មន្ត្រីជាន់ខ្ពស់រដ្ឋាភិបាលកម្ពុជា ថាប៉ូលិសចរាចរណ៍ផ្លូវគោកខ្លះបានយកភារកិច្ច និងតួនាទីបម្រើប្រជាពលរដ្ឋធ្វើជាមុខរបរស្របច្បាប់នៅលើដងផ្លូវ ព្រោះតែពួកគេទទួល ៧០% ពីលុយដែលផាកពិន័យ ដូច្នេះទើបពួកគេខំប្រឹងផាកពិន័យរហូតពេលខ្លះប្រព្រឹត្តខុសច្បាប់ និងក្រមសីលធម៌វិជ្ជាជីវៈ។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា លើកឡើងកាលពីថ្ងៃទី១៨ កុម្ភៈ នេះថា ការអនុវត្តច្បាប់ចរាចរណ៍ផ្លូវគោកលើដងផ្លូវស្ទើរតែក្លាយទៅជាមុខរបរស្របច្បាប់សម្រាប់កងកម្លាំងនគរបាលមួយចំនួនទៅហើយ ព្រោះតែពួកគេទទួលបានលុយយ៉ាងច្រើនពីការអនុវត្តសកម្មភាពនេះ។
បណ្ឌិត គិន ភា លើកឡើងថា លុយដែលពួកគេផាកពិន័យបានពីប្រជាពលរដ្ឋត្រូវបានបែងចែកទៅឱ្យប៉ូលិសអនុវត្តច្បាប់នៅនឹងកន្លែង ៧០% ដែលជាលុយសុទ្ធ និងបែងចែកទៅឱ្យនាយកដ្ឋានចរាចរណ៍ផ្លូវគោក និងសណ្ដាប់ធ្នាប់ ១៦%។ ជាងនេះទៀត ត្រូវបែងចែកទៅឱ្យការិយាល័យចរាចរណ៍ផ្លូវគោកនៃស្នងការនគរបាលរាជធានីខេត្ត ៩% និងត្រូវបែងចែកទៅតាមស្រុក-ខណ្ឌចំនួន ៥% ផងដែរ។
មន្ត្រីរដ្ឋាភិបាលរូបនេះបញ្ជាក់ថា បើពួកគេទទួលបានភាគរយច្រើន ហើយជាលុយសុទ្ធបែបនេះ តើនរណាដែលថាមិនខំប្រឹងនោះ។
កាលពីយប់ថ្ងៃទី១៧ ខែកុម្ភៈ ឆ្នាំ២០២៥ ករណីប៉ះទង្គិចដោយហិង្សាមួយបានកើតឡើងរវាងប្រធានរាជបណ្ឌិត្យសភាកម្ពុជា បណ្ឌិត សុខ ទូច ជាមួយនឹងកម្លាំងប៉ូលិសចរាចរណ៍ផ្លូវគោកស្ថិតលើផ្លូវហាណូយ ខណ្ឌសែនសុខ រាជធានីភ្នំពេញ បន្ទាប់ពីកម្លាំងសមត្ថកិច្ចតម្រូវឱ្យបណ្ឌិត សុខ ទូច វាស់កម្រិតជាតិអាល់កុលអំឡុងបើកបរ។
ជុំវិញករណីនេះ បណ្ឌិត សុខ ទូច សរសេរលើគណនីហ្វេសប៊ុករបស់ខ្លួនកាលពីថ្ងៃទី១៧ កុម្ភៈ ថា ពិតមែនតែលោកបានទទួលទានស្រាបៀរអស់ ១កំប៉ុង ប៉ុន្តែលោកបានសហការជាមួយសមត្ថកិច្ចអនុវត្តច្បាប់ដោយផ្លុំឧបករណ៍វាស់កម្រិតជាតិអាល់កុលចំនួន ៣ដង តែមិនឃើញកម្រិតជាតិអាល់កុលតាមការចង់បានរបស់ប៉ូលិសឡើយ។
បណ្ឌិត សុខ ទូច អះអាងថា ចំណុចដែលបណ្តាលឱ្យមានទំនាស់ គឺពេលលោកបានស្នើសុំទុយោថ្មីដើម្បីផ្លុំវាស់កម្រិតជាតិអាល់កុល ព្រោះលោកខ្លាចឆ្លងរោគពីអ្នកផ្លុំមុនៗ ស្រាប់តែសមត្ថកិច្ចប្រើសម្ដីប្រមាថមាក់ងាយលើរូបលោក ដោយប្រើពាក្យមិនសមរម្យទៅវិញ ហើយដោយសារតែបែបនេះ លោកក៏បានផ្ទុះកំហឹងដើរចាកចេញពីទីនោះតែម្តង។
ជុំវិញបញ្ហានេះ អ្នកលេងបណ្ដាញសង្គមហ្វេសប៊ុកបាននាំគ្នារិះគន់មន្ត្រីប៉ូលិសចរាចរណ៍ទាំងនោះព្រោងព្រាត ជាក់ស្តែង ម្ចាស់គណនីហ្វេសប៊ុកឈ្មោះ យូ សារ៉ាវុឌ្ឍន៍ លើកឡើងចំឈ្មោះមន្ត្រីនគរបាលដែលបានប្រើសម្ដីប្រមាថបណ្ឌិត សុខ ទូច ថាមន្ត្រីនគរបាលខណ្ឌសែនសុខ ឈ្មោះ ហឿង វឿន គឺជាអធិការរងទទួលផែនការងារចរាចរណ៍ផ្លូវគោក ដែលបានប្រើភាសាគ្មានក្រមសីលធម៌លើបណ្ឌិត សុខ ទូច។
យ៉ាងណាមិញ មេដឹកនាំបក្សកាន់អំណាច លោក ហ៊ុន សែន លើកឡើងនៅថ្ងៃទី១៩ កុម្ភៈ នេះថា ករណីបណ្ឌិត សុខ ទូច ជាមួយនគរបាលចរាចរណ៍បានក្លាយជាអាជីវកម្មដោយមិនដឹងខ្លួន ហើយរឿងនេះគ្មានអ្នកណាចំណេញនោះឡើយ តែផ្ទុយទៅវិញគឺខាតទាំងអស់គ្នា។
ជុំវិញបញ្ហានេះ ប្រជាពលរដ្ឋដែលធ្លាប់រងគ្រោះពីការចាប់ផាកពិន័យពីមន្ត្រីនគរបាលចំណុចផ្លូវហាណូយ ខណ្ឌសែនសុខ នេះ ទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១៩ កុម្ភៈ នេះថា មន្ត្រីនគរបាលនៅទីតាំងនោះមានអត្តចរិតកាចសាហាវ ហើយបើមើលតាមឫកពាររបស់ពួកគេ សមតែពួកចាប់ជំរិត មិនសមជាមន្ត្រីប៉ូលិសទេ។
បើការអះអាងពីបណ្ឌិត គិន ភា ជាការពិត នោះមានន័យថា ថ្នាក់លើអនុញ្ញាតឲ្យប៉ូលិសយកភាគរយជំនួសប្រាក់ខែ ហើយបើរកបានច្រើន ចែកទៅថ្នាក់លើផង។ គេអាចហៅថាវិធីនេះជាល្បិចជំរិតទារប្រាក់ស្របច្បាប់៕
© 2025, ឌឹ ខេមបូឌា ដេលី. All rights reserved.