25 C
Phnom Penh

ពលរដ្ឋ​ខេត្ត​កោះកុង​ស្នើ​លោក ហ៊ុន សែន និង​ស្ថាប័ន​ពាក់ព័ន្ធ​ជួយ​ដោះស្រាយ​វិវាទ​ដីធ្លី​ជាមួយ​ឧកញ៉ា​និង​ក្រុមហ៊ុន

ដោយ ឌឹ ខេមបូឌា ដេលី

បទវិភាគ

អ្នក​មាន​ជម្លោះ​ដីធ្លី​ពី​ខេត្ត​កោះកុង​រាប់​រយ​នាក់ បាន​នាំគ្នា​ឡើង​មក​ប្រមូលផ្ដុំ​នៅ​មុខ​ក្រសួង​ស្ថាប័ន​ពាក់ព័ន្ធ និង​ខុទ្ទកាល័យ​របស់​បុរស​ខ្លាំង លោក ហ៊ុន សែន ដើម្បី​ជំរុញ​ឲ្យ​មាន​ដំណោះស្រាយ​វិវាទ​ដីធ្លី និង​ទម្លាក់​ចោល​បទ​ចោទប្រកាន់ ព្រមទាំង​ដោះលែង​តំណាង​ពួកគេ​ឲ្យ​មាន​សេរីភាព​វិញ។

តំណាង​ពលរដ្ឋ​រងគ្រោះ​ដីធ្លី​ស្រុក​ស្រែអំបិល ខេត្ត​កោះកុង អ្នកស្រី ផាវ ញ៉ើង លើកឡើង​ថា ពួកគាត់​ឡើង​មក​ភ្នំពេញ​ជា​ថ្មី​ទៀត​ក្រោយពី​ក្រសួង និង​ស្ថាប័ន​ពាក់ព័ន្ធ​មិន​ដោះស្រាយ​វិវាទ​ដីធ្លី​ឲ្យ​ពួកគាត់។ ក្រៅពី​ស្វែងរក​ដំណោះស្រាយ​ហើយ លោកស្រី​ថា​ពួកគេ​ស្នើសុំ​ឲ្យ​ក្រសួង​យុត្តិធម៌ ក្រសួង​មហាផ្ទៃ និង​ខុទ្ទកាល័យ​លោក ហ៊ុន សែន ជួយ​អន្តរាគមន៍​ដោយ​ជំរុញ​ទៅ​តុលាការ​ឲ្យ​ទម្លាក់​បទ​ចោទប្រកាន់​លើ​ពលរដ្ឋ​ចំនួន ៣២​នាក់​ដែល​កំពុង​រងគ្រោះ​ដីធ្លី។ ក្នុង​ចំណោម​ពលរដ្ឋ​ទាំង ៣២​នាក់ ក៏​មាន​លោកស្រី​ម្នាក់​ដែរ ដោយ​រង​បទ​ចោទប្រកាន់​ពី​បទ «ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម និង​បរិហារកេរ្តិ៍» ដែល​ក្រុមហ៊ុន និង​លោក ហេង ហ៊ុយ ប្ដឹង​ក្រោយពី​ពួកគាត់​បាន​នាំគ្នា​ចេញ​តវ៉ា​ទាមទារ​ដំណោះស្រាយ​វិវាទ​ដីធ្លី។

ពលរដ្ឋ​ម្នាក់​ទៀត​ក៏​បាន​លើកឡើង​ដែរ​ថា ពួកគាត់​មាន​ជម្លោះ​ដីធ្លី​ជាមួយ​លោក ហេង ហ៊ុយ ដែល​ជា​មន្ត្រី​នគរបាល​ពាក់​ផ្កាយ​២ តាំងពី​ឆ្នាំ​២០០៧ មក​ម៉្លេះ ហើយ​រហូត​ដល់​ពេលនេះ មិនទាន់​មាន​ដំណោះស្រាយ​នៅឡើយ។ លោកស្រី​ថា លោក ហេង ហ៊ុយ បាន​រំលោភ​យក​ដីធ្លី​ពួកគាត់​ហើយ ថែមទាំង​ប្ដឹង​រូប​គាត់ និង​តំណាង​សរុប​ចំនួន ៩​នាក់​ទៅ​តុលាការ​ខេត្ត​កោះកុង ទៀត។

លោកស្រី​ចាត់ទុក​ការ​ចោទប្រកាន់ និង​ការ​កាត់ទោស​ឲ្យ​លោកស្រី​ជាប់​ពន្ធនាគារ ២​ឆ្នាំ និង​ពិន័យ​ជា​ប្រាក់ ២​លាន​រៀល ដោយ​គ្រាន់តែ​ទាមទារ​ឲ្យ​មាន​ដំណោះស្រាយ​រឿង​ដីធ្លី​នេះ ថា​ជា​រឿង​អយុត្តិធម៌។ លោកស្រី​បញ្ជាក់​ថា ពួកគាត់​ឡើង​មក​ភ្នំពេញ ដើម្បី​សុំ​កិច្ច​អន្តរាគមន៍​ពី​ក្រសួង​យុត្តិធម៌ ក្រសួង​មហាផ្ទៃ និង​ខុទ្ទកាល័យ​លោក ហ៊ុន សែន ចំនួន ២​ដង​រួច​មក​ហើយ នៅតែ​មិន​មាន​ដំណោះស្រាយ ទើប​ពួកគាត់​នាំគ្នា​មក​ជា​ថ្មី​ទៀត ខណៈ​វិវាទ​ដីធ្លី​នេះ​បាន​អូស​បន្លាយ​ជាង ១០​ឆ្នាំ​ហើយ​នោះ។

មន្ត្រី​សម្របសម្រួល​សហគមន៍​នៅ​សមាគម​សម្ព័ន្ធ​សហគមន៍​កសិករ​កម្ពុជា​ប្រចាំ​ខេត្ត​កោះកុង និង​ខេត្ត​កំពង់ស្ពឺ លោក ញ៉ិល ភាព ដែល​តាម​ឃ្លាំមើល​រឿង​នេះ លើកឡើង​ថា អាជ្ញាធរ​គួរតែ​ធ្វើការ​សម្របសម្រួល​ដោយ​ជួយ​រក​ដំណោះស្រាយ​វិវាទ​ដីធ្លី​ជូន​ពលរដ្ឋ ជាជាង​រារាំង និង​ប្រើប្រាស់​ប្រព័ន្ធ​តុលាការ​ដើម្បី​ចាប់​ខ្លួន និង​ចោទប្រកាន់​លើ​ពលរដ្ឋ​ដែល​កំពុង​រងគ្រោះ។

លោក​ចាត់ទុក​ការ​រារាំង​ពលរដ្ឋ​រងគ្រោះ​ថា​ជា​ការ​បំបិទ​សិទ្ធិ​សេរីភាព​ការ​ជួប​ប្រជុំ និង​សម្ដែង​មតិ​ផ្ទុយ​ពី​រដ្ឋធម្មនុញ្ញ និង​ច្បាប់​អន្តរជាតិ ដែល​ជំរុញ​ឲ្យ​ដំណើរការ​ប្រជាធិបតេយ្យ​ដើរ​ថយក្រោយ។ លោក​បន្ត​ថា ប្រសិនបើ​រដ្ឋាភិបាល ព្រមទាំង​ក្រសួង​ពាក់ព័ន្ធ​មិន​ដោះស្រាយ​បញ្ហា​ដីធ្លី​ជូន​ពលរដ្ឋ​ទេ លោក​ថា​ពលរដ្ឋ​នៅតែ​នាំគ្នា​បន្ត​ទាមទារ​ទៀត ហើយ​វិវាទ​នេះ​នឹង​មិន​ចប់​ឡើយ។

លោក ញ៉ិល ភាព ជំរុញ​ឲ្យ​រដ្ឋាភិបាល​ពន្លឿន​ការ​ដោះស្រាយ​ជូន​ពលរដ្ឋ ដើម្បី​បញ្ចប់​វិវាទ​ដីធ្លី​ដែល​បាន​អូស​បន្លាយ​រាប់​ឆ្នាំ និង​កុំ​ឲ្យ​ពលរដ្ឋ​ឡើង​មក​តវ៉ា​បន្ត​ទៀត។

បើ​តាម​របាយការណ៍​របស់​សមាគម​ការពារ​សិទ្ធិមនុស្ស​អាដហុក ចេញ​កាលពី​ថ្ងៃទី​៨ ខែ​កុម្ភៈ ឆ្នាំ​២០២២ បាន​រក​ឃើញ​ថា ក្នុង​ឆ្នាំ​២០២១ ពលរដ្ឋ​ចំនួន​ជិត ២​ម៉ឺន​គ្រួសារ (១៧០៣៣​គ្រួសារ) បាន​រង​ផល​ប៉ះពាល់​ដោយសារ​វិវាទ​ដីធ្លី​ដែល​មាន​ទំហំ​ជាង ៥​ម៉ឺន​ហិកតារ (៥២៦០១,៨៧​ហិកតារ)។

អាដហុក​ឱ្យ​ដឹង​ទៀត​ថា មាន​ពលរដ្ឋ​រងគ្រោះ​ដីធ្លី​ចំនួន ១៥៧​នាក់​កំពុង​ជាប់​បណ្ដឹង​អាជ្ញា និង​ដាក់​ឱ្យ​ស្ថិត​ក្រោម​ការ​ត្រួតពិនិត្យ​ពី​តុលាការ ខណៈ​ជនរងគ្រោះ ១៧​នាក់​ទៀត​កំពុង​ត្រូវ​ឃុំ​ខ្លួន​បណ្ដោះអាសន្ន​ក្នុង​ពន្ធនាគារ​ដោយសារ​ការ​តវ៉ា​ទាមទារ​ដីធ្លី​របស់​ខ្លួន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស