25 C
Phnom Penh

លោក កឹម សុខា ថា​លោក​ទទួល​រង​នូវ​ភាព​អយុត្តិធម៌​៥​ឆ្នាំ​ដោយសារ​តុលាការ​កម្ពុជា

ដោយ ឌឹ ខេមបូឌា ដេលី

បទវិភាគ

មេដឹកនាំ​បក្ស​ប្រឆាំង​ដែល​មិន​ទាន់​មាន​សេរីភាព​ពេញលេញ​ឡើងវិញ លោក កឹម សុខា អះអាង​ថា លោក​ទទួល​រង​នូវ​ភាព​អយុត្តិធម៌​អស់​រយៈពេល ៥​ឆ្នាំ បន្ទាប់ពី​តុលាការ​បាន​ចោទប្រកាន់ និង​ចាប់​ខ្លួន​លោក​យក​ទៅ​ឃុំ​ទុក​ក្នុង​ពន្ធនាគារ​ត្រពាំងផ្លុង ក្នុង​ខេត្ត​ត្បូងឃ្មុំ កាលពី​ឆ្នាំ​២០១៧ កន្លងទៅ។

ប្រធាន​គណបក្ស​សង្គ្រោះ​ជាតិ​ដែល​កំពុង​រង​នូវ​ការ​រឹតត្បិត​សេរីភាព លោក កឹម សុខា បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃទី​៧ ខែ​កញ្ញា ឆ្នាំ​២០២២ នេះ​ថា លោក​សូម​ថ្លែង​អំណរគុណ​ដល់​ពលរដ្ឋ​ខ្មែរ​ទាំង​ក្នុង និង​ក្រៅ​ប្រទេស រួម​ទាំង​សហគមន៍​អន្តរជាតិ​ដែល​តែងតែ​តាមដាន និង​ទាមទារ​នូវ​សិទ្ធិ​សេរីភាព​ឲ្យ​រូបលោក​ដែល​ទទួល​រង​នូវ​ភាព​អយុត្តិធម៌​អស់​រយៈពេល​ជាង ៥​ឆ្នាំ​កន្លងមក។

មេដឹកនាំ​បក្ស​ប្រឆាំង​ដែល​កំពុង​តស៊ូ​ដើម្បី​សេរីភាព និង​លទ្ធិប្រជាធិបតេយ្យ លោក កឹម សុខា បាន​កោត​សរសើរ​ដល់​សហ​មេធាវី​ការពារ​ក្តី​របស់​លោក និង​ពលរដ្ឋ​ខ្មែរ​ដែល​តែងតែ​ជួយ​ការពារ លើក​ទឹកចិត្ត និង​ផ្តល់​យុត្តិធម៌​ដល់​លោក ដោយ​បាន​ចូលរួម​ផ្ទាល់​ក្នុង​តុលាការ និង​តាមដាន​នៅ​ខាង​មុខ​តុលាការ ជាដើម បើ​ទោះបីជា​សវនាការ​លើ​សំណុំរឿង​របស់​លោក​ត្រូវ​បាន​អូស​បន្លាយ​រយៈពេល​អស់​ចំនួន ៥៥​លើក​ហើយក៏​ដោយ។

លោក កឹម សុខា បញ្ជាក់​ថា បើ​ទោះបីជា​មិន​ទាន់​មាន​សេរីភាព​ពេញលេញ​ក៏ដោយ ប៉ុន្តែ​ក្នុង​នាម​រូបលោក​ជា​អ្នក​មាន​ជំនឿ​លើ​ព្រះពុទ្ធសាសនា មាន​ព្រហ្មវិហារ​ធម៌ ប្រកាន់​យក​នូវ​គោលការណ៍​អហិង្សា និង​ក្នុង​នាម​ជា​អ្នក​គោរព​ប្រពៃណី​ទំនៀមទម្លាប់​ជាតិ​ខ្មែរ​ដែល​តែងតែ​ធ្វើ​អំពើ​ជា​កុសល ស្គាល់​បុណ្យ និង​បាប កតញ្ញូ​ចំពោះ​មាតុភូមិ​កម្ពុជា បុព្វការីជន ញាតិសន្តាន លោក​នឹង​ទៅ​ចូលរួម​ប្រារព្ធ​ពិធី​បុណ្យ​កាន់បិណ្ឌ និង​ភ្ជុំបិណ្ឌ​ជាមួយ​ពលរដ្ឋ​ខ្មែរ​នៅ​តាម​វត្ត​អារាម​នា​ពេល​ឆាប់ៗ​ខាងមុខ​នេះ។

លោក​ថា ការ​សម្រេច​ដោយ​អគតិ គឺជា​អំពើ​បាប។

ការ​អះអាង​នេះ ធ្វើឡើង​ដើម្បី​ថ្លែង​អំណរគុណ​ដល់​ពលរដ្ឋ​ខ្មែរ​ដែល​តែងតែ​យកចិត្ត​ទុកដាក់ និង​ចង់​បាន​សិទ្ធិ​សេរីភាព​ជូន​រូបលោក ស្រប​ពេល​ដែល​លោក​កំពុង​រង​នូវ​ភាព​អយុត្តិធម៌​សព្វថ្ងៃ​នេះ។

កាលពី​ដើម​ខែ​កញ្ញា ឆ្នាំ​២០១៧ អាជ្ញាធរ​របស់​រដ្ឋាភិបាល​លោក ហ៊ុន សែន បាន​សម្រុក​ចូល​ចាប់​ខ្លួន​លោក កឹម សុខា ទាំង​កណ្ដាល​អាធ្រាត្រ​ដល់​គេហដ្ឋាន​របស់​លោក ក្នុង​ពេល​ដែល​លោក​កំពុង​មាន​អភ័យ​ឯកសិទ្ធិ​សភា​នៅឡើយ ក្រោម​បទ​ចោទប្រកាន់​ថា​លោក​ត្រូវរ៉ូវ​គ្នា​ជាមួយ​សហរដ្ឋ​អាមេរិក ដើម្បី​ផ្ដួល​រំលំ​រដ្ឋាភិបាល​កម្ពុជា ប៉ុន្តែ​អស់​រយៈពេល ៥​ឆ្នាំ​មក​នេះ តុលាការ​មិន​ដែល​បាន​បង្ហាញ​ភស្តុតាង​ណា​មួយ​ស្រប​តាម​ច្បាប់​ថា​លោក កឹម សុខា ពិត​ជា​បាន​ឃុបឃិត​ជាមួយ​រដ្ឋ​បរទេស​ដូច​ការ​ចោទប្រកាន់​របស់​ខ្លួន​នោះ​ឡើយ។

ជាង​នេះ​ទៀត តុលាការ​កម្ពុជា​ក៏​មិន​ដែល​ហៅ​រដ្ឋ​បរទេស​ដែល​ខ្លួន​បាន​ចោទប្រកាន់​ថា​បាន​ឃុបឃិត​ជាមួយ​លោក កឹម សុខា មក​បំភ្លឺ​ក្នុង​សវនាការ​របស់​ខ្លួន​ដែរ ប៉ុន្តែ​តុលាការ​តែង​ប្រើ​សំណួរ​ផ្សេងៗ​ចោទ​សួរ​លោក កឹម សុខា រាល់​ពេល​បើក​សវនាការ​ម្តងៗ ជាពិសេស​ទាក់ទង​នឹង​ការ​ធ្វើ​បាតុកម្ម​កាលពី​ឆ្នាំ​២០១៣ កន្លងទៅ ដែល​គេ​មើល​ឃើញ​តុលាការ​កំពុង​មាន​ចេតនា​អូស​បន្លាយ​សវនាការ​នេះ ជាជាង​ការ​ស្វែងរក​យុត្តិធម៌​តាម​ផ្លូវច្បាប់។

បើ​ទោះបីជា​អស់​រយៈពេល ៥​ឆ្នាំ​នៃ​ការ​រឹតត្បិត​សេរីភាព​លោក កឹម សុខា ដោយ​មិន​ទាន់​អាច​កាត់ទោស​លោក​ពី​បទល្មើស​ណា​មួយ​ក៏ដោយ ប៉ុន្តែ​កាលពី​ថ្ងៃទី​១៦ ខែ​វិច្ឆិកា ឆ្នាំ​២០១៧ តុលាការ​ក្រុង​ភ្នំពេញ​បាន​ប្រកាស​រំលាយ​គណបក្ស​សង្គ្រោះ​ជាតិ និង​ដកហូត​យក​អាសនៈ​តំណាងរាស្ត្រ​របស់​បក្ស​នេះ​ទាំងអស់ ព្រមទាំង​យក​អាសនៈ​សមាជិក​ក្រុមប្រឹក្សា​ឃុំ-សង្កាត់​ទាំង​ជាង ៥​ពាន់​នាក់​ទៅ​បែងចែក​ឱ្យ​គណបក្ស​ផ្សេង​ថែម​ទៀត ទាំង​ដែល​ខ្លួន​មិនទាន់​បាន​កាត់ទោស​មេដឹកនាំ​បក្ស​របស់​ពួកគេ​ពី​បទ​ឃុបឃិត​ជាមួយ​រដ្ឋ​បរទេស​ណា​មួយ​នៅឡើយ​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស