សហមេធាវីការពារក្តីប្រធានគណបក្សសង្គ្រោះជាតិ លោក កឹម សុខា លើកឡើងថា អយ្យការអមសាលាដំបូងរាជធានីភ្នំពេញ បានសួរសំណួរទៅកាន់លោក កឹម សុខា ក្នុងបំណងរុញច្រានឱ្យមេដឹកនាំបក្សប្រឆាំងមួយនេះធ្លាក់ចូលទៅក្នុងគម្រោងដែលពួកគេបានត្រៀមទុក។
សហមេធាវីការពារក្តីមេដឹកនាំបក្សប្រឆាំង គឺលោក ចាន់ ចេន បានប្រាប់ក្រុមអ្នកសារព័ត៌មានបន្ទាប់ពីសវនាការរបស់លោក កឹម សុខា នៅថ្ងៃទី១៣ ខែកក្កដា ឆ្នាំ២០២២ ថា លោកសង្កេតឃើញថាតំណាងអយ្យការព្យាយាមលើកយកវីដេអូរបស់លោក កឹម សុខា ដែលបានចូលរួមធ្វើបាតុកម្មនៅទីលានប្រជាធិបតេយ្យ ដោយចោទសួរលោក កឹម សុខា ត្រង់ចំណុចដែលគាត់បានថ្លែងទៅកាន់អ្នកគាំទ្រថា៖ «លោកសុំលាពួកគេដើម្បីទៅជួបជាមួយមន្ត្រីទូតរបស់មហាអំណាចមួយ»។
ត្រង់ចំណុចនេះ តំណាងអយ្យការបានចោទសួរថា តើទូតរបស់មហាអំណាចដែលលោក កឹម សុខា បានទៅជួបនោះ គឺជាមហាអំណាចមួយណា?
លោក ចាន់ ចេន បញ្ជាក់ថា លោក កឹម សុខា មិនបានឆ្លើយនឹងសំណួររបស់តំណាងអយ្យការទេ ប៉ុន្តែលោកបានសួរទៅកាន់តំណាងអយ្យការវិញថា តើស្ថានទូតនានាប្រចាំនៅកម្ពុជា រួមទាំងស្ថានទូតរបស់ប្រទេសមហាអំណាចផង គឺជាមិត្តរបស់កម្ពុជា ឬជាសត្រូវរបស់កម្ពុជា?
យ៉ាងណាក៏ដោយ តំណាងអយ្យការក៏មិនបានឆ្លើយតបទៅនឹងសំណួររបស់លោក កឹម សុខា វិញដែរ។
សហមេធាវីការពារក្តីមេដឹកនាំបក្សប្រឆាំងរូបនេះបញ្ជាក់ថា សវនាការពេញមួយព្រឹកនេះ អយ្យការអមសាលាដំបូងរាជធានីភ្នំពេញមិនបានសាកសួរសំណួរលើអង្គហេតុប្រទូសរ៉ាយនោះទេ ប៉ុន្តែលោកសង្កេតឃើញថា តំណាងអយ្យការព្យាយាមប្រើសំណួរដើម្បីអូសទាញចម្លើយរបស់លោក កឹម សុខា ឱ្យទៅដល់ចំណុចដែលពួកគេបានត្រៀមទុក តែរាល់ការឆ្លើយរបស់លោក កឹម សុខា បានធ្វើឱ្យពួកគេបរាជ័យទាំងស្រុង។
ការអះអាងរបស់សហមេធាវីការពារក្តីប្រធានគណបក្សសង្គ្រោះជាតិនេះ ធ្វើឡើងបន្ទាប់ពីអយ្យការអមសាលាដំបូងរាជធានីភ្នំពេញបានសាកសួរលោក កឹម សុខា ជីកឫសជីកគល់ដែលមិនពាក់ព័ន្ធនឹងអង្គហេតុប្រទូសរ៉ាយក្នុងសវនាការលើកទី៤៨ នេះ។
ប្រធានគណបក្សសង្គ្រោះជាតិ លោក កឹម សុខា ត្រូវបានអាជ្ញាធរក្រុងភ្នំពេញចាប់ខ្លួនកាលពីថ្ងៃទី៣ ខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេសដើម្បីផ្តួលរំលំរដ្ឋាភិបាលកម្ពុជា ប៉ុន្តែរហូតមកទល់នឹងពេលនេះ តុលាការកម្ពុជាមិនទាន់អាចកាត់ទោសលោកពីបទល្មើសណាមួយនៅឡើយទេ ខណៈរដ្ឋបរទេសដែលតុលាការបានចោទថាបានឃុបឃិតជាមួយលោក កឹម សុខា នោះ ក៏តុលាការមិនបានបញ្ជាក់ថាជារដ្ឋបរទេសមួយណានោះដែរ។
បើទោះបីជាតុលាការមិនអាចកាត់ទោសលោក កឹម សុខា ក៏ដោយ ក៏តុលាការនៅតែដាក់ឱ្យលោកស្ថិតក្រោមការតាមដានរបស់ខ្លួនរហូតមក ហើយព្យាយាមអូសបន្លាយសវនាការដូចពួកគេកំពុងធ្វើសព្វថ្ងៃនេះ ក្នុងនោះ តុលាការក៏បានដាក់បម្រាមមិនឱ្យលោក កឹម សុខា ចាកចេញទៅក្រៅប្រទេស និងធ្វើសកម្មភាព ឬនិយាយពាក់ព័ន្ធនឹងនយោបាយផងដែរ។
កាលថ្ងៃទី១២ ខែកក្កដា ឆ្នាំ២០២២ មុនសវនាការ មេដឹកនាំបក្សប្រឆាំងរូបនេះបានជួបជាមួយឧបការីការបរទេសសហរដ្ឋអាមេរិកទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក Daniel J. Kritenbrink ក្នុងដំណើរទស្សនកិច្ចផ្លូវការរបស់លោកទៅកាន់កម្ពុជារយៈពេល ២ថ្ងៃ គឺនៅថ្ងៃទី១២ និងទី១៣ សប្តាហ៍នេះ ក្នុងនោះក៏មានការរួមដំណើរជាមួយឯកអគ្គរដ្ឋទូតសហរដ្ឋអាមេរិក លោក Patrick Murphy ផងដែរ៕