28 C
Phnom Penh

សាកសព​ជនជាតិ​ចិន​៨​នាក់​អណ្ដែត​ដល់​កោះត្រល់​បន្ទាប់​ពី​លិច​ទូក​ក្នុង​ខេត្ត​ព្រះសីហនុ

ដោយ ឌឹ ខេមបូឌា ដេលី

បទវិភាគ

សមត្ថកិច្ច​អះអាង​ថា ប្រតិបត្តិការ​ស្វែងរក​ជនជាតិ​ចិន ដែល​បាន​បាត់​ខ្លួន​ក្នុង​ហេតុការណ៍​លិច​ទូក​នៅ​កោះតាង ខេត្ត​ព្រះសីហនុ កាលពី​ថ្ងៃទី​២២ ខែ​កញ្ញា បាន​បញ្ចប់​ទាំងស្រុង​បន្ទាប់ពី​រក​ឃើញ​សាកសព ១១​នាក់ និង​សង្គ្រោះ​បាន ៣០​នាក់។

អ្នក​នាំពាក្យ​ខេត្ត​ព្រះសីហនុ លោក ឃាង ភារម្យ ឲ្យ​ដឹង​ថា សាកសព​ជនជាតិ​ចិន ៨​នាក់​ទៀត​ដែល​លិច​ទូក​នៅ​ខេត្ត​ព្រះសីហនុ កាលពី​ថ្ងៃទី​២២ ខែ​កញ្ញា នោះ បាន​អណ្ដែត​ដល់​កោះត្រល់។ សាកសព​អ្នក​ទាំង ៨​នាក់​នោះ ត្រូវ​បាន​អាជ្ញាធរ​វៀតណាម​ប្រទះ​ឃើញ​អណ្ដែត​ដល់​សមុទ្រ​កោះត្រល់ កាលពី​ថ្ងៃទី​២៩ កញ្ញា។

យោង​តាម​របាយការណ៍​សមត្ថកិច្ច បាន​ឲ្យ​ដឹង​ថា ជន​រងគ្រោះ​ជា​ជនជាតិ​ចិន ចំនួន ៤១​នាក់ បាន​ជួប​ហេតុការណ៍​លិច​ទូក​ស្ថិត​នៅ​ចំណុច​ចន្លោះ​ពយសារឿង និង​កោះតាង ក្នុង​ភូមិសាស្ត្រ​ខេត្ត​ព្រះសីហនុ។ ក្រោយ​មក អាជ្ញាធរ​ខេត្ត​ព្រះសីហនុ ជួយ​សង្គ្រោះ​ជនរងគ្រោះ​បាន ២៤​នាក់ ក្នុង​នោះ​ស្លាប់ ៣​នាក់ ហើយ​ខាង​ភាគី​វៀតណាម​ជួយ​សង្គ្រោះ​បាន ៩​នាក់។ ដោយឡែក​ជនជាតិ​ចិន ៨​នាក់​ទៀត​ដែល​អាជ្ញាធរ​កំពុង​ស្វែងរក​នោះ ក៏​បាន​បាត់បង់​ជីវិត​ដែរ។

អ្នក​នាំពាក្យ​ខេត្ត​ព្រះសីហនុ បន្ថែម​ថា ជនជាតិ​ចិន​រងគ្រោះ​ចំនួន ២១​នាក់​ដែល​អាជ្ញាធរ​សង្គ្រោះ​បាន​នោះ បាន​ប្រគល់​ឱ្យ​ទៅ​ខាង​អគ្គកុងស៊ុល​នៃ​ស្ថានទូត​ចិន​ប្រចាំ​នៅ​កម្ពុជា ដើម្បី​ចាត់ចែង​បន្ត។ ដោយឡែក​ចំពោះ​សាកសព​ជនរងគ្រោះ ៣​នាក់​ដែល​បាន​ស្លាប់ ត្រូវ​បាន​បញ្ជូន​ទៅ​រក្សា​ទុក​នៅ​រាជធានី​ភ្នំពេញ ដើម្បី​រង់ចាំ​ក្រុម​គ្រួសារ​សព​មក​ទទួល។

របាយការណ៍​ដដែល​បង្ហាញ​ថា នៅ​ថ្ងៃទី​១១ ខែ​កញ្ញា ឆ្នាំ​២០២២ មាន​ជនជាតិ​ចិន​ចំនួន ៤១​នាក់ ស្រី ០៣​នាក់ បាន​ធ្វើ​ដំណើរ​ពី​ប្រទេស​ចិន មក​កម្ពុជា តាមរយៈ​កប៉ាល់ ០១​គ្រឿង។ រហូត​មក​ដល់​ថ្ងៃទី​១៧ ខែ​កញ្ញា ឆ្នាំ​២០២២ ពួកគេ​បាន​មក​ដល់​សមុទ្រ​អន្តរជាតិ ហើយ​ពួកគេ​ត្រូវ​បាន​ផ្ទេរ​ឲ្យ​ទៅ​ជិះ​ទូក​ឈើ​វិញ ដើម្បី​ឆ្លង​ចូល​មក​កម្ពុជា ដោយ​មាន​តៃកុង​ជា​ជនជាតិ​ខ្មែរ ០២​នាក់។ លុះ​ដល់​ថ្ងៃទី​២២ ខែ​កញ្ញា ឆ្នាំ​២០២២ ទូក​ឈើ​នោះ​ក៏​បាន​ជ្រាប​ទឹក​ចូល​ក្នុង​ទូក​រហូត​ដល់​ជិត​លិច​ទាំងស្រុង។ ពេល​នោះ​ក៏​មាន​ទូក​នេសាទ ០១​គ្រឿង​ប្រភេទ​ទូក​អូស​ពណ៌​បៃតង បាន​មក​យក​តៃកុង​ទូក ០២​នាក់​ដែល​ជា​ជនជាតិ​ខ្មែរ​ទៅ​បាត់ ទុក​តែ​ពួកគេ​នៅ​លើ​ទូក​ដែល​ជិត​លិច​នោះ​នៅ​កណ្តាល​សមុទ្រ។

រហូត​មក​ដល់​វេលា​ម៉ោង​ប្រមាណ ១១ ថ្ងៃ​ដដែល ទូក​នោះ​ក៏​បាន​លិច​ចូល​សមុទ្រ ហើយ​រំពេច​នោះ​ក៏​មាន​អូប័រ​របស់​នគរបាល​ការពារ​ព្រំដែន​ទឹក ១​គ្រឿង បាន​ទៅ​ជួយ​ស្រង់​យក​មនុស្ស​បាន​ចំនួន ១៨​នាក់​បញ្ជូន​មក​ទីស្នាក់ការ​នគរបាល​ការពារ​ព្រំដែន​ទឹក (កោះ​ព្រាប)៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស