អ្នកនាំពាក្យក្រសួងយុត្តិធម៌ បានលើកឡើងថា ទិសដៅនៃការធ្វើកំណែទម្រង់ច្បាប់ និងប្រព័ន្ធយុត្តិធម៌នៅកម្ពុជា មានគោលបំណងពង្រឹងការអនុវត្តច្បាប់ឱ្យកាន់តែល្អប្រសើរឡើង ព្រមទាំងដើម្បីធានានូវការអនុវត្តសិទ្ធិមនុស្សនៅកម្ពុជាឱ្យពេញលេញថែមទៀត។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានលើកឡើងអំពីទិសដៅនៃការធ្វើកំណែទម្រង់ច្បាប់ និងប្រព័ន្ធយុត្តិធម៌កាលពីថ្ងៃទី២៩ ខែមិថុនា ឆ្នាំ២០២២ តាមរយៈវេទិកាពិភាក្សាដែលរៀបចំឡើងដោយអង្គភាពអ្នកនាំពាក្យរដ្ឋាភិបាលកម្ពុជា ថា ក្រសួងយុត្តិធម៌កម្ពុជា បានដាក់ចេញនូវទិសដៅយុទ្ធសាស្ត្រនៃកម្មវិធីកំណែទម្រង់ច្បាប់ និងប្រព័ន្ធយុត្តិធម៌តាមវិធី ២យ៉ាង គឺកំណែទម្រង់ច្បាប់ និងកំណែទម្រង់តុលាការ។
លោកអះអាងថា កម្មវិធីកំណែទម្រង់ច្បាប់ និងប្រព័ន្ធយុត្តិធម៌នេះ គឺមានគោលដៅធ្វើយ៉ាងណាឲ្យស្ថានភាពវិស័យយុត្តិធម៌នៅកម្ពុជាកាន់តែមានភាពល្អប្រសើរឡើង ក្នុងនោះគឺត្រូវត្រួតពិនិត្យឡើងវិញនូវច្បាប់ចាស់ៗដោយការធ្វើវិសោធនកម្ម ដើម្បីឆ្លើយតបទៅនឹងតម្រូវការប្រជាពលរដ្ឋ។ ជាងនេះទៀត ក្រសួងយុត្តិធម៌ក៏បានបង្កើតនូវគណៈកម្មការចម្រុះដែលកំពុងសិក្សាស្រាវជ្រាវ និងវាយតម្លៃទៅលើក្រមរដ្ឋប្បវេណី ក្រមព្រហ្មទណ្ឌ ក្រមនីតិវិធីរដ្ឋប្បវេណី និងក្រមនីតិវិធីព្រហ្មទណ្ឌផងដែរនូវចំណុចមួយចំនួនដែលអនុវត្តមិនកើត ដើម្បីធ្វើការកែតម្រូវឲ្យឆ្លើយតបទៅនឹងបរិបទសង្គមបច្ចុប្បន្ន។
អ្នកនាំពាក្យក្រសួងយុត្តិធម៌រូបនេះបញ្ជាក់ថា ក្រសួងក៏បានយកចិត្តទុកដាក់ក្នុងការពង្រឹងគុណភាពសេវាយុត្តិធម៌ដែលផ្តល់ដោយប្រព័ន្ធតុលាការ និងក្រៅប្រព័ន្ធតុលាការផងដែរ ក្នុងនោះក្រសួងបានធ្វើទំនើបកម្មក្នុងការផ្តល់សេវាយុត្តិធម៌ជូនពលរដ្ឋ សំដៅបង្ខិតសេវាទៅកាន់តែកៀកនឹងពលរដ្ឋ ព្រមទាំងបានបង្កើតនូវតុលាការជំនាញតាមវិស័យ ដូចជាតុលាការព្រហ្មទណ្ឌ និងតុលាការរដ្ឋប្បវេណី ជាដើម។
ក្រោយថ្ងៃទី២៤ ខែកញ្ញា ឆ្នាំ១៩៩៣ កម្ពុជាជារដ្ឋមួយដែលពិភពលោកដឹងឮគ្រប់គ្នាថា ជាប្រទេសដែលប្រកាន់យករបបលទ្ធិប្រជាធិបតេយ្យ និងយករដ្ឋធម្មនុញ្ញជាច្បាប់កំពូលរបស់ខ្លួន ដើម្បីកំណត់ការរៀបចំគ្រប់គ្រងរដ្ឋាភិបាល និងស្ថាប័នរបស់ប្រទេស ក្នុងនោះច្បាប់ និងបទបញ្ជាទាំងឡាយត្រូវតែកើតចេញមកពីរដ្ឋធម្មនុញ្ញ និងត្រូវតែស្របនឹងរដ្ឋធម្មនុញ្ញជាដាច់ខាត។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី៣០ មិថុនា នេះថា លោកសូមស្វាគមន៍ក្រសួងយុត្តិធម៌ដែលមានគោលបំណងធ្វើកំណែទម្រង់ច្បាប់ និងប្រព័ន្ធយុត្តិធម៌នៅកម្ពុជា ដើម្បីលើកកម្ពស់ការអនុវត្តច្បាប់ឱ្យមានភាពល្អប្រសើរ ព្រោះថាប្រព័ន្ធយុត្តិធម៌របស់កម្ពុជាសព្វថ្ងៃនេះមិនទាន់មានភាពល្អប្រសើរនៅឡើយទេ បើទោះបីជាប្រមុខរដ្ឋាភិបាលកម្ពុជាធ្លាប់ចេញបទបញ្ជាប្រើកណ្ដាប់ដៃដែកកែទម្រង់ប្រព័ន្ធយុត្តិធម៌របស់ខ្លួននាពេលកន្លងមកក៏ដោយ។
លោក ករុណា អះអាងថា អង្គការសង្គមស៊ីវិលនឹងឃ្លាំមើលនូវការងាររបស់ក្រសួងយុត្តិធម៌នេះ ថាតើក្រសួងពិតជាអាចកសាងនូវទំនុកចិត្តជូនពលរដ្ឋចំពោះប្រព័ន្ធយុត្តិធម៌របស់ខ្លួនបានដែរឬទេ តាមរយៈនៃការធ្វើវិសោធនកម្មច្បាប់មួយចំនួន និងការដាក់បញ្ចូលនូវធនធានមនុស្សដែលត្រូវធ្វើការនៅក្នុងប្រព័ន្ធយុត្តិធម៌នេះ ដើម្បីធានានូវការការពារផលប្រយោជន៍ និងការពារនូវសិទ្ធិមូលដ្ឋានរបស់ពលរដ្ឋកុំឱ្យមានការគាបសង្កត់ទៅថ្ងៃមុខ។
មន្ត្រីជាន់ខ្ពស់ទទួលបន្ទុកសិទ្ធិមនុស្សរូបនេះបារម្ភថា ប្រសិនបើការលើកឡើងរបស់អ្នកនាំពាក្យក្រសួងយុត្តិធម៌នេះ គ្រាន់តែធ្វើឡើងដោយគ្មានការអនុវត្តជាក់ស្តែងដើម្បីឆ្លើយតបទៅនឹងសិទ្ធិរបស់ពលរដ្ឋដែលកំពុងរងនូវការគាបសង្កត់ក្នុងពេលបច្ចុប្បន្ននេះទេ នោះការរិះគន់ពីមជ្ឈដ្ឋានជាតិ និងអន្តរជាតិ គឺនៅតែបន្តកើតមានដដែល។
កាលពីចុងខែវិច្ឆិកា ឆ្នាំ២០២១ ប្រធានសហភាពសហជីពកម្ពុជា លោក រ៉ុង ឈុន រិះគន់ថា អំឡុងពេលដែលលោកត្រូវបានតុលាការឃុំខ្លួនអស់រយៈពេលជាង ១ឆ្នាំកន្លងមក លោកបានសង្កេតឃើញថា តុលាការនៅកម្ពុជាគ្រាន់តែជាទីផ្សារទិញលក់រឿងក្តីយ៉ាងអនាធិបតេយ្យប៉ុណ្ណោះ មិនមែនជាកន្លែងរកយុត្តិធម៌ជូនជនរងគ្រោះនោះទេ។
ជុំវិញបញ្ហានេះ សន្ទស្សន៍ស្ដីពីនីតិរដ្ឋចេញដោយគម្រោងយុត្តិធម៌ពិភពលោក កាលពីពេលកន្លងទៅថា ប្រទេសកម្ពុជាបានជាប់ចំណាត់ថ្នាក់ទី១១២ ក្នុងចំណោមប្រទេសទាំងអស់ចំនួន ១១៣ ក្នុងតំបន់អាស៊ីខាងកើត និងអាស៊ីប៉ាស៊ីហ្វិកស្ដីពីការយល់ដឹងទាបចំពោះនីតិរដ្ឋ៕