27 C
Phnom Penh

កម្ពុជា​ពិភាក្សា​ជាមួយ​ក្រុមហ៊ុន​កាណាដា​សិក្សា​ពី​លទ្ធភាព​វិនិយោគ​បូម​ប្រេង​នៅ​ប្លុក A

ដោយ ឌឹ ខេមបូឌា ដេលី

បទវិភាគ

អគ្គនាយក​នៃ​អគ្គនាយកដ្ឋាន​ប្រេងកាត ក្រសួង​រ៉ែ និង​ថាមពល អះអាង​ថា កម្ពុជា​កំពុង​ពិភាក្សា​ជាមួយ​ក្រុមហ៊ុន EnerCam Resources Corp (Cambodia) នៃ​ប្រទេស​កាណាដា ដែល​បាន​សិក្សា​ពី​លទ្ធភាព​វិនិយោគ​បូម​ប្រេង​នៅ​ប្លុក A បន្ទាប់ពី​ក្រុមហ៊ុន Kris Energy ក្ស័យ​ធន និង​រង​នូវ​ការ​ចោទប្រកាន់​ថា​បាន​លួច​ដឹក​ប្រេង​ពី​កម្ពុជា​កាលពី​ពេល​កន្លង​ទៅ។

អគ្គនាយក​នៃ​អគ្គនាយកដ្ឋាន​ប្រេងកាត ក្រសួង​រ៉ែ និង​ថាមពល លោក ជៀប សួរ បាន​អះអាង​ក្នុង​សន្និសីទ​ប្រេង និង​ឧស្ម័ន​កាលពី​ថ្ងៃទី​២៧ ខែ​កក្កដា ឆ្នាំ​២០២២ ថា បច្ចុប្បន្ន កម្ពុជា​កំពុង​ពិភាក្សា​ការងារ​ជាមួយ​ក្រុមហ៊ុន​មកពី​ប្រទេស​កាណាដា អំពី​ប្រេង​នៅ​កម្ពុជា​ក្នុង​ប្លុក A ហើយ​ក្រុមហ៊ុន​កំពុង​ត្រូវការ​ពេលវេលា​សិក្សា​ទិន្នន័យ​ឡើងវិញ​លើ​បញ្ហា​នេះ ដូច្នេះ​ការ​សិក្សា​គឺ​ត្រូវការ​ពេលវេលា​បន្ថែម​បន្តិច​ទៀត។

លោក ជៀប សួរ លើកឡើង​ថា បន្ទាប់ពី​ប្រេងសាំង​បាន​ឡើង​ថ្លៃ​សព្វថ្ងៃ​នេះ​មាន​សន្ទុះ​នៃ​ការ​ចាប់អារម្មណ៍​លើ​ការ​វិនិយោគ ស្រាវជ្រាវ​អំពី​ប្រេង និង​ឧស្ម័ន​នៅ​កម្ពុជា​ពី​សំណាក់​ក្រុមហ៊ុន​អន្តរជាតិ​ជាច្រើន ដូចជា​ក្រុមហ៊ុន​មកពី​ប្រទេស​កាណាដា ប្រទេស​ចិន អូស្ត្រាលី និង​ថៃ ជាដើម ដែល​បាន​ធ្វើ​ទំនាក់ទំនង​សិក្សា​ឈ្វេងយល់​ពី​ទិន្នន័យ​ដើម្បី​សិក្សា​ពី​ការ​វិនិយោគ​លើ​វិស័យ​នេះ។

លោក​បញ្ជាក់​ថា កម្ពុជា​ស្វាគមន៍​ជានិច្ច​រាល់​ការ​សិក្សា ពិភាក្សា ទោះបីជា​ពេលនេះ​មិន​ទាន់​មាន​កិច្ចព្រមព្រៀង​ក្ដី។ លោក​បន្ត​ថា នៅ​ពេលនេះ​មាន​បណ្ដា​ក្រុមហ៊ុន​ជាច្រើន​បាន​ចាប់អារម្មណ៍​មក​វិនិយោគ​នៅ​កម្ពុជា ដោយ​បាន​សិក្សា​លើ​ការ​វិនិយោគ​ប្លុក​ដែន​គោក និង​ប្លុក​ក្នុង​សមុទ្រ​ផង​ដែរ។

ការ​អះអាង​នេះ ធ្វើឡើង​បន្ទាប់ពី​ប្រទេស​កម្ពុជា​បាន​បរាជ័យ​ក្នុង​ការ​ផលិត​ប្រេង​ជាមួយ​ក្រុមហ៊ុន Kris Energy ដែល​បាន​ក្ស័យ​ធន និង​រង​នូវ​ការ​ចោទ​ថា​បាន​លួច​ដឹក​ប្រេង​ចេញពី​កម្ពុជា​កាលពី​ពេល​កន្លង​ទៅ​នេះ។

កាលពី​ថ្ងៃទី​២៩ ខែ​ធ្នូ ឆ្នាំ​២០២០ លោក​នាយករដ្ឋមន្ត្រី ហ៊ុន សែន បាន​ប្រកាស​អំពី​ការ​ចាប់ផ្តើម​ផលិតកម្ម​ប្រេង​លើកដំបូង​របស់​កម្ពុជា​នៅ​តំបន់​ប្លុក A ក្នុង​សមុទ្រ​ប្រទេស​កម្ពុជា ដោយ​មាន​ការ​វិនិយោគ​ពី​ក្រុមហ៊ុន Kris Energy ដែល​មាន​មូលដ្ឋាន​នៅ​ប្រទេស​សិង្ហបុរី ប៉ុន្តែ​នៅ​ថ្ងៃទី​១ ខែ​សីហា ឆ្នាំ​២០២១ លោក ហ៊ុន សែន បាន​ប្រកាស​ជា​ថ្មី​ថា តំណក់​ប្រេង​លើកដំបូង​នៅ​កម្ពុជា​បាន​បរាជ័យ​ហើយ។ ជាង​នេះ​ទៀត ក្រុមហ៊ុន Kris Energy បាន​លួច​យក​ប្រេង​ពី​កម្ពុជា​ដែល​បូម​បាន​ទៅ​ជាមួយ​ថែម​ទៀត។

ជុំវិញ​បញ្ហា​នេះ រាជរដ្ឋាភិបាល​កម្ពុជា​នៅតែ​មិន​ទាន់​បង្ហាញ​ព័ត៌មាន​ពាក់ព័ន្ធ​នឹង​ប្រេង​ឆៅ​ជិត ៣០​ម៉ឺន​បារ៉ែល ឬ​ស្មើ​ជិត ៤៧​លាន​លីត្រ​ដែល​បច្ចុប្បន្ន​អាច​មាន​តម្លៃ​ទឹកប្រាក់​រាប់​សិប​លាន​ដុល្លារ​អាមេរិក ដែល​ត្រូវ​បាន​គេ​លួច​ដឹក​ចេញពី​ប្រទេស​កម្ពុជា​កាលពី​ពាក់កណ្ដាល​ឆ្នាំ​មុន​នៅឡើយ​ទេ ហើយ​ព័ត៌មាន​អំពី​ការ​លួច​ប្រេង​នេះ រដ្ឋាភិបាល​នៅតែ​បន្ត​បិទ​បាំង​រហូត​ដល់​សព្វថ្ងៃ​នេះ។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​លើកឡើង​ថា ការ​លួច​ដឹក​ប្រេង​ចេញពី​កម្ពុជា​មិនមែន​ជា​រឿង​តូចតាច​នោះ​ទេ ហេតុ​អ្វី​សន្តិសុខ​ប្រទេស​កម្ពុជា​អន់​ខ្សោយ​ម្ល៉េះ ព្រោះ​ថា​ទំហំ​កប៉ាល់​ដែល​ដឹក​ចេញ​រហូត​ដល់​ជិត ៣០​ម៉ឺន​បារ៉ែល ហើយ​នៅតែ​មិន​ដឹង​គេ​ដឹក​ចេញ​ទៀត ឬ​មកពី​រដ្ឋាភិបាល​កម្ពុជា​ជំពាក់​លុយ​គេ ហើយ​គ្មាន​លុយ​សង ក៏​ឱ្យ​គេ​ដឹក​ប្រេង​ចេញ​ទៅ​ដើម្បី​ដោះដូរ​នឹង​ការ​ជំពាក់​បំណុល ឬ​យ៉ាង​ណា។

កាលពី​ថ្ងៃទី​១៩ ខែ​មិថុនា ឆ្នាំ​២០២១ ក្រុម​នាវិក​នៃ​នាវា MT Strovolos របស់​ក្រុមហ៊ុន Kris Energy បាន​បើក​នាវា​ចេញពី​ដែនទឹក​កម្ពុជា​ដោយ​គ្មាន​ការ​ជូនដំណឹង ក្នុង​នោះ​បាន​នាំ​យក​ទៅ​ជាមួយ​នូវ​ប្រេង​ឆៅ​របស់​កម្ពុជា​ចំនួន ២៩​ម៉ឺន ៥​ពាន់​បារ៉ែល​ផង​ដែរ។ រហូត​ដល់​ចុងខែ​កក្កដា ឆ្នាំ​២០២១ នាវា MT Strovolos និង​នាវិក​ជាច្រើន​នាក់​របស់​ក្រុមហ៊ុន Kris Energy ត្រូវ​បាន​អាជ្ញាធរ​ឥណ្ឌូនេស៊ី ឃាត់​ខ្លួន​បន្ទាប់ពី​ចូល​ចត​នៅ​ដែនសមុទ្រ​របស់​ឥណ្ឌូនេស៊ី ដោយ​គ្មាន​ការ​អនុញ្ញាត។

កាលពី​ខែ​មិថុនា ឆ្នាំ​២០១៩ រដ្ឋមន្ត្រី​ក្រសួង​រ៉ែ និង​ថាមពល លោក ស៊ុយ សែម បាន​អះអាង​ក្នុង​វិមាន​រដ្ឋសភា​លើ​សេចក្តី​ព្រាងច្បាប់​ស្តីអំពី​ការ​គ្រប់គ្រង​ប្រេង និង​ផលិតផល​ប្រេងកាត​នៅ​កម្ពុជា​ថា កម្ពុជា​មាន​ប្លុក​ប្រេងកាត​សរុប​ចំនួន ២៥​កន្លែង​ទូទាំង​ប្រទេស ទាំង​ដែនសមុទ្រ និង​ដីគោក ដែល​អាច​ផលិត​ប្រេង​បាន​ចំនួន ៥​លាន​តោន​ក្នុង​មួយ​ឆ្នាំៗ។

លោក ស៊ុយ សែម បញ្ជាក់​ថា នៅ​ដែនសមុទ្រ​មាន​៦ គឺ​ប្លុក A.B.C.D.E និង​ប្លុក F។ រីឯ​ដែន​គោក​មាន​ចំនួន ១៩​ប្លុក និង ៤​តំបន់​ទៀត គឺ​នៅ​ត្រួត​គ្នា​រវាង​ប្រទេស​កម្ពុជា និង​ប្រទេស​ថៃ។ ដោយឡែក​ប្លុក A មាន​ចម្ងាយ​ត្រឹមតែ ១៦០​គីឡូម៉ែត្រ​ប៉ុណ្ណោះ​ពី​ខេត្ត​ព្រះសីហនុ ហើយ​មាន​ចម្ងាយ ៣៣៥​គីឡូម៉ែត្រ​ពី​ប្រទេស​ថៃ និង​ប្រវែង ៣៥០​គីឡូម៉ែត្រ​ពី​ប្រទេស​លាវ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស