 បានផ្តល់ប្រាក់កម្ចីចំនួន ១៥លានដុល្លារអាមេរិកដល់ក្រុមហ៊ុន ឌី ហឹស្ស ធី អិម អេច (De Heus TMH) ដែលជាក្រុមហ៊ុនផលិតចំណីសត្វដ៏ធំតែមួយគត់នៅកម្ពុជា ដើម្បីធានាក្នុងការប្រមូលទិញវត្ថុធាតុដើមរបស់កសិករខ្មែរឱ្យបានកាន់តែច្រើនក្នុងការរួមចំណែកការពារសន្តិសុខស្បៀងនៅកម្ពុជាទៅថ្ងៃមុខ។){kind=link}
ធនាគារអភិវឌ្ឍន៍អាស៊ី (ADB) បានផ្តល់ប្រាក់កម្ចីចំនួន ១៥លានដុល្លារអាមេរិកដល់ក្រុមហ៊ុន ឌី ហឹស្ស ធី អិម អេច (De Heus TMH) ដែលជាក្រុមហ៊ុនផលិតចំណីសត្វដ៏ធំតែមួយគត់នៅកម្ពុជា ដើម្បីធានាក្នុងការប្រមូលទិញវត្ថុធាតុដើមរបស់កសិករខ្មែរឱ្យបានកាន់តែច្រើនក្នុងការរួមចំណែកការពារសន្តិសុខស្បៀងនៅកម្ពុជាទៅថ្ងៃមុខ។
ADB បានចេញសេចក្តីប្រកាសព័ត៌មានរបស់ខ្លួនកាលពីថ្ងៃទី២៦ ខែកក្កដា ឆ្នាំ២០២២ នេះថា ក្រុមហ៊ុន De Heus TMH Company Limited បានចុះហត្ថលេខាលើប្រាក់កម្ចីចំនួន ១៥លានដុល្លារអាមេរិកជាមួយធនាគារអភិវឌ្ឍន៍អាស៊ី ដើម្បីផលិតចំណីសត្វនៅកម្ពុជាតាមរយៈនៃការពង្រីកសមត្ថភាពផ្ទុក និងកែច្នៃចំណីសត្វរបស់ខ្លួនក្នុងខេត្តកំពង់ស្ពឺ ក្នុងពេលបច្ចុប្បន្ននេះ។
នាយកធនាគារអភិវឌ្ឍន៍អាស៊ី (ADB) ប្រចាំកម្ពុជា អ្នកស្រី Jyotsana Varma បានអះអាងថា តាមរយៈនៃការគាំទ្រដល់ក្រុមហ៊ុន De Heus TMH នេះ គឺជាការជួយពង្រឹងខ្សែសង្វាក់តម្លៃចំណីសត្វ ដែលនឹងធ្វើឲ្យប្រសើរឡើងនូវជីវភាពរស់នៅរបស់កសិករខ្មែរដែលបានដាំដំណាំសម្រាប់ធ្វើចំណីបសុសត្វ និងត្រី ជាដើម ហើយក៏ជាការគាំទ្រដល់វិស័យកសិកម្មនៅកម្ពុជាឱ្យមាននិរន្តរភាព និងភាពធន់ផងដែរ។
នាយកធនាគារអភិវឌ្ឍន៍អាស៊ីរូបនេះបញ្ជាក់ថា ការអភិវឌ្ឍនៃការផ្គត់ផ្គង់ចំណីសត្វដែលមានប្រភពក្នុងស្រុកដែលអាចធានាទាំងគុណភាពខ្ពស់ និងតម្លៃសមរម្យនោះ គឺជាកត្តាសំខាន់ក្នុងការការពារសន្តិសុខស្បៀងរបស់កម្ពុជា និងកាត់បន្ថយការពឹងផ្អែកលើការនាំចូលចំណីសត្វពីបរទេសថែមទៀត។
នាយកប្រតិបត្តិក្រុមហ៊ុន De Heus TMH Company Limited ប្រចាំតំបន់អាស៊ី លោក Gabor Fluit បានអះអាងថា ក្រុមហ៊ុន De Heus TMH បានប្ដេជ្ញាផ្តល់អំណាចដល់កសិករឯករាជ្យនៅកម្ពុជា ដើម្បីពន្លឿនការអភិវឌ្ឍប្រកបដោយចីរភាពនៃខ្សែសង្វាក់ផ្គត់ផ្គង់ចំណីសម្រាប់សត្វនៅកម្ពុជាឱ្យកាន់តែល្អប្រសើរទៅថ្ងៃអនាគត។
កាលពីថ្ងៃទី២៤ ខែមេសា ឆ្នាំ២០២២ ក្រុមហ៊ុន ឌី ហឹស្ស ធី អិម អេច បានបើកសម្ពោធដាក់ឲ្យដំណើរការជាផ្លូវការនូវរោងចក្រផលិតចំណីសត្វខ្នាតអន្តរជាតិរបស់ខ្លួន ដែលបានបោះទុនវិនិយោគចំនួន ១៥លានដុល្លារអាមេរិក ក្នុងការសាងសង់រោងចក្រលើផ្ទៃដីចំនួន ៧១៥៤ម៉ែត្រក្រឡាដែលមានទីតាំងស្ថិតនៅក្នុងខេត្តកំពង់ស្ពឺ។
ក្រុមហ៊ុននេះមានសមត្ថភាពផលិតចំណីសត្វគ្រប់ប្រភេទចំនួន ១ម៉ឺន ៥ពាន់តោនក្នុង ១ខែ ព្រមទាំងមានផែនការផលិតចំណីសត្វ ១ម៉ឺន ៨ពាន់តោនក្នុង ១ឆ្នាំថែមទៀត ក្នុងនោះវត្ថុធាតុដើមក្នុងស្រុកដែលក្រុមហ៊ុនប្រើ ដូចជាដំឡូងមី ពោតក្រហម ចុងអង្ករ កន្ទក់ ថ្មម៉ត់ កាកដូង កាកស្រាបៀ និងម្សៅឆ្អឹងសត្វ ជាដើម ខណៈបច្ចេកទេសផលិតភាគច្រើនត្រូវបាននាំយកពីសហភាពអឺរ៉ុបទាំងអស់។
អតីតប្រធានអង្គការសេដាក និងជាប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានប្រាប់ The Cambodia Daily នៅថ្ងៃទី២៧ កក្កដា នេះថា ការដាក់ចេញនូវគម្រោងនៃការផលិតចំណីសត្វនេះ គឺជាដំណើរការល្អសម្រាប់កសិករខ្មែរដែលមានវត្ថុធាតុដើម និងកាន់តែមានផលល្អសម្រាប់ពលរដ្ឋទាំងឡាយណាដែលប្រកបរបរចិញ្ចឹមសត្វ និងត្រី ដែលធានានូវតម្លៃទាប ជាជាងការនាំចូលចំណីសត្វពីបរទេសដូចពេលកន្លងមក។
បណ្ឌិត យ៉ង សាំងកុមារ សម្ដែងការព្រួយបារម្ភថា ប្រសិនបើរដ្ឋាភិបាលកម្ពុជាមិនយកចិត្តទុកដាក់ជួយជំរុញគម្រោងនេះទេ សង្វាក់ផលិតកម្មនេះក៏មិនអាចទៅមុខរួចបានដែរ ព្រោះថាបើពឹងតែទៅលើក្រុមហ៊ុនឯកជន និងធនាគារអភិវឌ្ឍន៍អាស៊ី គឺនៅតែពិបាកក្នុងការបោះជំហានទៅមុខជានិច្ច។ ដូច្នេះ រដ្ឋាភិបាលកម្ពុជា និងក្រសួងពាក់ព័ន្ធ ព្រមទាំងក្រុមហ៊ុនក្នុងស្រុកនានា ត្រូវតែសហការគ្នាជួយជំរុញគម្រោងនេះឱ្យដំណើរការទៅមុខ នោះទើបអាចជួយកសិករខ្មែរ និងសេដ្ឋកិច្ចរបស់កម្ពុជាស្ទុះទៅមុខបាន។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ធ្លាប់បានបញ្ជាក់នៅក្នុងពិធីសម្ពោធជាផ្លូវការនៃពិព័រណ៍វិស័យកសិកម្ម ការចិញ្ចឹមសត្វ និងបសុសត្វកម្ពុជាកាលពីពេលកន្លងទៅថា កម្ពុជាបានចំណាយប្រាក់ប្រមាណជា ២០០លានដុល្លារអាមេរិកក្នុងមួយឆ្នាំៗលើការនាំចូលចំណីសត្វពីក្រៅប្រទេស៕