រដ្ឋមន្ត្រីការបរទេសកម្ពុជា និងជាប្រេសិតពិសេសរបស់ប្រធានអាស៊ានប្ដូរវេន លោក ប្រាក់ សុខុន បានឲ្យដឹងថា ដំណើរការចរចារកសន្តិភាពដើម្បីបញ្ចប់វិបត្តិនៅប្រទេសភូមា បានចាប់ផ្ដើមវិលកង់ហើយ ដោយលោក មីន អ៊ុងឡាំង យល់ព្រមឲ្យក្រុមភេរវករអាចចូលតុចរចា។
រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប្រាក់ សុខុន បានលើកឡើងក្នុងសន្និសីទសារព័ត៌មានដើម្បីជម្រាបជូនអង្គទូតនៃបណ្តាប្រទេសនានាពីលទ្ធផលនៃដំណើរទស្សនកិច្ចរបស់ខ្លួនកាលពីថ្ងៃទី៦ ខែកក្កដា ឆ្នាំ២០២២ នេះថា បន្ទាប់ពីដំណើរទស្សនកិច្ចជាលើកទី២ ទៅកាន់ប្រទេសភូមា កាលពីពេលថ្មីៗនេះ ភាគីដែលត្រូវបានអនុញ្ញាតឱ្យមកចូលរួមចរចានោះ គឺក្រុមដែលរបបសឹកភូមា បានចាត់ទុកថាជាក្រុមភេរវករនាពេលកន្លងមក។
ប្រេសិតពិសេសរបស់ប្រធានអាស៊ាន លោក ប្រាក់ សុខុន បញ្ជាក់ថា បើទោះជាមានលក្ខខណ្ឌក្នុងការចរចានេះមានតែ ៣ចំណុចក៏ដោយ ក៏លោកយល់ថា យ៉ាងហោចណាស់ក៏ជាការបើកផ្លូវឲ្យមានលទ្ធភាពក្នុងការជជែកជាមួយគ្នាដែរដើម្បីបញ្ចប់វិបត្តិរបស់ខ្លួន។ លោក ប្រាក់ សុខុន គូសបញ្ជាក់ថា ក្នុងនាមកម្ពុជាជាប្រធានអាស៊ាន គឺអាចធ្វើឲ្យដំណើរការចរចាសន្តិភាពនៅភូមា អាចវិលទៅមុខបានហើយ។ រីឯការចរចាយ៉ាងណាៗនោះ គឺអាស្រ័យលើភាគីពាក់ព័ន្ធនៅក្នុងប្រទេសមីយ៉ាន់ម៉ា ជាអ្នកដោះស្រាយខ្លួនឯងប៉ុណ្ណោះ។
កាលពីថ្ងៃទី២៩ ខែមិថុនា ឆ្នាំ២០២២ រដ្ឋមន្ត្រីការបរទេស និងសហប្រតិបត្តិការអន្តរជាតិ លោក ប្រាក់ សុខុន បានធ្វើទស្សនកិច្ចនៅប្រទេសភូមា ជាលើកទី២ ដើម្បីតាមដានវឌ្ឍនភាពនៃការអនុវត្តកិច្ចព្រមព្រៀងឯកច្ឆន្ទ ៥ចំណុចរបស់អាស៊ានដែលបានសម្រេចដាក់ឱ្យរបបសឹកភូមា អនុវត្តនាពេលកន្លងមក។
យ៉ាងណាក៏ដោយ ក្នុងដំណើរការនៃការចរចានេះ លោក ប្រាក់ សុខុន មិនបានបញ្ជាក់ថា មិនមានភាគីតំណាងរដ្ឋាភិបាលស៊ីវិលដែលត្រូវរបបសឹកធ្វើរដ្ឋប្រហារទម្លាក់នោះទេ ជាពិសេសគឺអ្នកស្រី អ៊ុងសាន ស៊ូជី តែម្តងដែលជាតួអង្គដ៏សំខាន់បំផុតមួយក្នុងការចរចានេះ ហើយក៏ជាតួអង្គដែលកំពុងតែរងនូវការធ្វើទុក្ខបុកម្នេញពីរបបសឹកសព្វថ្ងៃនេះដែរ។
អនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី៧ កក្កដា នេះថា លក្ខខណ្ឌ ៣ចំណុចដែលលោក ប្រាក់ សុខុន អះអាងថាជាចំណុចគន្លឹះដែលអាចឱ្យវិបត្តិនៅភូមា វិលទៅរកភាពល្អប្រសើរឡើងវិញនោះ គឺជារឿងដែលមិនអាចទៅរួចនោះទេ ព្រោះថាលក្ខខណ្ឌចរចាទាំងនោះ គឺជាការលើកឡើងរបស់របបសឹកតែម្ខាងប៉ុណ្ណោះ មិនមែនជាលក្ខខណ្ឌដែលដាក់ចេញដោយភាគីពាក់ព័ន្ធដែលត្រូវចូលរួមតុចរចានោះទេ។
លោក ម៉ែន ណាត អះអាងថា ការយល់ព្រមទទួលយកលក្ខខណ្ឌរបស់របបសឹកភូមាតែម្ខាងមកធ្វើជាប្រធានបទសម្រាប់ការចរចានេះ គឺបង្ហាញឱ្យឃើញថា ប្រេសិតពិសេសរបស់ប្រធានអាស៊ានកំពុងយកចិត្តទុកដាក់ជួយរបបសឹកឱ្យមានភាពស្របច្បាប់ ជាជាងការឆ្ពោះទៅជួយរកដំណោះស្រាយពិតប្រាកដចំពោះវិបត្តិនៅភូមា ដែលកំពុងតែកើតមាននៅពេលនេះ។
អនុប្រធានវេទិកាពលរដ្ឋរូបនេះបញ្ជាក់ថា ការលើកឡើងរបស់លោក ប្រាក់ សុខុន បែបនេះក៏ជាចេតនាមួយជួយបងធំចិន ដែលកំពុងពួនសម្ងំនៅពីក្រោយវិបត្តិដែលកំពុងញាំញីនេះផងដែរ ព្រោះថាចិន តែងផ្សារភ្ជាប់ខ្លួនរបស់ពួកគេក្នុងការជួយដោះស្រាយវិបត្តិភូមានេះរហូតមក គឺក្នុងបំណងដើម្បីរក្សារបបសឹកនេះឱ្យដឹកនាំភូមាបន្តទៀតទៅថ្ងៃមុខ។
កាលពីថ្ងៃទី៣ ខែកក្កដា ឆ្នាំ២០២២ នេះ ទីប្រឹក្សារដ្ឋ និងជារដ្ឋមន្ត្រីការបរទេសចិន លោក Wang Yi បានអះអាងថា រដ្ឋាភិបាលក្រុងប៉េកាំង រំពឹងថា ខ្លួននឹងរួមគ្នាជាមួយអាស៊ានដើម្បីជំរុញមីយ៉ាន់ម៉ា វិលទៅរកភាពល្អប្រសើរឡើងវិញ។
រដ្ឋបាលប៉េកាំង ក៏រំពឹងថា ខ្លួននឹងអាចរួមគ្នាជាមួយអាស៊ានដើម្បីលើកទឹកចិត្តមីយ៉ាន់ម៉ា ឱ្យចាប់ផ្តើមដំណើរការផ្លាស់ប្ដូរប្រជាធិបតេយ្យឡើងវិញ និងរំពឹងថាអាស៊ាននឹងប្រកាន់ខ្ជាប់នូវ “មាគ៌ាអាស៊ាន” ដោយមិនជ្រៀតជ្រែកកិច្ចការផ្ទៃក្នុងរបស់ភូមានោះទេ៕