ប្រធានគណបក្សសង្គ្រោះជាតិដែលកំពុងតស៊ូដើម្បីសិទ្ធិមនុស្ស និងលទ្ធិប្រជាធិបតេយ្យ លោក កឹម សុខា បានថ្លែងទៅកាន់ពលរដ្ឋក្នុងពិធីកាន់បិណ្ឌវេនទី១២ វត្តសម្តេចពាន់ ស្រុកព្រៃកប្បាស ខេត្តតាកែវ នៅថ្ងៃទី២២ កញ្ញា នេះថា លោកមិនថ្លែងសារណាមួយពាក់ព័ន្ធនឹងនយោបាយនោះឡើយ គឺលោកអញ្ជើញទៅចូលរួមធ្វើបុណ្យតាមបែបព្រះពុទ្ធសាសនា និងសាកសួរសុខទុក្ខប្រជាពលរដ្ឋតែប៉ុណ្ណោះ។
លោក កឹម សុខា បានដឹកនាំសហការីរបស់ខ្លួនទៅចូលរួមពិធីវេនកាន់បិណ្ឌទី១២ នៅថ្ងៃទី២២ ខែកញ្ញា ឆ្នាំ២០២២ នៅវត្តសម្តេចពាន់ ស្រុកព្រៃកប្បាស ខេត្តតាកែវ ក្នុងនោះលោកបានលើកឡើងពីការធ្វើបុណ្យតាមបែបព្រះពុទ្ធសាសនា និងសាកសួរសុខទុក្ខពលរដ្ឋដែលអញ្ជើញទៅចូលរួមពិធីកាន់បិណ្ឌនៅពេលនោះតែប៉ុណ្ណោះ ប៉ុន្តែលោកមិនបានថ្លែងសារណាមួយពាក់ព័ន្ធនឹងនយោបាយនោះឡើយ។
ការចូលរួមក្នុងពិធីកាន់បិណ្ឌរបស់មេដឹកនាំបក្សប្រឆាំងនេះ គឺជាការធ្វើឡើងលើកទី៦ ហើយ ចាប់តាំងពីពិធីបុណ្យកាន់បិណ្ឌចាប់ផ្តើមពីថ្ងៃទី១១ ខែកញ្ញា មក។
កាលពីថ្ងៃទី១២ ខែកញ្ញា ឆ្នាំ២០២២ ប្រធានគណបក្សសង្គ្រោះជាតិ លោក កឹម សុខា ធ្លាប់បានអះអាងថា ការធ្វើបុណ្យ ធ្វើទានដែលកើតឡើងដោយសទ្ធាជ្រះថ្លា ចេតនាពិត គឺជាសីលធម៌របស់មនុស្ស ទោះបីមិនមានទ្រព្យធនច្រើន មិនមានអំណាច មិនមានសិទ្ធិពេញលេញ ឬទោះបីមានអ្នកដទៃបំភ្លៃបំផ្លើសចំពោះចេតនាសុចរិតរបស់លោកក៏ដោយ ឲ្យតែមានឱកាស មានលទ្ធភាពដែលអាចធ្វើបុណ្យ ធ្វើទាន សន្សំកុសលបាន គឺលោកត្រូវតែធ្វើ។
មេដឹកនាំបក្សប្រឆាំង លោក កឹម សុខា បញ្ជាក់ថា ក្នុងរដូវភ្ជុំបិណ្ឌឆ្នាំនេះ ក្រៅពីធ្វើបុណ្យជាមួយព្រះរស់ដែលជាអ្នកមានគុណ លោកនៅតែមានបំណងជាកុសលធម៌ទៅចូលរួមជួបជុំធ្វើបុណ្យកាន់បិណ្ឌ និងបុណ្យភ្ជុំបិណ្ឌជាមួយប្រជាពលរដ្ឋខ្មែរនៅតាមវត្តអារាមនានា ក្នុងចន្លោះថ្ងៃសវនាការរបស់លោកឲ្យបានយ៉ាងតិចប្រាំពីរវត្ត បើគ្មានការរំខានណាមួយទេនោះ។
ទោះបីប្រធានគណបក្សសង្គ្រោះជាតិ លោក កឹម សុខា ចូលរួមកម្មវិធីកាន់បិណ្ឌបាន ៦វត្តហើយក៏ដោយ ប៉ុន្តែរាល់ពេលដែលលោកចូលរួមគ្រប់កម្មវិធីទាំងអស់ ត្រូវបានគេតាមដាន និងលួចថតសកម្មភាពរបស់លោកជាប្រចាំពីសំណាក់ក្រុមអាជ្ញាធរដែលបន្លំខ្លួនស្លៀកពាក់ស៊ីវិល ដើម្បីឃ្លាំមើលសកម្មភាពរបស់លោក។
ជុំវិញបញ្ហានេះ សហមេធាវីការពារក្តីឱ្យលោក កឹម សុខា គឺលោក ចាន់ ចេន បានអះអាងថា កាលពីថ្ងៃទី១៨ ខែកញ្ញា ឆ្នាំ២០២២ ថា សិទ្ធិសេរីភាពក្នុងការដើរហើររបស់មេដឹកនាំបក្សប្រឆាំង លោក កឹម សុខា ត្រូវបានរដ្ឋាភិបាលរបស់លោក ហ៊ុន សែន រឹតត្បិតឱ្យរួមតូចចង្អៀតប្រៀបបាននឹងគូទម្ជុលដែលមិនអាចឱ្យលោកធ្វើអ្វីបាន សូម្បីតែចូលរួមក្នុងកម្មវិធីបុណ្យដែលជាប្រពៃណីជាតិរបស់ខ្លួន។
ទោះជាមានការគំរាមពីការចូលរួមធ្វើសកម្មភាពក្នុងពិធីសាសនា ឬការចូលរួមក្នុងកម្មវិធីប្រពៃណីពីសំណាងតុលាការកម្ពុជាក៏ដោយ ក៏លោក កឹម សុខា នៅតែបន្តសកម្មភាពចូលរួមក្នុងពិធីសាសនាជាបន្តបន្ទាប់ ជាពិសេសក្នុងពិធីកាន់បិណ្ឌដែលជាទំនៀមទម្លាប់ប្រពៃណីជាតិខ្មែរនៅពេលនេះ៕