សង្គ្រាមរុស្ស៊ីឈ្លានពានអ៊ុយក្រែន គឺជាការដើរផ្ទុយនឹងគោលនយោបាយសន្តិភាពនិយមរបស់អតីតមេដឹកនាំសហភាពសូវៀត Mikhail Gorbachev ដែលទទួលមរណភាពក្នុងជន្មាយុ ៩១ឆ្នាំកាលពីថ្ងៃអង្គារ ទី៣០ ខែសីហា នេះ។
នេះជាការលើកឡើងរបស់លោក Klaus Iohannis ប្រធានាធិបតីនៃប្រទេសរូម៉ានី។ លោក Klaus Iohannis បានបន្តទៀតថា សង្គ្រាមរុស្ស៊ីឈ្លានពានអ៊ុយក្រែន មិនបានឆ្លើយតបនឹងចក្ខុវិស័យ និងកេរដំណែលរបស់លោក Gorbachev ដែលត្រូវបានពិភពលោកចាត់ទុកថាជាមេដឹកនាំធ្វើឲ្យពិភពលោកផ្លាស់ប្ដូរពីសង្គ្រាមត្រជាក់ទៅរកសន្តិភាពនិយមនោះឡើយ។
លោក Iohannis បានសរសេរនៅលើ Twitter របស់លោកថា លោក Gorbachev គឺជាមេដឹកនាំដែលមានចិត្តទូលំទូលាយ គឺលោកមិនឱ្យតម្លៃទៅលើការប្រជែងអំណាចនោះទេ។
លោកប្រធានាធិបតីរូម៉ានីរូបនេះបន្តថា សង្គ្រាមដ៏ឃោរឃៅព្រៃផ្សៃដែលរបបក្រុងមូស្គូប្រព្រឹត្តទៅលើប្រទេសអ៊ុយក្រែន គឺមេដឹកនាំរុស្ស៊ីបច្ចុប្បន្ននេះចង់ប្រែក្លាយរុស្ស៊ី ទៅជាសហភាពសូវៀតឡើងវិញ តែលោកថាលោក វ៉្លាឌីមៀរ ពូទីន គួរតែយល់ថា សម័យកាលនេះទៅហើយ គេមិនអាចរត់ទៅរករបបសហភាពនិយមបានទៀតនោះទេ។ លោកថា ការឈ្លានពានយកទឹកដីគេ គឺហួសសម័យទៅហើយ។
លោក Iohannis ទទូចថា មេដឹកនាំរុស្ស៊ីគួរចងចាំបណ្ដាំរបស់ Gorbachev ដែលប្រាប់ថា ការវិវឌ្ឍទាំងឡាយ គឺអាស្រ័យនឹងកាលៈទេសៈ និងស្ថានការណ៍ពិភពលោក គឺគេពុំអាចជម្នះកត្តាសត្យានុម័តរបស់ធម្មជាតិបានទេ។
សាររបស់ប្រធានាធិបតីរូម៉ានី ធ្វើឡើងក្រោយពីលោកទទួលដំណឹងពីរុស្ស៊ីមកថា លោក Mikhail Gorbachev ដែលជាមេដឹកនាំចុងក្រោយបង្អស់របស់សហភាពសូវៀត បានទទួលមរណភាពក្នុងជន្មាយុ ៩១ឆ្នាំ។
បើតាមទីភ្នាក់ងារព័ត៌មាន AP ដែលបានចុះផ្សាយកាលពីថ្ងៃអង្គារ ដោយបានដកស្រង់ពីសេចក្តីថ្លែងការណ៍របស់មន្ទីរពេទ្យរដ្ឋ Central Clinical Hospital នៅជាយក្រុងមូស្គូ ដែលថា លោក Gorbachev បានទទួលមរណភាពក្រោយពីមានជំងឺច្រើនឆ្នាំមកហើយ។
តែយ៉ាងណាក៏ដោយ ពិភពលោកនៅចងចាំថា លោក Gorbachev បានព្យាយាមមិនបានសម្រេចដើម្បីស្រោចស្រង់មហាអំណាចសហភាពសូវៀតពីការដួលរលំ ប៉ុន្តែកិច្ចប្រឹងប្រែងរបស់លោកបាននាំឱ្យមានកំណែទម្រង់ដ៏អស្ចារ្យ ដែលនៅទីបំផុត បាននាំឱ្យពិភពលោកបញ្ចប់សង្គ្រាមត្រជាក់។
លោក Gorbachev បានឡើងកាន់តំណែងប្រធានាធិបតីសហភាពសូវៀត បានរយៈពេល ៧ឆ្នាំ។ ក្នុងអំឡុង ៤ឆ្នាំចុងក្រោយ លោកបានជំរុញឱ្យមានការផ្លាស់ប្ដូរប្រព័ន្ធដឹកនាំនៃរបបសង្គមនិយម ប៉ុន្តែការផ្លាស់ប្ដូររបស់លោក Gorbachev ស្ទុះយ៉ាងលឿនជាងអ្វីដែលលោកបានកំណត់ផែនការរបស់លោកទៅទៀត។ លោកបានបណ្ដោយឱ្យដួលរលំសហភាពសូវៀត ដែលប្រកាន់របបកុម្មុយនីស្ត ព្រោះតែលោកមិនព្រមបញ្ចេញទ័ពទៅបង្ក្រាបរដ្ឋតូចៗដែលងើបឡើងបះបោរនោះទេ ទោះជាក្រុមភ្នាក់ងារប៉ូលិស KGB ដែលមានលោក វ៉្លាឌីមៀរ ពូទីន ផងដែរបានស្នើសុំលោកនៅពេលនោះក៏ដោយ។
សហភាពសូវៀតមានរដ្ឋចំណុះ ១៥រដ្ឋ ហើយសូម្បីប្រទេសអ៊ុយក្រែន ក៏ជារដ្ឋមួយផងដែរ។ ប្រទេសដែលនាំឲ្យមានការងើបបះបោរផ្ដាច់ខ្លួនពីសហភាពសូវៀត គឺមានរដ្ឋលីទុយអានី រដ្ឋឡាតវៀ និងអេស្តូនី។ បច្ចុប្បន្នរដ្ឋទាំង៣ នេះ គឺជាប្រទេសដែលមានអាសនៈរបស់ពួកគេនៅអង្គការសហប្រជាជាតិ ហើយគឺសមាជិករបស់អង្គការយោធាណាតូទៀតផង។
ព្រឹត្តិការណ៍នៅពេលនោះ បានរុញឱ្យបណ្តាប្រទេសនៅអឺរ៉ុបខាងកើតងើបពីការត្រួតត្រារបស់សហភាពសូវៀត និងនាំឱ្យមានការបញ្ចប់នូវការប្រឈមមុខដាក់គ្នាខាងអាវុធនុយក្លេអ៊ែរជាច្រើនរវាងលោកខាងលិច និងលោកខាងកើត ឬក្រុមប្រទេសប្រជាធិបតេយ្យ និងក្រុមប្រទេសកុម្មុយនីស្ត។
គេនៅចាំបានថា ការធ្លាក់ពីអំណាចរបស់លោក Gorbachev ជារឿងរ៉ាវប្រវត្តិសាស្ត្រដែលការពិត លោក Gorbachev ត្រូវបានធ្វើរដ្ឋប្រហារដោយក្រុមភ្នាក់ងារប៉ូលិស KGB ដែលក្នុងនោះមានលោក ពូទីន ជាប្រធានាធិបតីរុស្ស៊ីបច្ចុប្បន្ននេះ។ ក្រុម KGB បានឃុំខ្លួនលោក Gorbachev ខណៈលោកនៅលំហែកាយនៅតំបន់គ្រីមៀរ។
ការដណ្តើមអំណាចយកពីលោក Gorbachev បានគឺតាមរយៈការព្យាយាមធ្វើរដ្ឋប្រហារនៅខែសីហា ឆ្នាំ១៩៩១ ហើយប៉ុន្មានខែចុងក្រោយនៃការកាន់តំណែងរបស់លោក គឺលោក Gorbachev ត្រូវឈរមើលសាធារណរដ្ឋនានាដែលធ្លាប់ចំណុះសហភាពសូវៀត ប្រកាសឯករាជ្យម្តងមួយៗរហូតលោកបានលាលែងពីតំណែងកាលពីថ្ងៃទី២៥ ខែធ្នូ ឆ្នាំ១៩៩១ គឺពេលនោះហើយដែលសហភាពសូវៀត ក៏ត្រូវបានផ្ដួលរំលំដោយក្រុមលោក បូរិស យ៉េលស៊ីន សម្រេចបង្កើតរបបសាធារណរដ្ឋសហព័ន្ធរុស្ស៊ី មកទល់នឹងសព្វថ្ងៃនេះ។
ប្រធានាធិបតីដំបូងគេរបស់សហព័ន្ធរុស្ស៊ី គឺលោក បូរិស យ៉េលស៊ីន។ សម្រាប់លោក ពូទីន គឺលោកបានឡើងកាន់អំណាចបន្តពីលោក យ៉េលស៊ីន។
២៥ឆ្នាំក្រោយការដួលរលំរបស់សហភាពសូវៀត លោក Gorbachev បានថ្លែងប្រាប់ទីភ្នាក់ងារព័ត៌មាន AP ថា លោកសម្រេចមិនប្រើកងកម្លាំងទ័ពដើម្បីព្យាយាមរក្សាដែនដីសហភាពសូវៀត កុំឱ្យបែកបាក់ តែលោកថាលោកខ្លាចមានចលាចលកើតឡើងនៅក្នុងប្រទេសរបស់លោក។
លោក Gorbachev បានទទួលពានរង្វាន់ណូបែលសន្តិភាពកាលពីឆ្នាំ១៩៩០ ចំពោះតួនាទីរបស់លោកក្នុងការបញ្ចប់សង្គ្រាមត្រជាក់៕