25 C
Phnom Penh

របប​សឹក​ភូមា​ប្រហារ​ជីវិត​ក្រុម​ប្រឆាំង ៤​នាក់ ក្នុង​នោះ​២​នាក់​ជា​មន្ត្រី​ជាន់ខ្ពស់​បក្ស​អ្នកស្រី ស៊ូជី

ដោយ ឌឹ ខេមបូឌា ដេលី

បទវិភាគ

តុលាការ​នៃ​របប​សឹក​ភូមា បាន​ប្រហារ​ជីវិត​សកម្មជន​ប្រជាធិបតេយ្យ​ចំនួន ៤​នាក់​ដែល​ត្រូវ​បាន​ចោទ​ប្រកាន់​ថា​បាន​ចូលរួម​អនុវត្ត​អំពើ​ភេរវកម្ម​នៅ​ក្នុង​ប្រទេស ដែល​ពួក​យោធា​ប្លន់​អំណាច​ពី​រដ្ឋាភិបាល​ស៊ីវិល​កាលពី​ថ្ងៃទី​១ ខែ​កុម្ភៈ ឆ្នាំ​២០២១។

ប្រព័ន្ធ​ផ្សព្វផ្សាយ​មួយ​នៃ​ប្រទេស​ភូមា គឺ Myanmar Now បាន​ធ្វើ​សេចក្ដី​រាយការណ៍​ថា មនុស្ស ៤​នាក់​នោះ គឺ ២​នាក់​ជា​មន្ត្រី​ជាន់ខ្ពស់​របស់​គណបក្ស​សម្ព័ន្ធ​ជាតិ​ដើម្បី​ប្រជាធិបតេយ្យ (NLD) ដឹកនាំ​ដោយ​អ្នកស្រី អ៊ុងសាន ស៊ូជី ដែល​អ្នកស្រី​ក៏​រង​ការ​កាត់ទោស​ឱ្យ​មាន​ទោស​ជាច្រើន​រាប់​សិប​ឆ្នាំ​ជុំវិញ​សំណុំរឿង​ច្រើន​ករណី។

លោក Ko Jimmy អាយុ ៥២​ឆ្នាំ​ជា​មេដឹកនាំ​ម្នាក់​នៃ​ចលនា​បះបោរ​ប្រឆាំង​ពួក​យោធា កាលពី​ឆ្នាំ​១៩៨៨ និង​លោក Phyo Zayar អាយុ ៤១​ឆ្នាំ​ជា​សមាជិក​សភា​របស់​បក្ស NLD និង ២​នាក់​ទៀត គឺ​លោក Hla Myo Aung និង Aung Thura Zaw។

អ្នក​នាំពាក្យ​របប​សឹក​ភូមា​បាន​និយាយ​ថា មនុស្ស ៤​នាក់​នេះ​ត្រូវ​កាត់ទោស​ប្រហារ​ជីវិត​ដូចនេះ ដោយ​អនុវត្ត​តាម​ច្បាប់​ប្រឆាំង​ភេរវកម្ម។ ពួកគេ​ត្រូវ​បាន​កាត់ទោស​នៅ​ក្នុង​សវនាការ​បិទ​ទ្វារ​តាំងពី​ខែ​មករា ដើម​ឆ្នាំ​នេះ។ មនុស្ស​ទាំង ៤​នាក់​នេះ​ត្រូវ​បាន​តុលាការ​ចោទប្រកាន់​ថា​បាន​ចូលរួម​ចំណែក​ជួយ​ដល់​កងកម្លាំង​បះបោរ​ក្នុង​ការ​ប្រយុទ្ធ​ដោយ​បង្ហូរ​ឈាម​តទល់​នឹង​កងទ័ព​រដ្ឋាភិបាល​យោធា។

អ្នក​នាំពាក្យ​របប​សឹក​ភូមា គឺ​លោក Zaw Min Tun បាន​ថ្លែង​ការពារ​ការ​កាត់ទោស​ដោយ​ការ​ប្រហារ​ជីវិត​លើ​អ្នកទោស​ទាំងនេះ។ លោក​អះអាង​ថា ការ​អនុវត្ត​ទោស​ដូចនេះ​នៅ​ក្នុង​ប្រទេស​ភូមា គឺ​មិន​ខុស​នឹង​ប្រទេស​ជាច្រើន​ដែល​កំពុង​អនុវត្ត​ទោស​ដូចនេះ​នៅឡើយ។ លោក​បញ្ជាក់​ថា យ៉ាងហោច​ណាស់​ជនស៊ីវិល​ស្លូតត្រង់​ចំនួន ៥០​នាក់​ដោយ​មិន​រាប់​បញ្ចូល​កងកម្លាំង​សន្តិសុខ គឺ​ពួកគេ​បាន​ស្លាប់​ដោយសារ​អ្នកទោស​ទាំងនោះ​ឃុបឃិត​បង្ក​ឱ្យ​មាន​ការ​ស្លាប់​ជនស៊ីវិល បាញ់​ប្រហារ​កងកម្លាំង​សន្តិសុខ​របស់​រដ្ឋាភិបាល។

ចាប់តាំងពី​ក្រុម​យោធា​បាន​ដណ្តើម​យក​អំណាច​មក​គ្រប់គ្រង កាលពី​ខែ​កុម្ភៈ ឆ្នាំ​មុន ដោយ​បាន​ផ្តួល​រំលំ​រដ្ឋាភិបាល​ជាប់​ឆ្នោត​របស់​អ្នកស្រី អ៊ុងសាន ស៊ូជី បាន​បង្ក​ឱ្យ​មាន​ការ​តវ៉ា​បះបោរ​ពាសពេញ​ប្រទេស​ប្រឆាំង​របប​សឹក។

យោង​តាម​សមាគម​ជំនួយ​អ្នកទោស​នយោបាយ​នៃ​ប្រទេស​ភូមា មនុស្ស​ជាង ២១០០​នាក់​ត្រូវ​បាន​សម្លាប់​ដោយ​កងកម្លាំង​សន្តិសុខ​នៃ​របប​សឹក និង​ជាង ១០០០០​នាក់​កំពុង​ជាប់​ឃុំ​ខ្លួន ក្នុង​នោះ ក្រុម​ប្រឆាំង ១១៧​នាក់​ទៀត​ក៏​ត្រូវ​របប​សឹក​ផ្ដន្ទាទោស​ដោយ​ទោស​ប្រហារ​ជីវិត​ដែរ។ ការ​ប្រហារ​ជីវិត​អ្នកទោស​មនសិការ និង​អ្នក​ការពារ​របប​ប្រជាធិបតេយ្យ បាន​នាំ​ឱ្យ​ផ្ទុះ​ប្រតិកម្ម​ជា​ខ្លាំង​ពី​សហគមន៍​អន្តរជាតិ។

អង្គការ Human Rights Watch និង​អង្គការ Amnesty International បាន​ចេញ​មុខ​មុន​គេ​ប្រតិកម្ម​នឹង​របប​សឹក​ភូមា ដោយ​ពួកគេ​បាន​ហៅ​សកម្មភាព​នៃ​ការ​ប្រហារ​ជីវិត​មនុស្ស​ដោយ​របប​សឹក ថា​ជា​អំពើ​ឃោរឃៅ​បំផុត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស