លោក កឹម សុខា បង្ហាញការងឿងឆ្ងល់ដែលរដ្ឋាភិបាលបើកឲ្យបក្សភ្លើងទៀនធ្វើសកម្មភាពនយោបាយ បើទោះជាដឹងថាបក្សនេះមានលោក សម រង្ស៊ី នៅពីក្រោយ ហើយជាអ្នកដែលតែងតែវាយប្រហាររដ្ឋាភិបាលក៏ដោយ។
ការបង្ហាញការងឿងឆ្ងល់នេះ ក្រោយពីចៅក្រមជំនុំជម្រះលោក អឹម វណ្ណៈ បានយកសារលោក សម រង្ស៊ី ដែលបង្ហោះលើហ្វេសប៊ុកអំពាវនាវឲ្យពលរដ្ឋចូលរួមយុទ្ធនាការថ្ងៃចន្ទពណ៌ខ្មៅ និងអំពាវនាវឲ្យពលរដ្ឋងើបឡើងដើម្បីផ្ដួលរំលំ «ជនផ្ដាច់ការ» មកភ្ជាប់ជាមួយករណីរបស់លោក កឹម សុខា។
នៅខណៈមេធាវីរដ្ឋាភិបាលបើកការសួរដេញដោលទៅលើលោក កឹម សុខា ថាហេតុអ្វីលោក កឹម សុខា ទៅចាប់ដៃគូជាមួយលោក សម រង្ស៊ី នោះ។ សំណួររបស់មេធាវីរដ្ឋាភិបាលនេះធ្វើឡើងបន្ទាប់ពីមានការចាក់វីដេអូឃ្លីបករណីលោក សម រង្ស៊ី ថ្លែងនៅក្រៅប្រទេសឲ្យពលរដ្ឋ និងកម្លាំងប្រដាប់អាវុធងើបឡើងចូលជាមួយពលរដ្ឋ ដើម្បីផ្ដួលរំលំរដ្ឋាភិបាល។
ក្រោយពីមានការចោទសួរបែរនេះ លោក កឹម សុខា បានប្រាប់ទៅអង្គសវនាការដោយបង្ហាញការងឿងឆ្ងល់ដែលតុលាការចេះតែយកអ្វីដែលលោក សម រង្ស៊ី និយាយមកភ្ជាប់ជាមួយលោកម្ដងហើយម្ដងទៀត ទោះបីលោកអះអាងថាលោកមិនពាក់ព័ន្ធយ៉ាងណាក៏ដោយ។
លោកបញ្ជាក់ថា លោកមិនដែលអំពាវនាវឲ្យកងកម្លាំងបែរកាណុងទៅរដ្ឋាភិបាល និងចង់ផ្ដួលរំលំរដ្ឋាភិបាលឡើយ ហើយការប្រកាសឲ្យមានអំពើហិង្សា ក៏លោកមិនបានធ្វើនោះដែរ ព្រោះលោកជាមនុស្សអហិង្សា។
ចំពោះសំណួរមេធាវីរដ្ឋាភិបាលដែលថា «ហេតុអ្វីលោកទៅចាប់ដៃជាមួយលោក សម រង្ស៊ី នោះ?» លោក កឹម សុខា ឆ្លើយថា មិនមែនតែរូបលោកទេ សូម្បីលោក ហ៊ុន សែន ក៏បានទៅចាប់ដៃ និងបានទៅហូបបាយជាមួយលោក សម រង្ស៊ី ផងដែរ។
លោក កឹម សុខា ក៏បង្ហាញការងឿងឆ្ងល់នៅពេលដែលរដ្ឋាភិបាលបើកឲ្យបក្សភ្លើងទៀនធ្វើសកម្មភាពនយោបាយយ៉ាងគគ្រឹកគគ្រេង ទោះបីដឹងថាបក្សនេះមានលោក សម រង្ស៊ី នៅពីក្រោយយ៉ាងណាក៏ដោយ។ លោកបញ្ជាក់ថា រូបលោកប្រកាន់ខ្ជាប់នូវនយោបាយអហិង្សា ហើយថាលោកគ្មានបំណងណាមួយចង់ផ្ដួលរំលំរដ្ឋាភិបាល ហើយក៏គ្មានទេការធ្វើបដិវត្តន៍ពណ៌។ លោកបន្តថា គោលបំណងតែមួយគត់ គឺការប្រកួតប្រជែងគ្នាតាមរយៈការបោះឆ្នោតតែប៉ុណ្ណោះ។
ការអះអាងរបស់លោក កឹម សុខា ធ្វើឡើងស្របពេលដែលតុលាការបានព្យាយាមភ្ជាប់លោកទៅនឹងការធ្វើ «បដិវត្តន៍ពណ៌»។
ក្រោយពីបើកសវនាការពេញមួយព្រឹក ប្រធានក្រុមប្រឹក្សាជំនុំជម្រះ លោក កូយ សៅ ប្រកាសបន្តសវនាការលើលោក កឹម សុខា នៅថ្ងៃទី២៨ ខែកញ្ញា ខាងមុខទៀត៕