រុស្ស៊ី គឺជាមហាអំណាចយោធាលំដាប់ទី២ នៃពិភពលោក បន្ទាប់ពីសហរដ្ឋអាមេរិក។ ប្រទេសដ៏ធំនេះមានកងទ័ពសកម្មដល់ ៩០ម៉ឺននាក់ មានរថក្រោះ ២៩២៧គ្រឿង យន្តហោះចម្បាំង ១៨៤៦គ្រឿង និងឧទ្ធម្ភាគចក្រ ៨៣២គ្រឿង។
ចំណែកអ៊ុយក្រែនវិញមានកងទ័ពសកម្មចំនួន ២០ម៉ឺននាក់ មានរថក្រោះ ៨៥៨គ្រឿង មានយន្តហោះចម្បាំង ១៨៧គ្រឿង និងឧទ្ធម្ភាគចក្រ ៤៦គ្រឿង។ តាមការបង្ហាញតួលេខនៃកម្លាំងទ័ព និងសព្វាវុធនេះ គឺអ៊ុយក្រែនមិនអាចប្រៀបធៀបនឹងរុស្ស៊ីបានឡើយ។
បើយោងតាមតារាងប្រៀបធៀបរបស់គេហទំព័រ Global Fire Arm ឲ្យដឹងថា រុស្ស៊ីជាមហាអំណាចយោធាលំដាប់ទី២ នៃពិភពលោក ហើយអ៊ុយក្រែនលំដាប់ទី២១ ក្នុងចំណោម ១៤២ប្រទេសដែលមានកងទ័ពរាប់ពី ១០ម៉ឺននាក់ឡើងទៅ។
បច្ចុប្បន្ន រុស្ស៊ីមានទ័ពសរុបជាង ១លាន ៣សែននាក់ ហើយអ៊ុយក្រែនមាន ៥០ម៉ឺននាក់។ នៅថ្ងៃទី២៤ ខែកុម្ភៈ រុស្ស៊ីបានលើកទ័ពចូលលុកលុយប្រទេសអ៊ុយក្រែន ចំនួន ២០ម៉ឺននាក់ គឺស្មើនឹងទ័ពសកម្មរបស់អ៊ុយក្រែន។ រុស្ស៊ីប្រកាសថានឹងប្រើពេលវេលានៃសង្គ្រាមតែ ៧២ម៉ោង ឬយ៉ាងយូរមួយសប្ដាហ៍ នឹងវាយផ្ដួលរំលំរដ្ឋាភិបាលលោកប្រធានាធិបតី វូឡូឌីមៀ ហ្សេឡេនស្គី ដោយវាយកាន់កាប់រដ្ឋធានីគៀវ បានទាំងស្រុង។
ប៉ុន្តែផ្ទុយទៅវិញ រុស្ស៊ីដែលនៅក្រោមការដឹកនាំរបស់បុរសខ្លាំង លោក វ៉្លាឌីមៀរ ពូទីន បានកំពុងធ្វើសង្គ្រាមឈ្លានពានអ៊ុយក្រែនចំនួន ២០១ថ្ងៃមកហើយ បើគិតត្រឹមថ្ងៃទី១២ ខែកញ្ញា។ រយៈពេល ២០១ថ្ងៃនេះ រុស្ស៊ីមិនត្រឹមលើកទ័ពវាយកាន់កាប់រដ្ឋធានីគៀវ មិនបាននោះទេ គឺថែមទាំងត្រូវបានទ័ពអ៊ុយក្រែនវាយបាក់ទ័ពរហូតរត់ប្រាសអាយុទៀតផង។
ក្រសួងការពារជាតិអង់គ្លេស រកឃើញរុស្ស៊ីបាក់ទ័ពដ៏អាម៉ាស់ និងធ្ងន់ធ្ងរ គឺមាន ២លើកមកហើយ។
នៅដើមខែមេសា រុស្ស៊ីបាក់ទ័ពព្រោះតែត្រូវបានកងទ័ពអ៊ុយក្រែនវាយបករុញច្រានយ៉ាងខ្លាំង រត់ចោលរថក្រោះជាច្រើនគ្រឿង ខណៈរថក្រោះរាប់សិបគ្រឿងត្រូវបានបាញ់កម្ទេចនៅពេលទ័ពរុស្ស៊ីស្ថិតក្នុងភាពទាល់ច្រក ពុំអាចរុលចូលទីក្រុងគៀវ ក្នុងការប៉ុនប៉ងផ្ដួលរំលំរដ្ឋាភិបាលលោក ហ្សេឡេនស្គី។ នេះជារឿងដែលមហាអំណាចយោធាមួយនេះជួបរឿងបរាជ័យក្នុងសង្គ្រាមឈ្លានពានរបស់ខ្លួនលើប្រទេសអ៊ុយក្រែន អំឡុង ៤០ថ្ងៃដំបូង។
ឥឡូវនេះ រុស្ស៊ីជួបរឿងបរាជ័យបាក់ទ័ពមួយលើកទៀតហើយ ដែលជាការបាក់ទ័ពទ្រង់ទ្រាយធំលើកទី២ នៅចំពេលដែលសង្គ្រាមបានឈានដល់រយៈពេល ២០០ថ្ងៃ។ ទ័ពរុស្ស៊ីត្រូវបានកងទ័ពអ៊ុយក្រែនវាយឱ្យរត់ចោលសព្វាវុធរបស់ខ្លួន ដោយបន្សល់ទុករថក្រោះ កាំភ្លើងធំ និងគ្រាប់រំសេវពាសពេញសមរភូមិនៅភាគឥសាននៃតំបន់ Khakive និងភាគខាងត្បូងនៅតំបន់ Kherson។
បើតាមបណ្ដាញផ្សាយព័ត៌មានរបស់អ៊ុយក្រែន ឲ្យដឹងថា មុននឹងរុស្ស៊ីបាក់ទ័ព គឺកងទ័ពរបស់ប្រទេសមហាអំណាចនេះស្លាប់ក្នុងមួយថ្ងៃពី ២០០ ទៅ ៣០០នាក់ ដោយការវាយបករបស់កងទ័ពអ៊ុយក្រែនលឿនដូចផ្លេកបន្ទោរ។ អ៊ុយក្រែនចាប់ផ្ដើមវាយសន្ធប់ពីថ្ងៃទី១ ខែកញ្ញា ដល់ថ្ងៃទី១១ ខែកញ្ញា ទៅលើទឹកដីដែលកងទ័ពរុស្ស៊ីវាយកាន់កាប់បានពីទ័ពអ៊ុយក្រែន។
អាវុធដែលធ្វើឲ្យរុស្ស៊ីបាក់ទ័ព គឺការវាយប្រហារដោយប្រព័ន្ធរ៉ុក្កែត Himars ជាអាវុធជំនួយរបស់សហរដ្ឋអាមេរិកអមដោយកាំភ្លើងធំ និងប្រព័ន្ធមីស៊ីលរបស់ពួកបស្ចិមប្រទេស។ នៅក្នុងការថ្លែងសារជាវីដេអូកាលពីល្ងាចថ្ងៃសៅរ៍ ទី១០ កញ្ញា លោក វូឡូឌីមៀ ហ្សេឡេនស្គី បានថ្លែងអបអរចំពោះជ័យជម្នះរបស់កងកម្លាំងអ៊ុយក្រែន ដែលបានប្រយុទ្ធដណ្តើមបានមកវិញនូវដែនដីកាន់តែច្រើនក្នុងរវាងប៉ុន្មានថ្ងៃមកនេះ។
បញ្ជាការកងទ័ពអ៊ុយក្រែននៅភាគខាងត្បូង ប្រកាសថា ក្នុងរយៈពេលប៉ុន្មានថ្ងៃចុងក្រោយនេះ ទ័ពអ៊ុយក្រែនបានដណ្តើមមកវិញនូវផ្ទៃដីទំហំជាង ៣ពាន់គីឡូម៉ែត្រការ៉េ។ ចំពោះដំណឹងដែលថារុស្ស៊ីបាក់ទ័ពនៅភាគឥសាន និងភាគខាងត្បូងប្រទេស ក៏ក្រសួងការពារជាតិរុស្ស៊ី ទទួលស្គាល់ដែរ។ ប៉ុន្តែក្រុងមូស្គូ អះអាងថា គឺជាការដកទ័ពដើម្បីមកប្រមូលផ្ដុំគ្នានៅក្នុងខេត្ត Donetsk នៅភាគខាងកើតប្រទេស ហើយមានផែនការវាយសន្ធប់យកខេត្តនេះឲ្យបាន។
មើលទៅ រុស្ស៊ីចង់ប្រាប់ទៅពិភពលោកថា ខ្លួនគេដកទ័ពនេះ គឺជាយុទ្ធសាស្ត្រ មិនមែនដកថយដោយបរាជ័យទេ។
តែយ៉ាងណាក៏ដោយ រូបភាពដែលត្រូវបានចែកចាយពីសមរភូមិ បានបង្ហាញឲ្យឃើញនូវសម្ភារៈយោធារបស់រុស្ស៊ី មានរថក្រោះ រថពាសដែក អាវុធ គ្រាប់កាំភ្លើងយ៉ាងច្រើនត្រូវឆេះខ្លោច ឬបោះបង់ចោល និងរថក្រោះខ្លះទៀតបរទៅទម្លាក់ចោលក្នុងទន្លេ ខណៈកងទ័ពរុស្ស៊ីបានរត់ភៀសខ្លួនយកតែប្រាសអាយុប៉ុណ្ណោះ។
តាមដំណឹងចុងក្រោយ គឺក្រោយពីបាក់ទ័ព រុស្ស៊ីបានបាញ់ផ្លោងគ្រាប់មីស៊ីល គ្រាប់កាំភ្លើងធំ និងការវាយប្រហារពីទ័ពអាកាសលើគោលដៅរបស់អ៊ុយក្រែន នៅតំបន់ Kharkiv ខណៈកងទ័ពអ៊ុយក្រែន កំពុងវាយសម្រុកកាន់តែលឿនទៅមុខនៅភាគខាងជើងនៃតំបន់មួយនេះដែលជាប់នឹងព្រំដែនរុស្ស៊ី។ នេះបើយោងតាមសារព័ត៌មាន TASS របស់រុស្ស៊ី ដែលបានចុះផ្សាយនៅថ្ងៃចន្ទ ទី១២ កញ្ញា។
អគ្គមេបញ្ជាការកងទ័ពអ៊ុយក្រែន ឧត្តមសេនីយ៍ Valeriy Zaluzhnyi បានឱ្យដឹងថា ទ័ពអ៊ុយក្រែនបានវាយរុលជិតដល់ព្រំដែនរុស្ស៊ីហើយ គឺនៅសល់តែ ៥០គីឡូម៉ែត្រទៀតតែប៉ុណ្ណោះ៕