ជំនួបកំពូលអង្គការយោធាណាតូ (NATO) រយៈពេល ៣ថ្ងៃចាប់ផ្ដើមហើយនៅទីក្រុង Madrid ប្រទេសអេស្ប៉ាញ។
ជំនួបនេះធ្វើឡើងបន្ទាប់ពីការបិទបញ្ចប់ជំនួបកំពូលនៃមេដឹកនាំប្រទេសឧស្សាហកម្មជឿនលឿន G-7 ដែលបានធ្វើឡើងនៅលើទឹកដីអាល្លឺម៉ង់ ហើយចំពេលរុស្ស៊ី វាយកាន់កាប់បានទីតាំងដ៏សំខាន់មួយនៅក្នុងខេត្តលុយហាន់ នៃតំបន់ដុនបាស ភាគខាងកើតប្រទេស និងការបាញ់មីស៊ីលជាង ៦០គ្រាប់រយៈពេល ៣ថ្ងៃទៅលើភាគខាងលិច ភាគខាងជើង និងតំបន់រដ្ឋធានីគៀវ ដោយបណ្ដាលឱ្យខូចខ្ទេចខ្ទីរចនាសម្ព័ន្ធយោធា និងអគារលំនៅឋានរបស់ប្រទេសអ៊ុយក្រែន។
គ្រាប់មីស៊ីលរបស់រុស្ស៊ីជាច្រើនគ្រាប់ក៏បានបាញ់ចំទីផ្សារដ៏ធំមួយរបស់ប្រជាជនអ៊ុយក្រែនផងដែរ។ យោងតាមកងទ័ពអាកាសអ៊ុយក្រែន រុស្ស៊ីបានបាញ់គ្រាប់មីស៊ីលប្រភេទបាញ់កម្ទេចនាវាចម្បាំងឈ្មោះ Kh-22 បាញ់ចេញពីតំបន់ Koursk ក្នុងទឹកដីរុស្ស៊ី សំដៅមកលើផ្សារទំនើបក្នុងក្រុង Krementchouk ដែលស្ថិតនៅភាគអាគ្នេយ៍រដ្ឋធានីគៀវ។
ការវាយប្រហារនេះបណ្ដាលឱ្យជនស៊ីវិលស្លាប់នៅកន្លែងកើតហេតុ ១៨នាក់ និងជាច្រើនសិបនាក់រងរបួស និងបាត់ខ្លួន ៣៦នាក់។ ជាមួយគ្នានេះ កងទ័ពរុស្ស៊ីបានបាញ់ប្លោងគ្រាប់មីស៊ីលទៅលើជនស៊ីវិលដែលកំពុងតែជុំគ្នាទទួលចំណែកទឹកស្អាតពីស៊ីទែននៅទីក្រុង Lyssytchansk។ យ៉ាងហោចណាស់មានមនុស្សស្លាប់ ៨នាក់ក្នុងហេតុការណ៍នេះ។
ប្រធានាធិបតីអ៊ុយក្រែន លោក វូឡូឌីមៀរ ហ្សេឡេនស្គី បានថ្លែងថា ការបាញ់មីស៊ីលមកលើទីផ្សារដែលមានសុទ្ធតែជនស៊ីវិល គឺកងទ័ពរុស្ស៊ីវាយប្រហារដោយគ្មានការពិចារណាសូម្បីតែទីផ្សារលក់ទំនិញដែលមានតែប្រជាជនស៊ីវិល ស្ត្រី និងកុមារច្រើនកុះករ ក៏ត្រូវរងការវាយប្រហារដែរ។ លោក ហ្សេឡេនស្គី ចាត់ទុកជាអំពើព្រៃផ្សៃយង់ឃ្នងរបស់កងទ័ពរុស្ស៊ី។
ដោយមើលឃើញការបាត់បង់អាយុជីវិតរបស់ជនស៊ីវិល មេដឹកនាំក្រុមប្រទេស G-7 ក៏បានថ្លែងការណ៍ថ្កោលទោសដោយចាត់ទុកថា ការវាយប្រហារដោយឥតរើសមុខមកលើទីតាំងរបស់ជនស៊ីវិល គឺវាជាឧក្រិដ្ឋកម្មសង្គ្រាម។ លោកប្រធានាធិបតីបារាំង បានថ្លែងថា ទង្វើដ៏ព្រៃផ្សៃរបស់កងទ័ពរុស្ស៊ីនៅពេលនេះ គឺកាន់តែអាក្រក់។
ចំណែកនាយករដ្ឋមន្ត្រីអង់គ្លេស បានថ្លែងថា ទង្វើរបស់រុស្ស៊ីនេះនឹងរុញឱ្យក្រុមសម្ពន្ធមិត្ត និងក្រុមណាតូកាន់តែពង្រឹងពួតដៃគ្នាកាន់តែរឹងមាំ ដើម្បីជួយអ៊ុយក្រែន។ មេដឹកនាំប្រទេស G-7 មានអាមេរិក បារាំង អាល្លឺម៉ង់ អង់គ្លេស អ៊ីតាលី កាណាដា និងប្រទេសជប៉ុន គឺពួកគេសុទ្ធតែនឹងទៅចូលរួមប្រជុំជាមួយមេដឹកនាំផ្សេងៗទៀតនៃសមាជិកណាតូ ដែលមាន ៣០ប្រទេស ហើយក៏មានវត្តមានប្រធានាធិបតីអ៊ុយក្រែនផងដែរ។
មានការចោទសួរថា តើណាតូអាចឆ្លើយតបដូចម្ដេចចំពោះសង្គ្រាមកាន់តែធ្ងន់លើទឹកដីអ៊ុយក្រែន និងការគំរាមកំហែងរបស់រុស្ស៊ីចង់វាយប្រហារទៅលើសមាជិកណាតូ?
អគ្គលេខាធិការអង្គការណាតូ លោក Jen Stoltenberg បានថ្លែងដោយព្រមានថា ណាតូបានត្រៀមទ័ពប្រយុទ្ធរួចរាល់អស់ហើយ គឺមានចំនួន ៣០ម៉ឺននាក់។ ទ័ពណាតូដែលដាក់ពង្រាយនៅលើដែនដីសមាជិករបស់ខ្លួនជាប់នឹងប្រទេសរុស្ស៊ី គឺមានជាង ៤ម៉ឺននាក់។
ប្រធានណាតូរូបនេះបានបញ្ជាក់ទៀតថា សព្វាវុធធុនធ្ងន់ក៏បានដាក់ពង្រាយរួចហើយផងដែរនៅលើទឹកដីទាំងឡាយដែលជាប់នឹងប្រទេសរុស្ស៊ី និងអ៊ុយក្រែន។
ការថ្លែងរបស់លោក Jen Stoltenberg ធ្វើឡើងមួយថ្ងៃមុនជំនួបកំពូលនៃមេដឹកនាំណាតូ ៣០ប្រទេសចាប់ផ្ដើមនៅថ្ងៃទី២ និងបិទបញ្ចប់នៅថ្ងៃទី៣០ មិថុនា។
ជំនួបណាតូលើកនេះ គឺអាចមានរបៀបវារៈពិសេស ហើយក្នុងនោះណាតូផ្ដោតទៅលើសង្គ្រាមនៅលើទឹកដីអ៊ុយក្រែន ថាតើត្រូវជួយអ៊ុយក្រែនទំហំប៉ុនណា ដើម្បីឱ្យអ៊ុយក្រែនមានលទ្ធភាពវាយបកទៅលើកងទ័ពរុស្ស៊ីវិញ។ ក្នុងជំនួបនេះ គេរំពឹងថានឹងមានការឯកភាពគ្នាថែមទៀតក្នុងការបញ្ចេញថាមពល និងអំណាចរបស់ណាតូ ឆ្លើយតបឱ្យទាន់សភាពការណ៍ប្រសិនបើសមាជិកណាមួយរបស់ណាតូរងការបាញ់ប្រហារដោយកងទ័ពរុស្ស៊ី។
ប៉ុន្មានថ្ងៃចុងក្រោយនេះ រុស្ស៊ីគំរាមវាយប្រហារទៅលើប្រទេសលីទុយអានី ជាសមាជិកណាតូ និងជាប្រទេសដែលមានព្រំដែនជាប់នឹងប្រទេសបេឡារុស ដែលជាប្រទេសសម្ពន្ធមិត្តនៃរបបលោក ពូទីន។
ទីក្រុងមូស្គូ ព្រមានបាញ់កម្ទេចប្រទេសលីទុយអានី ព្រោះតែប្រទេសនេះរាំងខ្ទប់ការដឹកជញ្ជូនទំនិញ និងភស្តុភារទាំងឡាយមិនឱ្យចូលទៅតំបន់នៃសាធារណរដ្ឋលីនីនក្រាត ដែលជាដែនដីស្វយ័តរបស់រុស្ស៊ី។
រុស្ស៊ីចាត់ទុកការរាំងខ្ទប់របស់ប្រទេសលីទុយអានី គឺជាការបង្ករឿងបង្កជម្លោះជាមួយនឹងរុស្ស៊ី។ របបលោក ពូទីន ព្រមានថាមីស៊ីលរបស់រុស្ស៊ីអាចបាញ់ទៅលើលីទុយអានី គ្រប់ម៉ោងគ្រប់ពេលទាំងអស់ បើរុស្ស៊ីអស់ភាពអត់ធ្មត់។
ការព្រមានរបស់ទីក្រុងមូស្គូ បាននាំឲ្យប្រធានអង្គការណាតូឆ្លើយតបយ៉ាងរហ័ស ហើយបានព្រមានវិញថា សមាជិកណាមួយក៏ដោយរបស់ណាតូដែលធ្លាក់ក្នុងការវាយប្រហាររបស់រុស្ស៊ី គឺវាស្មើនឹងណាតូទាំងមូលធ្លាក់ក្នុងសង្គ្រាម។ លោកថា នេះបើយោងតាមមាត្រា៥ នៃលក្ខន្តិកៈរបស់ណាតូ។
ឥឡូវនេះ ជំនួបកំពូលនៃមេដឹកនាំណាតូ គឺរបៀបវារៈសំខាន់ថាតើឆ្លើយតបដូចម្ដេច បើប្រទេសណាមួយដែលជាសមាជិកណាតូត្រូវវាយប្រហារដោយកងទ័ពរុស្ស៊ី។
ក្នុងស្ថានភាពបែបនេះដែលអ្នកសង្កេតការណ៍មើលឃើញថា មេដឹកនាំកំពូលៗរបស់ណាតូដែលទើបជួបគ្នានៅឯកិច្ចប្រជុំ G-7 នៅលើទឹកដីអាល្លឺម៉ង់ គឺពួកគេនឹងកំណត់យុទ្ធសាស្ត្ររឹងមាំរបស់ណាតូ ថាតើចាំបាច់ត្រូវឆ្លើយតបរុស្ស៊ីដូចម្ដេច បើរុស្ស៊ីវាយប្រហារទៅលើទឹកដីអ៊ុយក្រែនកាន់តែធ្ងន់ធ្ងរ ហើយឈានទៅដល់ការប៉ុនប៉ងផ្ដួលរំលំរដ្ឋាភិបាលរបស់លោក ហ្សេឡេនស្គី ទៀតនោះ។
ទាំងនេះនាំឱ្យអ្នកសង្កេតការណ៍មើលឃើញថា បើរដ្ឋាភិបាលលោក ហ្សេឡេនស្គី អាចធ្លាក់ទៅដល់ការផ្ដួលរំលំដោយកងទ័ពរុស្ស៊ី គឺនឹងមានការអន្តរាគមន៍ពីកងទ័ពណាតូ ប៉ុន្តែមានការចោទសួរថា តើណាតូហក់ជួយអ៊ុយក្រែនដោយមធ្យោបាយណាខ្លះ។ មូលហេតុ គឺមានបីនៅចំពោះមុខ គឺ៖
- ទី១ លីទុយអានី រងការបាញ់ប្រហារដោយមីស៊ីលរបស់រុស្ស៊ី។
- ទី២ បេឡារុស ចូលពាក់ព័ន្ធកាន់តែស៊ីជម្រៅនឹងសង្គ្រាមលើទឹកដីអ៊ុយក្រែន ហើយវាយប្រហារលើលីទុយអានី ព្រោះគេដឹងថាទ័ពរុស្ស៊ីមានលើទឹកដីបេឡារុស រួចទៅហើយ។
- ទីបី ប្រទេសប៉ូឡូញ ជាសមាជិកដ៏ខ្លាំងមួយរបស់ណាតូ អាចនឹងលោតចូលសង្គ្រាមព្រំដែនជាមួយបេឡារុស ព្រោះប៉ូឡូញ និងបេឡារុស ធ្លាប់គំរាមប្រយុទ្ធគ្នាម្ដងរួចទៅហើយនៅឆ្នាំ២០២០។
សរុបទាំងនេះសុទ្ធតែជាដើមចមដែលអាចរុញណាតូហក់ចូលសង្គ្រាមរុស្ស៊ីឈ្លានពានអ៊ុយក្រែន ហើយមើលទៅក៏អាចជាចំណុចពិសេសមួយដែរនៃជំនួបកំពូលរបស់មេដឹកនាំណាតូ៕