រដ្ឋាភិបាលសហរដ្ឋអាមេរិក បានសម្រេចផ្តល់ជំនួយជាអគារ និងម៉ាស៊ីនផលិតអុកស៊ីសែនថ្មីមួយមានទីតាំងនៅក្នុងខេត្តព្រះវិហារ នៃប្រទេសកម្ពុជា ដែលនឹងផ្តល់អត្ថប្រយោជន៍ដល់ពលរដ្ឋជិត ៣សែននាក់។
រោងចក្រនេះមានទីតាំងនៅមន្ទីរពេទ្យបង្អែកខេត្ត ១៦ មករា និងជាមូលនិធិរបស់ទីភ្នាក់ងារសហរដ្ឋអាមេរិកដើម្បីការអភិវឌ្ឍអន្តរជាតិ (USAID) ហើយត្រូវបានសាងសង់ក្នុងភាពជាដៃគូជាមួយអង្គការយូនីសេហ្វ (UNICEF) និងក្រសួងសុខាភិបាលកម្ពុជា។
ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា លោក W. Patrick Murphy មានប្រសាសន៍ថា៖ «ម៉ាស៊ីននេះនឹងបំពេញតម្រូវការផលិតអុកស៊ីសែនសម្រាប់សេវាសំខាន់ៗ ដូចជាការព្យាបាលអ្នកជំងឺ COVID-19 ការតាមដាន និងការព្យាបាលជំងឺសង្គ្រោះបន្ទាន់»។
លោកបន្តថា វាជាផ្នែកមួយក្នុងទឹកប្រាក់ជាង ១៦លានដុល្លារនៅក្នុងការគាំទ្ររបស់រដ្ឋាភិបាលសហរដ្ឋអាមេរិក ដើម្បីឆ្លើយតបទៅនឹងជំងឺរាតត្បាតនៅកម្ពុជា និងជាការបង្ហាញអំពីចំណងទាក់ទងដ៏រឹងមាំនៃប្រទេសទាំងពីរផងដែរ។
ពិធីសម្ពោធដាក់ឱ្យប្រើប្រាស់ជាផ្លូវការនូវអគារ និងម៉ាស៊ីនផលិតអុកស៊ីសែននេះ ជាទីតាំងដំបូងគេនៅក្នុងខេត្ត ហើយមន្ទីរពេទ្យបង្អែកខេត្ត ១៦ មករា បានបម្រើដល់ស្រុកចំនួន៧ ដែលមានពលរដ្ឋប្រមាណ ២សែន ៨ម៉ឺន ៤ពាន់នាក់។ បន្ថែមពីលើការផ្តល់ការគាំទ្រយ៉ាងសំខាន់សម្រាប់ការថែទាំអ្នកជំងឺ COVID-19 ការផ្គត់ផ្គង់អុកស៊ីសែនដែលអាចជឿទុកចិត្ត នឹងផ្តល់អត្ថប្រយោជន៍យ៉ាងច្រើនដល់សហគមន៍ដែលពឹងផ្អែកលើសេវាព្យាបាលរបស់មន្ទីរពេទ្យ។
អ្នកស្រី Foroogh Foyouzat តំណាងអង្គការយូនីសេហ្វប្រចាំនៅកម្ពុជា បាននិយាយថា អុកស៊ីសែនអាចធ្វើឱ្យមានភាពខុសគ្នារវាងជីវិត និងសេចក្តីស្លាប់។ អ្នកស្រីបន្តថា នេះជាមូលហេតុដែលអង្គការយូនីសេហ្វកំពុងធ្វើការជាមួយរាជរដ្ឋាភិបាលកម្ពុជា ដើម្បីកែលំអការផ្គត់ផ្គង់អុកស៊ីសែន និងហេដ្ឋារចនាសម្ព័ន្ធ ទន្ទឹមនឹងការកសាងសមត្ថភាពបុគ្គលិកសុខាភិបាលក្នុងការប្រើប្រាស់ឧបករណ៍ទាំងនេះថែមទៀត។
អ្នកស្រី Foroogh Foyouzat សូមថ្លែងអំណរគុណយ៉ាងជ្រាលជ្រៅចំពោះសហរដ្ឋអាមេរិក និងជាពិសេសទីភ្នាក់ងារ USAID សម្រាប់ជំនួយម៉ាស៊ីនផលិតអុកស៊ីសែនថ្មីសម្រាប់សង្គ្រោះជីវិតនេះ ដែលនឹងជួយលើកកម្ពស់សុខភាពថ្ងៃនេះ និងបង្កើតភាពធន់ចំពោះបញ្ហាប្រឈមនៅថ្ងៃអនាគត។
ម៉ាស៊ីនផលិតអុកស៊ីសែនជាម៉ាស៊ីនដែលអាចផលិតអុកស៊ីសែនចំនួន ៣០០លីត្រក្នុងមួយនាទី (LPM) ជាមួយនឹងស្ថានីយផ្ទុកដែលមានបំពង់ស៊ីឡាំង និងតភ្ជាប់ទៅបំពង់អុកស៊ីសែនរបស់មន្ទីរពេទ្យ។
ជាលទ្ធផល គម្រោងនេះនឹងជួយមន្ទីរពេទ្យឈប់ទិញបំពង់អុកស៊ីសែនពីអ្នកផ្គត់ផ្គង់ឯកជនបញ្ជូនបំពង់អុកស៊ីសែនរបស់ខ្លួនទៅកាន់ទីតាំងឆ្ងាយៗសម្រាប់បំពេញឡើងវិញឡើយ។ ដូច្នេះ វានឹងជួយសន្សំសំចៃពេលវេលា ថវិកា និងកាត់បន្ថយការប្រឈមនឹងកង្វះអុកស៊ីសែនដែលបង្កគ្រោះថ្នាក់ដល់ការព្យាបាលអ្នកជំងឺ៕