ពលរដ្ឋរិះគន់ថា ការយកលេសរបស់អាជ្ញាធរអប្សរាដែលថាការកាប់ដើមឈើធំៗដែលមានអាយុកាលរាប់រយឆ្នាំនៅខាងមុខខ្លោងទ្វារទន្លេអុំ ក្នុងតំបន់អង្គរជាបន្តបន្ទាប់ដើម្បីការពារមិនឲ្យរលំទៅថ្ងៃមុខទៀត គឺជាយុទ្ធនាការកាប់បំផ្លាញដើមឈើធំៗខ្ទេចខ្ទីគ្មានសល់តែប៉ុណ្ណោះ។
សាធារណជន និងអ្នកប្រើប្រាស់បណ្ដាញសង្គម បានបញ្ចេញមតិថា មុននឹងកាប់រំលំដើមឈើទាំងនោះ អាជ្ញាធរអប្សរាគួរមានមន្ត្រីជំនាញចុះទៅសិក្សា និងពិនិត្យមើលឱ្យបានច្បាស់លាស់។
ហ្វេសប៊ុកឈ្មោះ Reno Lee បានបញ្ចេញមតិថា «ដើមឈើនេះរាប់ពាន់ឆ្នាំហើយ មិនឃើញរលំទៅណាទេ បើនៅស្រុកគេវិញ គឺមានវិធីការពារ។ មិនព្រមសិក្សា និងថែរក្សាទេ តែបែរជានាំគ្នាខំកាប់ទៅវិញ។»
ចំណែកឈ្មោះ Ratha Solo និយាយថា «ប្រទេសគេដើមឈើធំៗគេមានតែអភិរក្ស ប៉ុន្តែប្រទេសកម្ពុជាវិញ ដើមឈើធំៗកាប់បំផ្លាញខ្ទេចខ្ទី។»
ចំណែកគណនីឈ្មោះ Sona Konpov ថា «ការកាប់ដើមឈើនេះ ជាគ្រោះរបស់ប្រជាជន រីឯលាភ គឺអ្នកធំជាអ្នកទទួល។»
ការកាប់ដើមឈើធំៗនៅមុខខ្លោងទ្វារទន្លេអុំតំបន់អង្គរនេះ គណនីឈ្មោះ Pheakdey Nhim ចាត់ទុកថាជាយុទ្ធសាស្ត្រកន្ទេលធំបន្លំដេក ចំណែកគណនីឈ្មោះ ខ្មែរក្រោកខ្មែររស់ សរសេរថា ឈើប្រណិតដែលពួកគេកំពុងកាប់នោះ គឺដឹកជញ្ជូនទៅទុក និងកន្លែងវិស្វកម្មសម្ដេចតេជោនៅក្រុងសៀមរាប ដែលក្រុមវិស្វកម្មលោក ហ៊ុន សែន ដើរម៉ៅការសំណង់តូចធំក្នុងក្រុងសៀមរាប។
សាធារណជន និងអ្នកប្រើប្រាស់បណ្ដាញសង្គម លើកឡើងថា អាជ្ញាធរជាតិអប្សរាមិនបានជួយការពារ បែរជាឃុបឃិតគ្នាដោយប្រើលេសការពារមិនឱ្យដើមឈើដួលរលំនៅថ្ងៃមុខ ហើយកាប់បំផ្លាញដើមឈើធំៗរបស់ដូនតាដែលមានអាយុកាលរាប់រយឆ្នាំ ដើម្បីយកលុយចែកគ្នាទៅវិញ។
កាលពីថ្ងៃទី២៣ ខែកក្កដា ដើមឈើនៅខាងមុខខ្លោងទ្វារទន្លេអុំនៃក្រុងអង្គរធំ បានដួលរលំបណ្ដាលឱ្យស្លាប់មនុស្សម្នាក់ ហើយរបួស ៣នាក់។ ក្រោយហេតុការណ៍នេះ អាជ្ញាធរជាតិអប្សរាបាននាំគ្នាទៅអាររំលំដើមឈើធំៗនៅមុខខ្លោងទ្វារទន្លេអុំក្នុងតំបន់អង្គរបន្តបន្ទាប់ ក្រោមលេសថា ការពារមិនឱ្យរលំនៅថ្ងៃខាងមុខទៀត។
កាលពីថ្ងៃទី២១ ខែសីហា ឆ្នាំ២០២៣ ដើមគ្រញូងដ៏ធំមួយដើមនៅក្នុងតំបន់អង្គរ ស្ថិតនៅភូមិមណ្ឌល៣ ជាប់ផ្លូវក្រវាត់ឧទ្យានអង្គរ ត្រូវចោរលួចកាប់យកទៅបាត់ដោយសុវត្ថិភាព ខណៈសកម្មភាពនៃការកាប់បំផ្លាញបែបនេះ បានកើតឡើងជាហូរហែតាំងពីមុនមករហូតដល់សព្វថ្ងៃនេះ។ ជាក់ស្តែង ដើមគ្រញូងចំនួន ៤ដើមដែលមានអាយុកាលប្រមាណ ៥០ឆ្នាំ ត្រូវគេលួចកាប់ក្នុងចម្ការពូជឈើគ្រញូងដែលមានទំហំជិត ២ពាន់ហិកតា (១៨៨០ហិកតា) នៅភូមិខ្នាតពោធិ៍ និងភូមិវត្ត ឃុំស្រែពោធិ៍ ស្រុកវ៉ារិន និងភូមិខ្នារក្រៅ ឃុំកន្ទួត ស្រុកស្វាយលើ និងឃុំឃុនរាម ស្រុកបន្ទាយស្រី ខេត្តសៀមរាប កាលពីពាក់កណ្ដាលខែមិថុនា ឆ្នាំ២០២២ កន្លងទៅនោះ៕
