ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី លើកឡើងថា ពលរដ្ឋខ្មែរមានមោទកភាពបំផុតដែលប្រទេសកម្ពុជាពុំមានទោសប្រហារជីវិតដូចប្រទេសដទៃឡើយ ហើយការលុបចោលទោសប្រហារជីវិតនេះ គឺជាការបំពេញកាតព្វកិច្ចដ៏សំខាន់បំផុតមួយស្របតាមច្បាប់សិទ្ធិមនុស្សអន្តរជាតិដែរ។
លោក កែវ រ៉េមី បានលើកឡើងបែបនេះក្នុងពិធីបើកសិក្ខាសាលាមួយដែលផ្សព្វផ្សាយអំពី “សេចក្តីអង្កេតសន្និដ្ឋានរបស់គណៈកម្មាធិការស្ដីពីការបាត់ខ្លួនដោយបង្ខំសម្រាប់កម្ពុជា” ដែលរៀបចំដោយគណៈកម្មាធិការសិទ្ធិមនុស្សកម្ពុជា និងការិយាល័យឧត្ដមស្នងការអង្គការសហប្រជាជាតិប្រចាំកម្ពុជា នៅថ្ងៃទី២៩ ខែវិច្ឆិកា ឆ្នាំ២០២៤។
លោក កែវ រ៉េមី អះអាងថា គ្មានទេការគោរពសិទ្ធិសេរីភាពជាមូលដ្ឋានរបស់មនុស្សនៅក្នុងភ្នក់ភ្លើងសង្គ្រាម សូម្បីតែសិទ្ធិរស់រានមានជីវិតដែលជាសិទ្ធិចម្បងមុនគេ ក៏មិនត្រូវបានធានាដែរ ហេតុនេះការចូលរួមថែរក្សា និងការការពារសន្តិភាព គឺជាកាតព្វកិច្ចរបស់មនុស្សគ្រប់រូប ដើម្បីឈានទៅដល់ការធានាសិទ្ធិសេរីភាពជាមូលដ្ឋានរបស់ខ្លួន។
មេសិទ្ធិមនុស្សកម្ពុជារូបនេះបញ្ជាក់ថា វត្តមានការិយាល័យឧត្ដមស្នងការទទួលបន្ទុកសិទ្ធិមនុស្សនៅកម្ពុជា និងវត្តមានរបស់អ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សនៅកម្ពុជា រួមទាំងការផ្ដល់សច្ចាប័ន និងការចូលជាសមាជិកលើលិខិតុបករណ៍អន្តរជាតិស្ដីពីសិទ្ធិមនុស្ស និងពិធីសារផ្សេងៗ គឺជាភស្តុតាងជាក់ស្តែងបង្ហាញពីឆន្ទៈរបស់រដ្ឋាភិបាលក្នុងការលើកកម្ពស់ និងការការពារសិទ្ធិមនុស្សនៅកម្ពុជា។
ប្រធានក្រុមប្រឹក្សាឃ្លាំមើលកម្ពុជា លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី២៩ វិច្ឆិកា នេះថា ពិតមែនតែកម្ពុជាគ្មានទោសប្រហារជីវិត ប៉ុន្តែទង្វើរបស់រដ្ឋាភិបាលកម្ពុជាលើពលរដ្ឋរបស់ខ្លួនសព្វថ្ងៃនេះ ក៏មិនខុសកាត់ទោសប្រហារជីវិតរបស់ពួកគេដែរ។
លោក ម៉ែន ណាត លើកឡើងថា ការចាប់ខ្លួនសកម្មជនសង្គម សកម្មជននយោបាយ និងអ្នកនយោបាយទៅដាក់គុកទាំងអយុត្តិធម៌រាប់ឆ្នាំកន្លងមក គឺជាចេតនាបំផ្លាញអនាគត និងជីវិតរបស់អ្នកទាំងនោះយ៉ាងព្រៃផ្សៃបំផុត ពីព្រោះពួកគេមិនសមទទួលនូវទារុណកម្មទាំងអយុត្តិធម៌បែបនេះទេ។
កាលពីចុងខែកក្កដា ឆ្នាំ២០២៤ អ្នករាយការណ៍ពិសេសទទួលបន្ទុកស្ថានភាពសិទ្ធិមនុស្សរបស់ឧត្ដមស្នងការអង្គការសហប្រជាជាតិ លោក វីទិត មុនតាប៊ន (Vitit Muntarbhorn) បានលើកឡើងថា លោកមានការបារម្ភយ៉ាងខ្លាំងចំពោះការចាប់ខ្លួនសកម្មជន ការរឹតត្បិតសេរីភាពបញ្ចេញមតិ និងការរឹតត្បិតលំហសេរីភាពនយោបាយនៅកម្ពុជាសព្វថ្ងៃនេះ។
ទិន្នន័យសង្គមស៊ីវិល បង្ហាញថា ចាប់តាំងពីអំឡុងខែកក្កដា ឆ្នាំ២០២៤ មក រដ្ឋាភិបាលកម្ពុជាបានចាត់វិធានការក្តៅចាប់ខ្លួនពលរដ្ឋដែលបញ្ចេញមតិរិះគន់ការដឹកនាំរបស់រដ្ឋាភិបាលជាបន្តបន្ទាប់ ទាំងសកម្មជននយោបាយ សកម្មជនសង្គម និងអ្នកសារព័ត៌មាន ជាដើម សូម្បីពលរដ្ឋខ្មែរដែលរស់នៅលើទឹកដីថៃ ក៏ត្រូវមេដឹកនាំបក្សកាន់អំណាច លោក ហ៊ុន សែន បញ្ជាឱ្យចាប់ខ្លួនបញ្ជូនទៅប្រទេសកម្ពុជាវិញដែរ។
ជាក់ស្តែង ពលរដ្ឋដែលរងនូវការចាប់ខ្លួនពីការរិះគន់តំបន់អភិវឌ្ឍន៍ត្រីកោណ (CLV-DTA) ជាង ៦០នាក់ កំពុងត្រូវបានឃុំខ្លួនក្នុងពន្ធនាគារទាំងអយុត្តិធម៌នាពេលនេះ ក្នុងនោះក៏អនីតិជនផងដែរ៕
© 2024, ឌឹ ខេមបូឌា ដេលី. All rights reserved.