27 C
Phnom Penh

ចិន​នាំ​ទំនិញ​ចូល​កម្ពុជា​កើនឡើង ខណៈ​កម្ពុជា​នាំ​ទៅ​ចិន​ធ្លាក់​ចុះ​ក្នុង​រយៈពេល​៦​ខែ​ឆ្នាំ​២០២២

ដោយ ឌឹ ខេមបូឌា ដេលី

បទវិភាគ

អគ្គនាយកដ្ឋាន​គយ និង​រដ្ឋាករ​កម្ពុជា បាន​ឲ្យ​ដឹង​ថា រយៈពេល ៦​ខែ​ក្នុង​ឆ្នាំ​២០២២ នេះ ការ​នាំចេញ​ទំនិញ​របស់​កម្ពុជា​ទៅកាន់​ប្រទេស​ចិន បាន​ធ្លាក់​ចុះ ៩,២% ដែល​មាន​ទំហំ​ទឹកប្រាក់ ៦១១​លាន​ដុល្លារ ខណៈ​ទំនិញ​ដែល​ចិន នាំចូល​មក​កម្ពុជា បាន​កើន ២៤,២% ដែល​មាន​ទំហំ​ទឹកប្រាក់ ៥,៣៧​ពាន់​លាន​ដុល្លារ។

បើ​តាម​ទិន្នន័យ​ពី​អគ្គនាយកដ្ឋាន​គយ និង​រដ្ឋាករ​កម្ពុជា ដែល​បាន​ចេញ​ផ្សាយ​នា​ពេល​ថ្មីៗ​បាន​ឱ្យ​ដឹង​ថា ទំនិញ​ដែល​ចិន​នាំចូល​មក​កម្ពុជា ក្នុង​ឆមាស​ទី​១ នៃ​ឆ្នាំ​២០២២ បាន​កើន ២៤,២% ដែល​មាន​ទំហំ​ទឹកប្រាក់ ៥,៣៧​ពាន់​លាន​ដុល្លារ ខណៈ​ការ​នាំចេញ​ទំនិញ​ពី​កម្ពុជា​ទៅ​ចិន​មាន​ការ​ធ្លាក់​ចុះ ៩,២% ដែល​មាន​ទំហំ​ទឹកប្រាក់ ៦១១​លាន​ដុល្លារ​ធៀប​នឹង​រយៈពេល​ដូច​គ្នា​កាលពី​ឆ្នាំ​២០២១។

ប្រភព​ដដែល​បញ្ជាក់​ថា មុខទំនិញ​ដែល​កម្ពុជា​នាំចេញ​ទៅ​ចិន ក្នុង​នោះ​គ្រឿង​បង្គំ​អគ្គិសនី ផលិតផល​កសិកម្ម និង​ផ្លែឈើ​ភាគច្រើន​ដូចជា​អង្ករ ស្វាយ ចេក ជាដើម។ ចំណែក​ទំនិញ​ដែល​ចិន​នាំចូល​កម្ពុជា​វិញ ភាគច្រើន​ជា​វត្ថុធាតុដើម​ដែល​បម្រើ​ឱ្យ​វិស័យ​កាត់ដេរ វាយនភណ្ឌ និង​សំណង់ ជាដើម។

ការ​នាំ​ទំនិញ​ទៅ​ចិន​ធ្លាក់​ចុះ​នេះ ក្រោម​ហេតុផល​ថា ថ្លៃ​ដឹកជញ្ជូន​កើនឡើង ខណៈ​តំបន់​ខ្លះ​របស់​ប្រទេស​ចិន បាន​បិទ​ខ្ទប់ និង​ការ​នាំ​ទំនិញ​ឆ្លងកាត់​ប្រទេស​ទី​បី ដែល​ករណី​នេះ​នាំ​ឲ្យ​មាន​ភាព​យឺតយ៉ាវ។

អគ្គនាយកដ្ឋាន​គយ និង​រដ្ឋាករ​កម្ពុជា ឲ្យ​ដឹង​ថា នៅ​ក្នុង​ឆមាស​ទី​១ ឆ្នាំ​២០២២ ទំហំ​ពាណិជ្ជកម្ម​ទ្វេភាគី​រវាង​កម្ពុជា-ចិន សម្រេច​បាន​ក្នុង​រង្វង់​ទឹកប្រាក់​ជិត ៦​ពាន់​លាន​ដុល្លារ ដែល​ចំនួន​នេះ​បាន​កើនឡើង ២០,២% បើ​ធៀប​នឹង​រយៈពេល​ដូច​គ្នា​ក្នុង​ឆ្នាំ​២០២១ ដែល​មាន​ទឹកប្រាក់ ៥​ពាន់​លាន​ដុល្លារ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស