទួលខុសត្រូវរបស់វិទ្យាស្ថានស្រាវជ្រាវ និងអភិវឌ្ឍន៍ព្រៃឈើ និងសត្វព្រៃ ប៉ុន្តែខណ្ឌរដ្ឋាភិបាលព្រៃឈើខេត្តសៀមរាប បានដើរតួនាទីយ៉ាងសំខាន់ក្នុងការទទួលខុសត្រូវការពារតំបន់ស្ដារ និងអភិវឌ្ឍន៍ព្រៃឈើបន្ទាយស្រី នេះផងដែរ ក្នុងនោះពួកគេបានបំពេញតួនាទីនេះអស់រយៈពេលជាង ១០ឆ្នាំមកហើយ។
ក្រុមអ្នកឃ្លាំមើលសង្គមលើកឡើងថា សកម្មភាពជនខិលខូចដែលលួចកាប់ដើមឈើក្នុងតំបន់ហាមឃាត់បែបនេះ មិនមែនជាលើកទី១ នោះទេ។ កន្លងមក ក៏មានជនខិលខូចលួចកាប់ដើមឈើធំៗនៅក្នុងបរិវេណប្រាសាទអង្គរវត្តផងដែរ ប៉ុន្តែអាជ្ញាធរគ្មានសមត្ថភាពចាប់ជនខិលខូចទាំងនោះយកទៅផ្ដន្ទាទោសចំពោះមុខច្បាប់បានម្តងណាឡើយ។
ប្រភពដដែលបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ ត្រូវតែចាត់វិធានការទៅលើមន្ត្រីក្រោមឱវាទរបស់ខ្លួនចំពោះការធ្វេសប្រហែសលើកិច្ចការងាររបស់ខ្លួនបែបនេះ ជាពិសេសរដ្ឋបាលព្រៃឈើខេត្តសៀមរាប ដែលមានតួនាទីការពារតំបន់តំបន់ស្ដារ និងអភិវឌ្ឍន៍ព្រៃឈើបន្ទាយស្រី នេះ។ បើគ្មានវិធានការច្បាប់ច្បាស់លាស់ទេ ករណីនេះនឹងនៅតែកើតមានដដែលៗ ដូចជាការលួចកាប់ដើមឈើនៅបរិវេណអង្គរវត្តដូច្នោះដែរ។
សកម្មជនព្រៃឈើ លោក ហេង ស្រស់ យល់ឃើញថា នេះមិនមែនជាលើកទីមួយទេដែលមានការលួចកាប់ឈើនៅតំបន់មួយនេះ។ លោកបន្តថា វាជារឿងអាម៉ាស់ខ្លាំងណាស់ដែលមន្ត្រីទាំងនោះបណ្ដោយឲ្យមានកាប់ឈើនៅតំបន់នោះបាន ដែលវាជាការបង្ហាញឲ្យឃើញថា មន្ត្រីទាំងនោះគ្មានសមត្ថភាពការពារព្រៃឈើនោះទេ។
លោកបន្ថែមថា មន្ត្រីទាំងនោះគួរតែត្រូវបានដកចេញដោយសារគ្មានសមត្ថភាពធ្វើការ ហើយពួកគេដេកចាំតែបើកប្រាក់ខែ តែគ្មានសមត្ថភាព។ លោក ហេង ស្រស់ បន្ថែមថា អ្នកដែលរកស៊ីឈើទាំងនោះមិនមែនអ្នកតូចតាចនោះទេ បើមិនមានអំណាចបក្សក្នុងជួរមន្ត្រីរាជការទេ នោះពួកគេក៏មិនហ៊ានរកស៊ីនោះដែរ។
របាយការណ៍ពីមន្ត្រីបរិស្ថានខេត្តសៀមរាប ឱ្យដឹងកាលពីពេលថ្មីៗនេះថា ចាប់តាំងពីឆ្នាំ២០២០ រហូតដល់ឆ្នាំ២០២១ កន្លងទៅ បទល្មើសលួចកាប់ដើមគ្រញូងក្នុងតំបន់អង្គរមានប្រមាណជាង ១០ករណីហើយ ប៉ុន្តែនៅមិនទាន់មានករណីមួយណាដែលសមត្ថកិច្ចវែកមុខជនល្មើសបាននៅឡើយទេ ខណៈការកាប់ពូជឈើប្រណិតទាំងនោះនៅតែបន្តកើតមានរហូតដល់សព្វថ្ងៃនេះ៕