កម្មវិធីប្រឡងបវរកញ្ញា ឬ Miss Grand Cambodia ២០២២ បានបង្ហាញសកម្មភាពដើរបង្ហាញសន្លឹកបៀរ និងគ្រាប់អាប៉ោងរបស់បវរកញ្ញាខ្មែរពីររូបក្នុងឈុតសម្លៀកបំពាក់បុគ្គលិកបម្រើការនៅក្នុងបនល្បែងកាស៊ីណូ ត្រូវរងនូវការរិះគន់ពីអ្នកលេងបណ្ដាញសង្គមហ្វេសប៊ុក។
លើទំព័រហ្វេសប៊ុកដែលមានឈ្មោះថា Miss Grand Cambodia បានបង្ហោះវីដេអូកម្មវិធីប្រកួតប្រជែងដែលមានបេក្ខនារី ៣៥រូបមកពីបណ្តាខេត្ត ក្រុង និងសហគមន៍ជនជាតិខ្មែរនៅបរទេស កាលពីថ្ងៃទី២៤ ខែសីហា ឆ្នាំ២០២២ នេះ ដោយបង្ហាញពីឈុតផ្សេងៗដែលពាក់ព័ន្ធនឹងប្រវត្តិសាស្ត្រ តំបន់ សិល្បៈ សាសនា រឿងព្រេងនិទាន ប្រលោមលោក បទចម្រៀង ជំនឿ រុក្ខជាតិ ក៏ដូចជាតំបន់ទេសចរណ៍ផ្សេងៗផងដែរ។
កម្មវិធីនេះមិនត្រឹមតែបង្ហាញឈុតសម្លៀកបំពាក់ប្រពៃណីទេ ប៉ុន្តែបវរកញ្ញាដែលមកពីក្រុងប៉ោយប៉ែត បានលើកបង្ហាញពីសន្លឹកបៀរ និងបវរកញ្ញាដែលមកពីក្រុងបាវិត បានលើកបង្ហាញពីគ្រាប់អាប៉ោង ដែលស្ថិតក្នុងឈុតសម្លៀកបំពាក់ឈុតជានារីបុគ្គលិកបម្រើការនៅក្នុងបនល្បែងកាស៊ីណូ។
ការរិះគន់នេះ ធ្វើឡើងបន្ទាប់ពីបវរកញ្ញាពីររូបបានលើកបង្ហាញពីសន្លឹកបៀរ និងលើកបង្ហាញពីគ្រាប់អាប៉ោងក្នុងកម្មវិធីប្រកួតប្រជែងផ្នែកសម្លៀកបំពាក់បវរកញ្ញាឆ្នាំ២០២២ ដែលត្រូវបានផ្សព្វផ្សាយកាលពីពេលថ្មីៗនេះ។
មន្ត្រីជាន់ខ្ពស់គណបក្សប្រឆាំង លោក មាជ សុវណ្ណារ៉ា បានសរសេរលើគណនីហ្វេសប៊ុករបស់លោកនៅថ្ងៃទី២៥ សីហា នេះ ដោយលើកជាសំណួរថា តើអច្ឆរិយបេតិកភណ្ឌជាតិប្រាសាទអង្គរខ្មែរបានក្លាយជាជម្រកក្នុងការផ្សាយពាណិជ្ជកម្មល្បែងអបាយមុខហើយមែនទេសព្វថ្ងៃនេះ? លោកបន្ថែមថា ល្បែងបៀរ អាប៉ោង ដែលជាអំពើអបាយមុខ ត្រូវគេហាមប្រាមនៅតាមស្រុកភូមិទាំងអស់ ព្រោះវាជាល្បែងស៊ីសងខុសច្បាប់ ដូច្នេះមិនគួរអនុញ្ញាតឱ្យមានការផ្សព្វផ្សាយជាសាធារណៈបែបនេះទេ។
លោកលើកឡើងថា ល្បែងស៊ីសងមិនដែលផ្តល់ក្តីសុខឲ្យជាតិខ្មែរនោះឡើយ។ ល្បែងទាំងនេះជាល្បែងខុសច្បាប់ ហើយក៏ជាប្រភពនាំឱ្យមានការប្រព្រឹត្តអំពើទុច្ចរិត ចាប់ជំរិត លួចប្លន់ និងបង្កភាពអនាធិបតេយ្យក្នុងសង្គម បង្កើតក្រុមបងធំដូចក្រុងកំពង់សោម ជាដើម។
លោកបន្តថា ការបង្ហាញរូបភាពបែបនេះទាក់ទាញបានតែភ្ញៀវបរទេសដែលរកស៊ីខុសច្បាប់ប៉ុណ្ណោះ ដែលពួកគេនឹងចូលទៅប្រទេសកម្ពុជា ខណៈភ្ញៀវបរទេសដែលប្រកបមុខរបរសុចរិតត្រឹមត្រូវស្របច្បាប់ នឹងមិនហ៊ានចូលទៅរកស៊ីនៅស្រុកខ្មែរឡើយ។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា មិនខ្វះទេកេរដំណែលរបស់ខ្មែរដែលអាចយកមកបង្ហាញ ដើម្បីលើកតម្កើងមុខមាត់ប្រទេសជាតិ ដូចជាការបង្ហាញពីសម្លៀកបំពាក់ខ្មែរក្នុងសម័យកាលអង្គរ របាំព្រះរាជទ្រព្យ តំបន់ទេសចរណ៍ ប្រាង្គប្រាសាទបុរាណខ្មែរ និងឧបករណ៍ភ្លេងខ្មែរ ជាដើម។
ទាក់ទិននឹងបញ្ហានេះ នៅលើទំព័រហ្វេសប៊ុក និង Youtube របស់ Miss Grand Cambodia ក្រៅពីផ្សព្វផ្សាយការបង្ហាញរូបភាពល្បែងស៊ីសងនេះ មានការបញ្ចេញមតិជាច្រើនលើរូបភាពបវរកញ្ញាទាំងពីរ ដោយការរិះគន់ធ្ងន់ៗថា គឺជាការជាន់ពន្លិចវប្បធម៌ជាតិ និងជាការសាបព្រោះអំពើល្បែងស៊ីសងនៅក្នុងសង្គមខ្មែរប៉ុណ្ណោះ។
ចំណែកអ្នកខ្លះទៀតសម្ដែងនូវការហួសចិត្តថា មិនគួរដាក់ផ្ទាំងប្រាសាទអង្គរនៅពីក្រោយវត្តមានបវរកញ្ញាដែលបង្ហាញនិមិត្តសញ្ញាល្បែងស៊ីសងបែបនេះទេ ព្រោះថាការធ្វើបែបនេះ គឺជាការជាន់ឈ្លីនិមិត្តសញ្ញារបស់ជាតិខ្មែរទៅវិញ ដែលធ្វើឱ្យបរទេសគិតថា កម្ពុជាជាប្រទេសដែលជាប្រភពល្បែងស៊ីសងប៉ុណ្ណោះ៕