អ្នកឃ្លាំមើលព្រមានពីផលប៉ះពាល់ដល់សន្តិសុខថាមពលរបស់កម្ពុជា ខណៈច្រកសមុទ្រហ័រមូសត្រូវបានបិទ

អ្នកឃ្លាំមើលស្ថានការណ៍កម្ពុជា ព្រមានថា ការបិទច្រកសមុទ្រហ័រមូស (Hormuz) ជុំវិញការវាយប្រហារផ្នែកនុយក្លេអ៊ែរ និងយោធារបស់អ៊ីរ៉ង់ ពីសំណាក់សហរដ្ឋអាមេរិក និងអ៊ីស្រាអែល នាពេលនេះ នឹងធ្វើឱ្យសន្តិសុខថាមពលរបស់កម្ពុជាមានភាពផុយស្រួយកាន់តែខ្លាំង។

អ្នកតាមដានភូមិសាស្ត្រនយោបាយនៅតំបន់អាស៊ី-ប៉ាស៊ីហ្វិក លោក សេង វណ្ណលី សរសេរលើគណនីហ្វេសប៊ុករបស់ខ្លួននៅថ្ងៃទី២ មីនា នេះថា សម្រាប់កម្ពុជាដែលនាំចូលប្រេងពីប្រទេសសិង្ហបុរី វៀតណាម និងឥណ្ឌូនេស៊ី បានរងសម្ពាធយ៉ាងខ្លាំងលើការដឹកជញ្ជូន មុនពេលប្រេងឥន្ធនៈបានមកដល់កម្ពុជាទៅទៀត។

លោកថា ទោះបីក្រុមប្រទេសផលិតប្រេង OPEC+ បានសម្រេចបង្កើនផលិតកម្មប្រេងបន្ថែមក្នុងខែមេសា ឆ្នាំ២០២៦ ដើម្បីជួយឱ្យទីផ្សារថាមពលឱ្យមានស្ថិរភាពក៏ដោយ ក៏មិនគ្រប់គ្រាន់ដើម្បីប៉ះប៉ូវការបាត់បង់ប្រេងដ៏ច្រើនសន្ធឹកសន្ធាប់នេះដែរ ប្រសិនបើច្រកសមុទ្រ Hormuz នៅតែបន្តបិទនោះ។

លោក សេង វណ្ណលី លើកឡើងថា សន្តិសុខថាមពលរបស់កម្ពុជាមានភាពផុយស្រួយខ្លាំង ដោយសារការពឹងផ្អែកលើការនាំចូលឥន្ធនៈហ្វូស៊ីល ១០០% (Fossil fuel) សម្រាប់វិស័យដឹកជញ្ជូន និងឧស្សាហកម្ម ទោះបីកម្ពុជាជោគជ័យក្នុងការបង្កើនថាមពលកកើតឡើងវិញ (Renewable Energy) ដល់ ៦៣% នៃសមត្ថភាពអគ្គិសនីសរុបនៅចុងឆ្នាំ២០២៥ កន្លងទៅក៏ដោយ។

លោកបន្ថែមថា សព្វថ្ងៃនេះ កម្ពុជាប្រើប្រាស់ប្រេងក្នុងវិស័យដឹកជញ្ជូន សំណង់ និងកាត់ដេរក្នុងកម្រិតខ្ពស់ដាច់ខាត។ ជាក់ស្តែង ក្នុងឆ្នាំ២០២៥ កម្ពុជាចំណាយទឹកប្រាក់ជាង ២ពាន់លានដុល្លារ (២,៤៣ពាន់លានដុល្លារ) លើការនាំចូលប្រេង និងឧស្ម័ន ខណៈដើមឆ្នាំ២០២៦ នេះ កម្ពុជាបានបង្កើនការចំណាយជាងមុន ដោយគិតត្រឹមខែមករា ដើមឆ្នាំនេះ កម្ពុជាបានចំណាយអស់ជិត ២២០លានដុល្លារ ដែលកើនឡើង ១,៦% ធៀបនឹងឆ្នាំមុន ដោយសារតម្រូវការប្រេងម៉ាស៊ូតកើនឡើងជាងមុន។

អ្នកឃ្លាំមើលសង្គមរូបនេះអះអាងថា ប្រសិនបើតម្លៃប្រេងហក់ឡើងដល់ ១០០ដុល្លារក្នុងមួយបារ៉ែលក្នុងរយៈពេលយូរអង្វែង បញ្ហានេះនឹងប៉ះពាល់ទៅដល់ថវិកាជាតិឆ្នាំ២០២៦ ដែលមានទំហំជាង ១០ពាន់លានដុល្លាររបស់កម្ពុជា ចន្លោះពី ៥% ទៅ ៨% បើរដ្ឋាភិបាលត្រូវបញ្ចេញកញ្ចប់នេះដើម្បីឧបត្ថម្ភធននោះ។

ច្រកសមុទ្រហ័រមូស (Hormuz) គឺជាកំពូលច្រកសមុទ្រទាំង ១៥ នៅលើពិភពលោក ដែលមានសារសំខាន់ខាងយុទ្ធសាស្ត្រតភ្ជាប់ឈូងសមុទ្រពែក្ស ទៅកាន់ឈូងសមុទ្រអូម៉ង់ ឆ្ពោះទៅសមុទ្រអារ៉ាប់ និងមហាសមុទ្រឥណ្ឌា ដោយស្ថិតនៅចន្លោះប្រទេសអ៊ីរ៉ង់ អារ៉ាប់រួម និងអូម៉ង់។ ការបិទច្រកសមុទ្រនេះ អាចបណ្ដាលឱ្យតម្លៃប្រេងកើនឡើងខ្ពស់ និងបង្កភាពវឹកវរដល់ទីផ្សារថាមពលពិភពលោកយ៉ាងធ្ងន់ធ្ងរតែម្តង។

ជុំវិញបញ្ហានេះ អ្នកជំនាញលើកឡើងថា ច្រកសមុទ្រហ័រមូស (Hormuz) គឺជាផ្លូវទឹកតែមួយគត់ដែលតភ្ជាប់រវាង «ឃ្លាំងប្រេងមហាសាល» នៅមជ្ឈិមបូព៌ា ទៅកាន់ទីផ្សារពិភពលោក ដែលក្នុងនោះ ២០% នៃប្រេងឆៅ និង ២៥% នៃឧស្ម័ន (LNG) ត្រូវបាននាំចេញសម្រាប់មនុស្សប្រើប្រាស់ប្រចាំថ្ងៃ។

ចំណែកតំបន់អាស៊ីអាគ្នេយ៍ បានពឹងផ្អែកលើច្រកនេះខ្លាំងបំផុត ព្រោះប្រេងជាង ៨០% ដែលចេញពីច្រកនេះ ត្រូវដឹកជញ្ជូនមកផ្គត់ផ្គង់រោងចក្រ និងយានយន្តនៅអាស៊ីទាំងអស់ ដូចជា ចិន ឥណ្ឌា ជប៉ុន កូរ៉េ និងតៃវ៉ាន់ ជាដើម។

ច្រក Hormuz ត្រូវគេមើលឃើញថាមិនមែនគ្រាន់តែជាច្រកដឹកជញ្ជូនប្រេងតែមួយមុខទេ តែវាក៏ជាជញ្ជីងកំណត់វាសនាសេដ្ឋកិច្ចពិភពលោកផងដែរ។

ពាក់ព័ន្ធនឹងបញ្ហានេះ កាសែតថៃ Khaosod បានស្រង់សម្ដីអ្នកនាំពាក្យកងទ័ពភូមិន្ទថៃ លោក វីនថៃ ស៊ូវ៉ារី កាលពីថ្ងៃទី១ ខែមីនា ឆ្នាំ២០២៦ នេះថា ថៃនឹងបើកការលក់ប្រេងឥន្ធនៈឱ្យប្រទេសឡាវ ឡើងវិញ ប៉ុន្តែថៃ បានដាក់បម្រាមប្រទេសឡាវ មិនឱ្យលក់ប្រេងបន្តទៅឱ្យកម្ពុជាដាច់ខាត។

អ្នកនាំពាក្យកងទ័ពភូមិន្ទថៃ រូបនេះ បញ្ជាក់ថា ការនាំប្រេងចេញទៅប្រទេសឡាវ នឹងត្រូវដាក់ឱ្យស្ថិតនៅក្រោមការឃ្លាំមើលយ៉ាងដិតដល់ ដូចជា ការបន្ថែមប្រព័ន្ធតាមដាន GPS លើនាវាដឹកប្រេងពីប្រភពដើមរហូតដល់គោលដៅ និងការបញ្ជាក់ពីកាតព្វកិច្ចចែកចាយប្រេងឥន្ធនៈនៅតាមដេប៉ូប្រេងក្នុងប្រទេសឡាវ ជាដើម។

កាលពីថ្ងៃទី១៦ ខែកក្កដា ឆ្នាំ២០២៥ អគ្គនាយកដ្ឋានគយ និងរដ្ឋាករកម្ពុជា បានហាមប្រាមការនាំចូលបន្លែ ផ្លែឈើ ប្រេងឥន្ធនៈ និងឧស្ម័នឥន្ធនៈពីប្រទេសថៃ ជាកំហិត ខណៈប្រធានព្រឹទ្ធសភាលោក ហ៊ុន សែន បានប្រកាសបញ្ឈប់ការនាំចូលមុខទំនិញយុទ្ធសាស្ត្រពីប្រទេសថៃ ផងដែរ ដូចជា អគ្គិសនី អ៊ីនធឺណិត ប្រេងឥន្ធនៈ និងឧស្ម័ន រួមទាំងបញ្ឈប់ការចាក់បញ្ចាំងភាពយន្តថៃ ថែមទៀត៕

អ្នកឃ្លាំមើលព្រមានពីផលប៉ះពាល់ដល់សន្តិសុខថាមពលរបស់កម្ពុជា ខណៈច្រកសមុទ្រហ័រមូសត្រូវបានបិទ

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

ប្រធានាធិបតីសហរដ្ឋអាមេរិក អះអាងថាអ៊ីរ៉ង់ប្រាប់ថាទីក្រុងតេហេរ៉ង់ នឹងដួលរលំឆាប់ៗ

ច្រកសមុទ្រហ័រមូស នៅតែមិនទាន់មានសេរីភាពធ្វើនាវាចរណ៍សម្រាប់កប៉ាល់ដឹកប្រេងពីមជ្ឈិមបូព៌ា

អ៊ីរ៉ង់បញ្ជូនសំណើបញ្ឈប់ការឡោមព័ទ្ធច្រកសមុទ្រហ័រមូស និងបញ្ចប់សង្គ្រាមទៅកាន់សហរដ្ឋអាមេរិក

អ្នកឃ្លាំមើលថាអាមេរិកដាក់ទណ្ឌកម្មលើឧកញ៉ា កុក អាន ជាសញ្ញាអាសន្នដល់កម្ពុជា

លោក ដូណាល់ ត្រាំ ព្រមានពីរលកនៃការវាយប្រហារថ្មី ប្រសិនបើកិច្ចព្រមព្រៀងជាមួយអ៊ីរ៉ង់បរាជ័យ

លោក ត្រាំ ជឿថាការចរចាអាចមានវិញនៅ ៣ថ្ងៃទៀត តែអ៊ីរ៉ង់ថាទាល់តែអាមេរិកបើកផ្លូវសមុទ្រឡើងវិញ

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន