ប្រធានរាជបណ្ឌិត្យសភាកម្ពុជា បណ្ឌិត សុខ ទូច ត្អូញត្អែរថា ក្រុមការងារឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹប បន្តការល្បាត និងបានរកឃើញការកាប់បំផ្លាញដើមឈើធំៗចំនួន ៨ទីតាំងដែលបង្កឡើងដោយពលរដ្ឋដែលរស់នៅក្នុងតំបន់ក្បែរនោះ។
ប្រធានរាជបណ្ឌិត្យសភាកម្ពុជា បណ្ឌិត សុខ ទូច បានសរសេរលើគណនីហ្វេសប៊ុករបស់លោកកាលពីថ្ងៃទី៥ ខែសីហា ឆ្នាំ២០២២ ថា ក្រុមការងារឧទ្យានរាជបណ្ឌិត្យសភាកម្ពុជាពិតជាថ្លែងអំណរគុណដល់អាជ្ញាធរពាក់ព័ន្ធដែលតែងជួយសហការ និងសម្របសម្រួលការងារជាមួយក្រុមការងាររាជបណ្ឌិត្យសភាកម្ពុជាកន្លងមក ក៏ប៉ុន្តែនៅមិនទាន់មានប្រសិទ្ធភាពនៅឡើយទេ។
បណ្ឌិត សុខ ទូច លើកឡើងថា ក្រោយការតាមដានយ៉ាងយកចិត្តទុកដាក់របស់ក្រុមការងារ បានកំណត់មុខសញ្ញាអ្នកដែលបានចូលកាប់ឈើក្នុងឧទ្យានតេជោសែនឫស្សីត្រឹប ថាសុទ្ធសឹងតែជាអ្នកដែលមកតាំងទីលំនៅថ្មីក្រោយព្រះរាជ្យក្រឹត្យដាក់ឧទ្យានរាជបណ្ឌិត្យសភាកម្ពុជាជាតំបន់អភិរក្សក្នុងឆ្នាំ២០១៤ កន្លងទៅ។
លោកអះអាងថា កន្លងមកក្រុមការងាររបស់លោកបានប្រមូលវត្ថុតាងជាច្រើន ដូចជាអាវុធកែច្នៃ និងឈើដែលបានអារច្រៀករួចជាច្រើនដែលបានរក្សាទុកនៅតាមផ្ទះពលរដ្ឋទាំងនោះផងដែរ។
ប្រធានរាជបណ្ឌិត្យសភាកម្ពុជារូបនេះបញ្ជក់ថា ដើម្បីបញ្ឈប់ការកាប់បំផ្លាញព្រៃឈើក្នុងឧទ្យានតេជោសែនឫស្សីត្រឹប រាជបណ្ឌិត្យសភាកម្ពុជាបានរៀបចំទីតាំងថ្មីសម្រាប់ពលរដ្ឋទាំងនោះឱ្យទៅរស់នៅទីតាំងថ្មីដែលមានទំហំទទឹង ៣០ម៉ែត្រ និងបណ្តោយ ៥០ម៉ែត្រនៅជិតសាលារៀន វត្តអារាម និងមានអណ្ដូងទឹកសម្រាប់ប្រើប្រាស់ផងដែរ។ ជាងនេះទៀត ក៏បានអនុញ្ញាតឱ្យពួកគាត់អាចអាស្រ័យផលនៅក្នុងឧទ្យានរាជបណ្ឌិត្យសភាកម្ពុជាបានជាធម្មតា ប៉ុន្តែពួកគាត់មួយចំនួនធំនៅតែបន្តរស់នៅក្នុងដែនឧទ្យានរាជបណ្ឌិត្យសភាកម្ពុជាដដែល។
ឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹប ត្រូវបានបង្កើតឡើង និងទទួលស្គាល់ដោយព្រះរាជក្រឹត្យកាលពីថ្ងៃទី០៨ ខែមេសា ឆ្នាំ២០១៤ ដែលមានផ្ទៃដីជាង ១១៤,៣៥គីឡូម៉ែត្រក្រឡា ស្ថិតក្នុងភូមិសាស្ត្រឃុំឆែបខាងកើត និងឃុំឆែបខាងលិច ស្រុកឆែប ខេត្តព្រះវិហារ។
កាលពីចុងឆ្នាំ២០២០ បន្ទាប់ពីមានការស្នើពីរាជបណ្ឌិត្យសភាកម្ពុជា អាជ្ញាធរខេត្តព្រះវិហារ បានសម្រេចផ្តល់ដីទំហំ ១០ហិកតារដល់ពលរដ្ឋចំនួន ៣១គ្រួសារ ដើម្បីតាំងទីលំនៅថ្មីជាថ្នូរនឹងការរើលំនៅឋានចេញពីតំបន់ឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹប ដើម្បីកុំឱ្យពួកគាត់បន្តកាប់បំផ្លាញព្រៃឈើក្នុងឧទ្យាននេះទៀត ព្រោះថាកន្លងមកនេះ ពួកគាត់បានកាប់ឈើក្នុងតំបន់នេះធ្វើអាជីវកម្មយ៉ាងអនាធិបតេយ្យ។
ទាក់ទិននឹងបញ្ហានេះ ក្រុមអ្នកឃ្លាំមើលសង្គមលើកឡើងថា បទល្មើសព្រៃឈើខេត្តព្រះវិហារ បានក្លាយទៅជាជំងឺមហារីកព្យាបាលមិនជាទៅហើយ ដែលកំពុងកើតមានគ្រប់តំបន់អភិរក្ស ដូចជាតំបន់អភិរក្សសត្វព្រៃព្រៃឡង់ និងតំបន់អភិរក្សព្រៃព្រះរការ ជាដើម ដែលសុទ្ធតែទទួលរងនូវការកាប់បំផ្លាញព្រៃឈើយ៉ាងធ្ងន់ធ្ងរ ក្នុងនោះក៏មានអាជ្ញាធរដែលដើរតួនាទីជាឈ្មួញរកស៊ីឈើខុសច្បាប់ថែមទៀត។
សកម្មជនការពារព្រៃឈើ លោក ហេង ស្រស់ ធ្លាប់បានអះអាងកាលពីពេលថ្មីៗនេះថា រូបលោកមានទាំងឯកសារ និងភស្តុតាងច្រើនណាស់អំពីការកាប់បំផ្លាញព្រៃឈើខុសច្បាប់នៅតំបន់អភិរក្សក្នុងខេត្តព្រះវិហារ ប៉ុន្តែរដ្ឋាភិបាលមិនដែលយកចិត្តទុកដាក់ពិនិត្យមើលរបាយការណ៍ទាំងនេះឡើយ ដូច្នេះហើយទើបបទល្មើសទាំងនេះកើតឡើងកាន់តែច្រើនឡើងៗបែបនេះ។
កាលពីថ្ងៃទី៣១ ខែមីនា ឆ្នាំ២០២១ អង្គការឃ្លាំមើលព្រៃឈើពិភពលោក បានចេញរបាយការណ៍របស់ខ្លួនស្ដីពីឧក្រិដ្ឋកម្មព្រៃឈើនៅកម្ពុជាថា ទោះបីកម្ពុជាមានច្បាប់ការពារព្រៃឈើក៏ដោយ ក៏កម្ពុជាទទួលរងនូវការកាប់បំផ្លាញព្រៃឈើខ្ពស់បំផុតចាប់តាំងពីទសវត្សរ៍ ឆ្នាំ១៩៧០ មក៕