សមត្ថកិច្ចខេត្តព្រះសីហនុ កំពុងស្វែងរកជនជាតិចិនចំនួន ៨នាក់ទៀតដែលបានបាត់ខ្លួនដោយសារលិចទូកកាលពីថ្ងៃទី២២ ខែកញ្ញា ឆ្នាំ២០២២ ខណៈជនជាតិ ៣នាក់បានស្លាប់ក្នុងចំណោម ៤១នាក់។
ករណីលិចទូកចំនួន ០១គ្រឿងកាលពីថ្ងៃទី២២ ខែកញ្ញា ឆ្នាំ២០២២ ស្ថិតនៅចន្លោះពយសារឿង និងកោះតាង ក្នុងភូមិសាស្ត្រខេត្តព្រះសីហនុ ដែលមានផ្ទុកមនុស្សចំនួន ៤១នាក់។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ បានសរសេរនៅលើហ្វេសប៊ុកនាថ្ងៃសៅរ៍ ទី២៤ កញ្ញា ថា គិតត្រឹមថ្ងៃទី២៤ ខែកញ្ញា នេះ សមត្ថកិច្ចបានរកឃើញមនុស្សចំនួន ៣៣នាក់ហើយ ក្នុងនោះស្លាប់ ៣នាក់ ខណៈជនជាតិចិន ៨ទៀត ក្រុមការងារជួយសង្គ្រោះកំពុងរុករក។
យ៉ាងណាក៏ដោយ ជនជាតិចិនទាំង ៤១នាក់ដែលលិចទូកក្នុងដែនសមុទ្រកម្ពុជានោះ ទំនងជាពួកគេចាញ់បោកមេខ្យល់នាំមកកម្ពុជាដោយខុសច្បាប់ ខណៈជនអន្តោប្រវេសន៍បរទេស ជាពិសេសជនជាតិចិនដែលចាញ់បោកមេខ្យល់នាំមកកម្ពុជា តែងតែប្រព្រឹត្តអំពើខុសច្បាប់មួយចំនួន ដូចជាអំពើបង្ខាំងមនុស្ស ការធ្វើទារុណកម្មមនុស្សដោយខុសច្បាប់ បទល្មើសសញ្ចរកម្ម និងការជួញដូរមនុស្ស ជាដើម៕