32 C
Phnom Penh

ព្រះរាជអាជ្ញា​ស្នើ​ចៅក្រម​ចេញ​ដីកា​ឃុំ​ខ្លួន​លោក កឹម សុខា ចោទ​បំពាន​បម្រាម​នយោបាយ

ដោយ ឌឹ ខេមបូឌា ដេលី

បទវិភាគ

ព្រះរាជអាជ្ញា​នៃ​សាលាដំបូង​រាជធានី​ភ្នំពេញ ស្នើ​ទៅ​កាន់​ចៅក្រម​ជំនុំជម្រះ​ឲ្យ​តុលាការ​ចេញ​ដីកា​ចាប់​ខ្លួន​ប្រធាន​គណបក្ស​សង្គ្រោះ​ជាតិ លោក កឹម សុខា នៅ​ថ្ងៃទី​២៩ មិថុនា នេះ ដែល​បាន​បំពាន​បម្រាម​របស់​តុលាការ​ហាមឃាត់​ធ្វើ​នយោបាយ បន្ទាប់ពី​លោក​បាន​ចុះ​ជួប​អ្នកគាំទ្រ​របស់​លោក​កាលពី​ពេល​កន្លង​ទៅ។

ការ​ប្រកាស​ស្នើ​របស់​ព្រះរាជអាជ្ញា​នេះ ធ្វើឡើង​ក្នុង​ពេល​ចៅក្រម​សាលាដំបូង​រាជធានី​ភ្នំពេញ​កំពុង​បើក​សវនាការ​លើក​ទី​៤៦ ជំនុំជម្រះ​លើ​សំណុំរឿង​លោក កឹម សុខា ក្នុង​រយៈពេល​ប៉ុន្មាន​ម៉ោង​ប៉ុណ្ណោះ។

បើ​យើង​ទៅ​តាម​គេហទំព័រ Twitter របស់​កូនស្រី​ច្បង​របស់​មេដឹកនាំ​បក្ស​ប្រឆាំង កញ្ញា កឹម មនោវិទ្យា បាន​សរសេរ​ថា ការ​ជូនដំណឹង​ជាបន្ទាន់។ ព្រះរាជអាជ្ញា​នៃ​សាលាដំបូង​រាជធានី​ភ្នំពេញ​បាន​ស្នើ​ទៅ​កាន់​ចៅក្រម​ជំនុំជម្រះ​ឲ្យ​តុលាការ​ចេញ​ដីកា​ចាប់​ខ្លួន​ប្រធាន​គណបក្ស​សង្គ្រោះ​ជាតិ លោក កឹម សុខា ដែល​បាន​បំពាន​បម្រាម​របស់​តុលាការ​ហាមឃាត់​ធ្វើ​នយោបាយ។

កញ្ញា​បាន​សរសេរ​ថា ប៉ុន្មាន​ម៉ោង​នៃ​សវនាការ​ផ្ដោត​ទៅ​លើ​ខ្លឹមសារ​នៃ​សំណើ​របស់​ព្រះរាជអាជ្ញា និង​របាយការណ៍​របស់​នាយកដ្ឋាន​ប្រឆាំង​ភេរវកម្ម និង​ឧក្រិដ្ឋកម្ម​ឆ្លងដែន​នៃ​ក្រសួង​មហាផ្ទៃ ឥឡូវ​នេះ​តុលាការ​បាន​ផ្អាក​សវនាការ​ដោយ​អនុញ្ញាត​ឱ្យ​ភាគី​នីមួយៗ​ធ្វើការ​សន្និដ្ឋាន ហើយ​នៅ​ពេល​ដែល​សវនាការ​បន្ត ចៅក្រម​នឹង​សម្រេច​ថា​តើ​ត្រូវ​ចេញ​ដីកា​ចាប់​ខ្លួន ហើយ​បញ្ជូន​គាត់​ទៅ​ពន្ធនាគារ​ឬ​អត់។

កញ្ញា កឹម មនោវិទ្យា ស្នើសុំ​ឱ្យ​ស្ថានទូត​ចាត់​វិធានការ​ជាបន្ទាន់ ដើម្បី​ការពារ​កុំ​ឱ្យ​មាន​ការ​ចាប់​ខ្លួន​បែប​នេះ។

ប្រធាន​គណបក្ស​សង្គ្រោះ​ជាតិ​ដែល​ត្រូវ​បាន​តុលាការ​កំពូល​រំលាយ លោក កឹម សុខា ត្រូវ​បាន​អាជ្ញាធរ​ក្រុង​ភ្នំពេញ​ចាប់​ខ្លួន​កាលពី​ថ្ងៃទី​៣ ខែ​កញ្ញា ឆ្នាំ​២០១៧ ពី​បទ «ឃុបឃិត​ជាមួយ​រដ្ឋ​បរទេស ដើម្បី​ផ្តួល​រំលំ​រដ្ឋាភិបាល​កម្ពុជា» ប៉ុន្តែ​រហូត​មក​ទល់​នឹង​ពេលនេះ លោក​នៅតែ​មាន​ភាព​ស្អាតស្អំ ព្រោះ​តុលាការ​កម្ពុជា​មិនទាន់​កាត់ទោស​លោក​ពី​បទល្មើស​ណា​មួយ​នៅឡើយ​ទេ។ លោក កឹម សុខា ត្រូវ​បាន​តុលាការ​ដោះលែង​ឱ្យ​នៅ​ក្រៅ​ឃុំ​ជា​បណ្ដោះអាសន្ន ប៉ុន្តែ​លោក​ត្រូវ​បាន​ដាក់​ឱ្យ​ឋិត​នៅ​ក្រោម​ការ​ត្រួតពិនិត្យ​របស់​តុលាការ ដោយ​ហាម​មិន​ឱ្យ​ធ្វើ​សកម្មភាព​មួយ​ចំនួន រួម​មាន​មិន​ឱ្យ​ធ្វើ​សកម្មភាព​នយោបាយ ត្រូវ​បង្ហាញ​ខ្លួន​រាល់​ពេល​មាន​ការ​កោះ​របស់​តុលាការ និង​ហាម​មិន​ឱ្យ​ធ្វើដំណើរ​ចេញ​ទៅ​ក្រៅ​ប្រទេស។

ជុំវិញ​ការ​រឹតត្បិត​សេរីភាព​មេដឹកនាំ​បក្ស​ប្រឆាំង លោក កឹម សុខា កាលពី​ថ្ងៃទី​១៣ ខែ​ឧសភា ឆ្នាំ​២០២២ កន្លងទៅ រដ្ឋមន្ត្រី​ការបរទេស​សហរដ្ឋ​អាមេរិក លោក អេនតូនី ប្លីងខេន បាន​ចេញ​សេចក្តី​ប្រកាស​ព័ត៌មាន​របស់​ខ្លួន​ឲ្យ​កម្ពុជា​ទម្លាក់​ចោល​បទ​ចោទប្រកាន់​លើ​ប្រធាន​គណបក្ស​សង្គ្រោះ​ជាតិ លោក កឹម សុខា និង​អនុញ្ញាត​ឱ្យ​មេដឹកនាំ​បក្ស​ប្រឆាំង​រូប​នេះ​មាន​សិទ្ធិ​ពេញលេញ​ក្នុង​ការ​ចូលរួម​កិច្ចការ​នយោបាយ​ដោយ​សេរី​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស