សកម្មជនបរិស្ថានអះអាងថា ការតែងតាំងលោក លីម ប៊ុណ្ណា ហៅខ្នា ដែលជាឧក្រិដ្ឋជនបំផ្លាញព្រៃឈើនៅកម្ពុជា ដែលបុរសខ្លាំងកម្ពុជា លោក ហ៊ុន សែន ធ្លាប់បញ្ជាឱ្យសមត្ថកិច្ចស៊ើបអង្កេត និងអនុវត្តច្បាប់នោះ បានជះឥទ្ធិពលអាក្រក់ដល់សង្គមជាតិ។
កាលពីថ្ងៃទី១៨ ខែសីហា ឆ្នាំ២០២២ គណៈអចិន្ត្រៃយ៍នៃគណៈកម្មាធិការកណ្ដាលគណបក្សប្រជាជនកម្ពុជា ដែលចុះហត្ថលេខាដោយលោក ហ៊ុន សែន បានសម្រេចតែងតាំងលោក លីម ប៊ុណ្ណា ហៅខ្នា ជាជំនួយការលោក ហ៊ុន សែន ក្នុងឋានៈជាប្រធានគណបក្សប្រជាជនកម្ពុជា។
សកម្មជនការពារបរិស្ថាន លោក ហេង ស្រស់ ប្រាប់សារព័ត៌មាន The Cambodia Daily នៅថ្ងៃទី៣០ សីហា នេះថា ឧកញ៉ា លីម ប៊ុណ្ណា ជាឧក្រិដ្ឋជនម្នាក់ដែលរកស៊ីកាប់បំផ្លាញព្រៃឈើក្នុងប្រទេសកម្ពុជាតាំងពីយូរណាស់មកហើយ។ មួយវិញទៀត ឧកញ៉ា លីម ប៊ុណ្ណា ក៏ជាប់ពាក់ព័ន្ធបទល្មើសព្រៃឈើ ហើយតុលាការខេត្តមណ្ឌលគិរី ក៏បានចេញដីកាចាប់ខ្លួនឧកញ៉ាថែមទៀត។
លោកសោកស្ដាយណាស់ដែលរដ្ឋាភិបាលមិនបានអនុវត្តច្បាប់ បែរជាតែងតាំងឧកញ៉ាដែលបានកាប់បំផ្លាញព្រៃឈើ និងរកស៊ីដឹកឈើខុសច្បាប់ទៅលក់នៅវៀតណាមទៅវិញ។ លោកបង្ហាញការមិនសប្បាយចិត្តនៅពេលឃើញឧក្រិដ្ឋជនបំផ្លាញទ្រព្យសម្បត្តិជាតិត្រូវបានតែងតាំង និងលើកតម្កើង ហើយអ្នកដែលការពារ និងចូលរួមទប់ស្កាត់ព្រៃឈើ បែរជាត្រូវបានរដ្ឋាភិបាលចោទប្រកាន់ថាជាជនល្មើសទៅវិញ។
លោក ហេង ស្រស់ ចាត់ទុកការតែងតាំង និងលើកតម្កើងឧក្រិដ្ឋជនបំផ្លាញព្រៃឈើជាជនស្អាតស្អំមកដាក់ជិតខ្លួនបែបនេះ មិនខុសអ្វីយកចោរមកនៅក្បែរខ្លួននោះឡើយ។ លោកចោទជាសំណួរថា ហេតុអ្វីបានជាលោកនាយករដ្ឋមន្ត្រី ហ៊ុន សែន យកឧក្រិដ្ឋជនដែលជាប់ពាក់ព័ន្ធបទល្មើសធនធានជាតិធ្វើជាជំនួយការទៅវិញ?
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានប្រាប់សារព័ត៌មានក្នុងស្រុកថា លោកចាត់ទុកការចោទប្រកាន់នេះថាជាការលើកឡើងដោយគ្មានមូលដ្ឋានច្បាស់លាស់។ លោកថា ការតែងតាំង គឺត្រូវបានធ្វើឡើងដោយសារតែពួកគេមានលក្ខណៈសម្បត្តិគ្រប់គ្រាន់ ខណៈលោក ហ៊ុន សែន មិនមែនចេះតែតែងតាំងនោះទេ។
កាលពីថ្ងៃទី១៥ ខែមករា ឆ្នាំ២០១៦ កន្លងទៅ លោក ហ៊ុន សែន បានបញ្ជាឲ្យលោកអភិបាលខេត្តត្បូងឃ្មុំ និងអាជ្ញាធរពាក់ព័ន្ធ ចាត់វិធានការឧកញ៉ា លីម ប៊ុណ្ណា ហៅខ្នា ដែលលោកហៅថាជាមេឈ្មួញដឹកជញ្ជូនឈើខុសច្បាប់ទៅលក់នៅប្រទេសវៀតណាម។
ការចេញបញ្ជាឲ្យចាត់វិធានការក្រោយពីសមត្ថកិច្ចបានស៊ើបអង្កេតដោយរកឃើញថា ឧកញ៉ា លីម ប៊ុណ្ណា និងឧកញ៉ាមួយរូបទៀត គឺជាគោលដៅចម្បងនៃការបង្ក្រាបពេលនោះ។
ឧកញ៉ា លីម ប៊ុណ្ណា ហៅខ្នា គឺជាឈ្មួញដ៏ល្បីល្បាញនៅក្នុងខេត្តកំពង់ចាម និងខេត្តត្បូងឃ្មុំ ជុំវិញសកម្មភាពដឹកជញ្ជូនឈើប្រណីតទៅលក់នៅប្រទេសវៀតណាម តាមច្រកព្រំដែនមួយចំនួននៅស្រុកមេមត់ ខេត្តត្បូងឃ្មុំ។ ជាងនេះទៅទៀត នៅពេលទទួលបានអាជ្ញាប័ណ្ណក្នុងការសម្អាតផ្ទៃអាងទំនប់វារីអគ្គិសនីសេសានក្រោម២ នៅស្រុកសេសាន ខេត្តស្ទឹងត្រែង គឺឧកញ៉ា លីម ប៊ុណ្ណា ហៅខ្នា បានកាប់ឈើប្រណីតក្នុងព្រៃសហគមន៍ក្រៅបរិវេណបាតអាង ដឹកជញ្ជូនធ្វើអាជីវកម្មខុសច្បាប់ស្រេចតែទំនើងចិត្តដែលគ្មានសមត្ថកិច្ចណាហ៊ានប៉ះពាល់នោះឡើយ៕