ភ្នាក់ងារអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា អះអាងថា ការងារចាំបាច់ដែលត្រូវធ្វើជាបន្តបន្ទាប់នោះ គឺការធ្វើឱ្យស្ថាប័នសិទ្ធិមនុស្សរបស់រដ្ឋាភិបាលកម្ពុជានាពេលអនាគតមានឯករាជភាព និងនាំទៅរកការការពារសិទ្ធិមនុស្សកាន់តែប្រសើរឡើង ព្រមទាំងលើកកម្ពស់នីតិរដ្ឋ។
ការលើកឡើងរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា នៅក្នុងកិច្ចប្រជុំតុមូល ដែលធ្វើឡើងក្នុងទីក្រុងភ្នំពេញនាថ្ងៃព្រហស្បតិ៍ នេះ ឲ្យដឹងថា គណៈកម្មាធិការសិទ្ធិមនុស្សកម្ពុជា (CHRC) និងវេទិកាអាស៊ីប៉ាស៊ីហ្វិក ទៅថ្ងៃអនាគតចាំបាច់ត្រូវធ្វើការឱ្យមានភាពឯករាជ្យ ធ្វើការការពារសិទ្ធិមនុស្សកាន់តែប្រសើរឡើង។
នៅក្នុងកិច្ចពិភាក្សានោះដែរ តំណាងប្រចាំប្រទេស អ្នកស្រី រួអេដា អិល ហាច (Ms. ROUEIDA EL Hage) ថ្លែងថា ការដាក់ចេញនូវសេចក្តីព្រាងច្បាប់ស្តីអំពីការបង្កើតស្ថាប័នសិទ្ធិមនុស្សថ្នាក់ជាតិ និងឯករាជ្យដ៏រឹងមាំមួយ។
ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បញ្ជាក់ថា មកទល់ពេលនេះ កម្ពុជានៅតែរក្សាជំហររបស់ខ្លួនយ៉ាងមុតមាំក្នុងការបង្កើតស្ថាប័នសិទ្ធិមនុស្សជាតិមួយនៅកម្ពុជាឲ្យបាន ក្នុងនោះរដ្ឋាភិបាលក៏ធ្លាប់បានប្រគល់តួនាទីឲ្យក្រុមការងារអង្គការមិនមែនរដ្ឋាភិបាលទទួលបន្ទុកលើសេចក្តីព្រាងច្បាប់ស្ដីពីការបង្កើតស្ថាប័នសិទ្ធិមនុស្សជាតិនេះផងដែរ។
អតីតនាយកប្រតិបត្តិនៃអង្គការអភិវឌ្ឍន៍ផ្នត់គំនិត បណ្ឌិត សេក សុជាតិ ធ្លាប់ប្រាប់សារព័ត៌មាន The Cambodia Daily កន្លងមកថា គណៈកម្មាធិការសិទ្ធិមនុស្សកម្ពុជាត្រូវតែធានាឲ្យបាននូវការអនុវត្តសិទ្ធិមូលដ្ឋានរបស់ពលរដ្ឋ ដោយគ្មានការគំរាមកំហែង នោះគឺគ្រប់គ្រាន់ហើយ។ លោកបន្តថា រដ្ឋាភិបាលគ្រាន់តែទទួលយកការរិះគន់របស់អង្គការសង្គមស៊ីវិលដែលធ្វើការលើវិស័យសិទ្ធិមនុស្ស និងកង្វល់អ្នករាយការណ៍ពិសេសរបស់អង្គការសហប្រជាជាតិ ទៅដោះស្រាយឲ្យបានត្រឹមត្រូវ ក៏ជាការលើកស្ទួយការអនុវត្តសិទ្ធិសេរីភាពរបស់ពលរដ្ឋទៅហើយ។
ការលើកឡើងនេះ ស្របពេលស្ថានភាពសិទ្ធិមនុស្សនៅកម្ពុជាត្រូវបានអង្គការជាតិ និងអន្តរជាតិរកឃើញថា បានធ្លាក់ចុះកាន់តែខ្លាំងចាប់តាំងពីរដ្ឋាភិបាលរំលាយគណបក្សសង្គ្រោះជាតិកាលពីឆ្នាំ២០១៧ និងហាមឃាត់ថ្នាក់ដឹកនាំ រួមទាំងមន្ត្រីជាន់ខ្ពស់របស់បក្សនេះចំនួន ១១៨នាក់មិនឱ្យធ្វើនយោបាយ ៥ឆ្នាំ ខណៈសកម្មជនដីធ្លី សកម្មជនបរិស្ថាន សកម្មជនសិទ្ធិមនុស្ស ត្រូវបានអាជ្ញាធររបស់រដ្ឋាភិបាលធ្វើទុក្ខបុកម្នេញ ជាដើម។
របាយការណ៍ស្ដីពីនីតិរដ្ឋ ឆ្នាំ២០២១ របស់គម្រោងយុត្តិធម៌ពិភពលោក (The World Justice Project) បានរកឃើញថា កម្ពុជាគឺជាប្រទេសដែលមានការដឹកនាំគ្មានតម្លាភាព ពោរពេញដោយការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួនតាមផ្លូវតុលាការដែលបានធ្លាក់ទៅក្នុងចំណោមប្រទេសដែលមាននីតិរដ្ឋអាក្រក់បំផុត ក្នុងចំណាត់ថ្នាក់លេខរៀងទី១៣៨ ក្នុងចំណោមប្រទេសចំនួន ១៣៩ នៅលើពិភពលោក៕