32 C
Phnom Penh

GDP បន្ត​បង្កើន​សហការ​គណបក្ស​បី​បន្ថែម​ទៀត​មុន​ការ​ចូលរួម​បោះឆ្នោត​ជាតិ​ឆ្នាំ​២០២៣

ដោយ ឌឹ ខេមបូឌា ដេលី

បទវិភាគ

គណបក្ស​ប្រជាធិបតេយ្យ​មូលដ្ឋាន (GDP) សម្រេច​ដាក់​ផែនការ​បង្កើន​ការ​សហការ​គ្នា​រវាង​គណបក្ស​ក្រៅ​រដ្ឋាភិបាល​ឱ្យ​បាន ៣​គណបក្ស​បន្ថែម​ទៀត ដើម្បី​ឲ្យ​គ្រប់​ចំនួន ៧​គណបក្ស មុន​ការ​ចូលរួម​បោះឆ្នោត​ជាតិ​នៅ​ឆ្នាំ​២០២៣ ខាងមុខ​នេះ។

ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​ប្រាប់​សារព័ត៌មាន The Cambodia Daily នៅ​ថ្ងៃទី​១៩ កញ្ញា នេះ​ថា ក្រុម​របស់​លោក​នឹង​សម្របសម្រួល​ឲ្យ​មាន​ការ​សហការ​គ្នា​ឲ្យ​បាន​គណបក្ស​ចំនួន​៧ ឆ្ពោះ​ទៅ​រក​គោលដៅ​តែ​មួយ ក្រោម​គោលការណ៍​ចែក​មណ្ឌល​គ្នា​ដើម្បី​ប្រមូល​សំឡេង​ឆ្នោត​ដែល​ពលរដ្ឋ​ម្ចាស់​ឆ្នោត​ធ្លាប់​គាំទ្រ​ខ្លួន ប៉ុន្តែ​ត្រូវ​បាន​គេ​បោះបង់​ចោល​ដោយសារតែ​សំឡេង​មិន​គ្រប់​ចំនួន​ក្នុង​ការ​ទទួល​បាន​អាសនៈ​ក្នុង​រដ្ឋសភា សម្រាប់​ធ្វើ​ជា​តំណាង​របស់​ពលរដ្ឋ​នា​ពេល​កន្លងមក។

លោក​បន្ត​ថា ការ​បង្កើត​សម្ព័ន្ធភាព​រវាង​គណបក្ស​ក្រៅ​រដ្ឋាភិបាល​នឹង​គ្មាន​ប្រយោជន៍​ទេ ប្រសិនបើ​ការ​រួបរួម​គ្នា​នេះ​គ្រាន់តែ​ដើម្បី​ស្វែងរក​កៅអី​ខ្លះ​ក្នុង​រដ្ឋសភា ដើម្បី​កំដរ​បក្ស​កាន់​អំណាច​ឲ្យ​គេ​ធ្វើ​អ្វីៗ​ស្រេច​តែ​នឹង​ចិត្ត​ដូច​ដែល​បាន​ឃើញ​នា​ពេល​កន្លងមក ប៉ុន្តែ​ការ​ចង​សម្ព័ន្ធ​រវាង​បក្ស​ក្រៅ​រដ្ឋាភិបាល​នៅ​ពេលនេះ មាន​គោលបំណង​តែ​មួយ​គត់ គឺ​ដើម្បី​លើកស្ទួយ​លទ្ធិប្រជាធិបតេយ្យ​នៅ​កម្ពុជា​ឱ្យ​ល្អ​ប្រសើរ​ប៉ុណ្ណោះ។

បណ្ឌិត យ៉ង សាំងកុមារ អះអាង​ថា ការ​ធ្វើ​នយោបាយ​មិនមែន​គ្រាន់តែ​ប្រកួតប្រជែង​ទៅ​យក​កៅអី​នៅ​ក្នុង​រដ្ឋសភា​ប៉ុណ្ណោះ​ទេ ប៉ុន្តែ​គោលដៅ​ពិតប្រាកដ គឺ​ដើម្បី​លើកស្ទួយ​សិទ្ធិមនុស្ស ជំរុញ​ឲ្យ​មាន​ការ​បើក​លំហ​ប្រជាធិបតេយ្យ​សម្រាប់​ពលរដ្ឋ​ម្ចាស់​ឆ្នោត និង​មេដឹកនាំ​បក្ស​ក្រៅ​រដ្ឋាភិបាល​ទាំងអស់ ដើម្បី​ឱ្យ​ពួកគេ​អាច​ចូលរួម​កសាង​សង្គម​ជាតិ​ដោយ​គ្មាន​ការ​ភ័យខ្លាច និង​ដើម្បី​កុំ​ឲ្យ​គណបក្ស​ណា​មួយ​សម្រេច​វាសនា​ប្រទេស​កម្ពុជា​ដោយ​ឯក​បក្ស​ទៅ​ថ្ងៃ​មុខ​បន្ត​ទៀត។

ការ​អះអាង​នេះ ធ្វើឡើង​បន្ទាប់ពី​គណបក្ស​ចំនួន​៤ បាន​សម្រេច​សហការ​ចង​សម្ព័ន្ធ​ជាមួយ​គ្នា ដើម្បី​ចូលរួម​ប្រកួតប្រជែង​ជាមួយ​គណបក្ស​កាន់​អំណាច​ក្នុង​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ។

ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ បាន​ប្រាប់​សារព័ត៌មាន The Cambodia Daily នៅ​ថ្ងៃទី​១៩ កញ្ញា នេះ​ថា ការ​លើកឡើង​របស់​បណ្ឌិត យ៉ង សាំងកុមារ គឺជា​រឿង​ត្រឹមត្រូវ ប៉ុន្តែ​គណបក្ស​ដែល​មាន​សំឡេង​ច្រើន​ជាងគេ ដូចជា​គណបក្ស​ភ្លើង​ទៀន ជាដើម មិន​ដឹង​ថា​តើ​ពួកគេ​នឹង​យល់ស្រប​នូវ​ការ​អនុវត្ត​ផែនការ​របស់​គណបក្ស​ប្រជាធិបតេយ្យ​មូលដ្ឋាន ដែល​មាន​សំឡេង​តិច​ជាង​ខ្លួន ឬ​ក៏​អត់​នោះ​ទេ។

បណ្ឌិត សេក សុជាតិ លើកឡើង​ថា ការ​ចង​សម្ព័ន្ធ​ដើម្បី​លើកស្ទួយ​ប្រជាធិបតេយ្យ គឺ​ជា​គោលការណ៍​ល្អ ប៉ុន្តែ​ការ​សហការ​នេះ​ត្រូវតែ​ធានា​នូវ​ភាព​ឯករាជ្យ​លើ​តំណាង​គណបក្ស​ដែល​ដឹកនាំ​រក​ការ​ចង​សម្ព័ន្ធភាព​នេះ ចៀសវាង​មាន​អ្នក​បញ្ជា​ពីក្រោយ​ខ្នង​នៃ​គណបក្ស​ណា​មួយ ដូចជា​គណបក្ស​ភ្លើង​ទៀន ដែល​គេ​សង្ស័យ​ថា​មាន​អ្នក​បញ្ជា​ពី​ក្រៅ​ស្រុក ដែល​ជា​មូលហេតុ​នាំ​ឲ្យ​សម្ព័ន្ធភាព​នេះ​មិន​អាច​បន្ត​ដំណើរ​ទៅ​មុខ​បាន​យូរ​អង្វែង។

លោក​បញ្ជក់​ថា គណបក្ស​ប្រជាធិបតេយ្យ​មូលដ្ឋាន​មាន​ចក្ខុវិស័យ​វែង​ឆ្ងាយ គិត​ដល់​អនាគត​ប្រជាធិបតេយ្យ ប៉ុន្តែ​ប្រសិនបើ​ការ​ចង​សម្ព័ន្ធភាព​នេះ​ជួប​ជាមួយ​មេដឹកនាំ​នយោបាយ​ផ្សេង​ដែល​ចូលរួម​ក្នុង​ចលនា​នយោបាយ​គ្រាន់តែ​ដើម្បី​តំណែង​តួនាទី បុណ្យ​ស័ក្តិ លាភ​សក្ការៈ នោះ​សម្ព័ន្ធភាព​នេះ​អាច​នឹង​បែកបាក់​ទៅវិញ​នៅ​ថ្ងៃ​ណា​មួយ​ជាមិនខាន ព្រោះ​ថា​គណបក្ស​ដែល​ចូលរួម​ចង​សម្ព័ន្ធ​ជាមួយ​ខ្លួន​នេះ​ក៏​ធ្លាប់​មាន​ប្រវត្តិ​រត់​ចោល​ដៃគូ​របស់​ខ្លួន​ពី​មុន​មក​ដែរ។

កាលពី​ថ្ងៃទី​១១ ខែ​កក្កដា ឆ្នាំ​២០២២ គណបក្ស​ក្រៅ​រដ្ឋាភិបាល​ចំនួន​៤ រួម​មាន​គណបក្ស​ភ្លើង​ទៀន គណបក្ស​ឆន្ទៈ​ខ្មែរ គណបក្ស​កែទម្រង់​កម្ពុជា និង​គណបក្ស​ប្រជាធិបតេយ្យ​មូលដ្ឋាន បាន​ធ្វើ​សន្និសីទ​សារព័ត៌មាន​រួម​គ្នា​ដើម្បី​រួបរួម​ប្រមូល​កម្លាំង​អ្នក​ប្រជាធិបតេយ្យ​ចូលរួម​ការ​បោះឆ្នោត ដើម្បី​ប្រកួត​ប្រជែង​ជាមួយ​បក្ស​កាន់​អំណាច​ក្នុង​ឆ្នាំ​២០២៣ ខាងមុខ​នេះ ប៉ុន្តែ​នៅ​ពេល​នេះ សម្ព័ន្ធភាព​នេះ​កំពុង​ឆ្ពោះ​ទៅ​រក​ការ​រួបរួម​ជាមួយ​គណបក្ស​ដទៃ​ឱ្យ​កាន់តែ​ធំ​ជាង​ពេល​បច្ចុប្បន្ន​នេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស