ប្រទេសថៃ ថ្លែងថា តើប្រទេសកម្ពុជាចង់បានសន្តិភាព ឬចង់ឈ្លោះគ្នាជាមួយថៃ បន្តទៅទៀត ព្រោះថាកម្ពុជានៅតែបន្តរុញបញ្ហាព្រំដែនរវាងប្រទេសទាំងពីរមកលើឆាកអន្តរជាតិ ដែលនាំឱ្យប៉ះពាល់ដល់សន្តិភាព ខណៈថៃ មិនមានបំណងបង្កជម្លោះជាមួយកម្ពុជា ឡើយ។
កាសែតថៃ Khaosod និង The Nation បានស្រង់សម្ដីរដ្ឋមន្ត្រីក្រសួងការបរទេសថៃ លោក ស៊ីហាសាក់ ភួងកេតកែវ ក្នុងកិច្ចប្រជុំលើកទី៦១ នៃក្រុមប្រឹក្សាសិទ្ធិមនុស្សអង្គការសហប្រជាជាតិ (អ.ស.ប) នាក្រុងហ្សឺណែវ ប្រទេសស្វីស កាលពីថ្ងៃអង្គារ ទី២៤ ខែកុម្ភៈ ដែលបានរាយការណ៍នៅថ្ងៃទី២៥ កុម្ភៈ នេះថា រដ្ឋមន្ត្រីក្រសួងការបរទេសថៃ បានបដិសេធការចោទប្រកាន់ដែលថាថៃកំពុងកាន់កាប់ដែនដីកម្ពុជាដោយខុសច្បាប់ ប៉ុន្តែតាមការពិត គឺភាគីទាំងពីរបានយល់ព្រមឲ្យកងទ័ពនៅទីតាំងដដែលក្នុងពេលមានបទឈប់បាញ់ ដើម្បីរង់ចាំការដោះស្រាយតាមការចរចាប៉ុណ្ណោះ។
រដ្ឋមន្ត្រីកិច្ចការបរទេសថៃ ចោទថា ប្រទេសកម្ពុជារំលោភយកទាំងទឹកដីថៃ ទាំងលូកដៃចូលក្នុងនយោបាយជាតិថៃ ជាច្រើនឆ្នាំ ហើយបែរជាប្រតិដ្ឋការពិពណ៌នាថា ប្រទេសថៃឡង់ដ៍ ជាបិសាចទៅវិញ។
រដ្ឋមន្ត្រីក្រសួងការបរទេសថៃ រូបនេះលើកឡើងថា តាមប្រវត្តិសាស្ត្រ ថៃមានចេតនាល្អចំពោះកម្ពុជា រហូតមក ដែលធ្លាប់បានផ្តល់ជម្រកដល់ជនភៀសខ្លួន និងគាំទ្រលើជំនួយមនុស្សធម៌ រួមទាំងការស្ដារប្រទេសកម្ពុជាឡើងវិញផងដែរ បន្ទាប់ពីមានចម្បាំងក្នុងស្រុកនាពេលកន្លងទៅ ប៉ុន្តែកម្ពុជាកំពុងបង្ខូចឈ្មោះថៃ តាមរយៈការចោទប្រកាន់មិនពិត និងការបង្ហាញព័ត៌មានបំភ្លៃមកលើថៃ ទៅវិញ។
ប្រទេសកម្ពុជា នៅជំពាក់បំណុលប្រទេសថៃឡង់ដ៍ ជាង ៥៣លានដុល្លារក្នុងឆ្នាំ២០២៥ ដោយគិតតាំងពីឆ្នាំ២០០៩ ដែលក្រសួងសេដ្ឋកិច្ច និងហិរញ្ញវត្ថុ ចុះកិច្ចសន្យាខ្ចីប្រាក់ធ្វើថ្នល់លេខ៦៨ ពីច្រកចុងចម ទៅខេត្តឧត្ដរមានជ័យ ចម្ងាយ ១១៣គីឡូម៉ែត្រ។ ឆ្នាំ២០១៩ និងឆ្នាំ២០២០ ខ្ចីសង់ថ្នល់លេខ៦៧ ពីសៀមរាប ទៅអន្លង់វែង ជាំខ្សាន្ត ខេត្តព្រះវិហារ។
លោក ស៊ីហាសាក់ បន្ថែមថា សម័យនេះ ប្រទេសសមាជិកអង្គការសហប្រជាជាតិ គប្បីធ្វើសហប្រតិបត្តិការជាមួយគ្នាឲ្យជិតស្និទ្ធ ដើម្បីបង្ក្រាបឧក្រិដ្ឋកម្មឆបោកឆ្លងដែន ដែលពិភពលោកកំពុងតែប្រឆាំង។
នៅប្រទេសបារាំង រដ្ឋមន្ត្រីកិច្ចការបរទេសថៃ បានជួបជាមួយរដ្ឋមន្ត្រីកិច្ចការក្រៅប្រទេសសហភាពអឺរ៉ុប និងកិច្ចការបរទេសបារាំង Jean-Noel Barrot រ៉ាយរ៉ាប់ប្រាប់អំពីស្ថានការណ៍នៃជម្លោះព្រំដែនខ្មែរ-ថៃ។
កាលពីថ្ងៃទី២៤ ខែកុម្ភៈ ឆ្នាំ២០២៦ ដដែល រដ្ឋមន្ត្រីការបរទេសកម្ពុជា លោក ប្រាក់ សុខុន បានលើកឡើងក្នុងសម័យប្រជុំនោះថា វត្តមានកងកម្លាំងថៃ នៅទឹកដីកម្ពុជាបានប៉ះពាល់ដល់ពលរដ្ឋខ្មែរយ៉ាងខ្លាំង និងស្នើឱ្យប្រទេសថៃ ដកទ័ពរបស់ខ្លួនចេញជាបន្ទាន់ ដោយអនុវត្តទៅតាមកិច្ចព្រមព្រៀងរវាងប្រទេសទាំងពីរដែលបានឯកភាពគ្នាកន្លងមកនោះ។
លោក ប្រាក់ សុខុន លើកឡើងថា វត្តមានរបស់កងកម្លាំងថៃ លើទឹកដីខ្មែរនេះ គឺជាឧបសគ្គដ៏ចម្បងចំពោះការវិលត្រឡប់របស់ជនស៊ីវិលទៅកាន់លំនៅឋានប្រកបដោយសុវត្ថិភាព និងសេចក្តីថ្លៃថ្នូរ ព្រោះមានតែការដោះស្រាយជម្លោះដោយសន្តិវិធីក្រោមច្បាប់អន្តរជាតិដែលមិនប្រើប្រាស់កម្លាំងប៉ុណ្ណោះ ទើបប្រជាជននៃប្រទេសទាំងពីររស់នៅជាមួយគ្នាដោយសន្តិភាព ស្ថិរភាព និងគោរពគ្នាទៅវិញទៅមក។
មន្ត្រីរដ្ឋាភិបាលកម្ពុជារូបនេះបញ្ជាក់ថា ប្រទេសថៃ កំពុងរំលោភយ៉ាងធ្ងន់ធ្ងរលើច្បាប់អន្តរជាតិ និងសិទ្ធិមនុស្សជាមូលដ្ឋានរបស់ពលរដ្ឋកម្ពុជា ដោយសារការបង្កសង្គ្រាមកាន់កាប់យ៉ាងជ្រៅចូលក្នុងទឹកដីកម្ពុជា ដូច្នេះ ថៃត្រូវតែដកកងទ័ពចេញពីទឹកដីខ្មែរត្រឡប់ទៅវិញ ដើម្បីឱ្យជនស៊ីវិលកម្ពុជា ជាង ៨ម៉ឺននាក់ អាចវិលទៅរស់នៅក្នុងភូមិកំណើតរបស់ពួកគេវិញបានដោយសុវត្ថិភាព៕
© 2026, ឌឹ ខេមបូឌា ដេលី. All rights reserved.