ប្រធានគណបក្សឆន្ទៈខ្មែរ លោក គង់ មុនីកា ត្រូវបានបានបញ្ចប់មុខតំណែងពីសមាសភាពឧត្ដមក្រុមប្រឹក្សាពិគ្រោះ និងផ្ដល់យោបល់ដែលមានឋានៈស្មើទេសរដ្ឋមន្ត្រី តាមសំណើរបស់បុរសខ្លាំង លោក ហ៊ុន សែន។
ការបញ្ចប់មុខតំណែងនេះ ធ្វើឡើងបន្ទាប់ពីលោក គង់ មុនីកា បានចូលរួមជីវិតនយោបាយជាមួយគណបក្សភ្លើងទៀន។
ព្រះរាជក្រឹត្យរបស់ព្រះករុណាព្រះបាទសម្តេច ព្រះបរមនាថ នរោត្តម សីហមុនី ចុះថ្ងៃទី៤ ខែតុលា ឆ្នាំ២០២២ បានត្រាស់បង្គាប់បញ្ចប់តំណែងលោក គង់ មុនីកា ពីសមាសភាពឧត្ដមក្រុមប្រឹក្សាពិគ្រោះ និងផ្តល់យោបល់ដែលមានឋានៈស្មើទេសរដ្ឋមន្ត្រី។
ក្រៅពីបញ្ចប់មុខតំណែងលោក គង់ មុនីកា ហើយ ព្រះមហាក្សត្រក៏បានបញ្ចប់មុខតំណែងលោក អ៊ី មុយលី ពីសមាសភាពឧត្ដមក្រុមប្រឹក្សាពិគ្រោះ និងផ្តល់យោបល់មានឋានៈស្មើរដ្ឋមន្ត្រី ព្រមទាំងលោក តុល ប្រាសាទ ពីមន្ត្រីតំណាងក្នុងលេខាធិការដ្ឋានឧត្ដមក្រុមប្រឹក្សាពិគ្រោះ និងផ្តល់យោបល់មានឋានៈស្មើអនុរដ្ឋលេខាធិការ។
ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានត្រាស់បង្គាប់បញ្ចប់មុខតំណែងសមាសភាពឧត្ដមក្រុមប្រឹក្សាពិគ្រោះ និងផ្តល់យោបល់ចំនួនបីនាក់ចាប់ពីថ្ងៃទី៥ ខែតុលា នេះ បានធ្វើឡើងបន្ទាប់ពីមានសំណើពីលោកនាយករដ្ឋមន្ត្រី ហ៊ុន សែន។
សំណើរបស់លោក ហ៊ុន សែន ដាក់ថ្វាយព្រះមហាក្សត្របញ្ចប់មុខតំណែងលោក គង់ មុនីកា បានធ្វើឡើងក្រោយពីប្រធានគណបក្សឆន្ទៈខ្មែររូបនេះបានប្រកាសកាលពីថ្ងៃទី៣ ខែតុលា ឆ្នាំ២០២២ ដោយសម្រេចដាក់បេក្ខជនឈរឈ្មោះជាមួយគណបក្សភ្លើងទៀន សម្រាប់ការបោះឆ្នោតឆ្នាំ២០២៣។
យ៉ាងណា ក្រោយពីគណបក្សឆន្ទៈខ្មែររួបរួមជាមួយនោះ នៅថ្ងៃទី៤ ខែតុលា គណបក្សភ្លើងទៀនបានចេញសេចក្តីប្រកាសព័ត៌មានមួយ ដោយបើកផ្លូវឱ្យមានការរួមកម្លាំងគ្នាពីអ្នកនយោបាយនៃគណបក្សឆន្ទៈខ្មែរ ហើយបក្សមួយនេះក៏បានសម្រេចតែងតាំងលោក គង់ គាំ ដែលជាឪពុករបស់លោក គង់ មុនីកា ជាឧត្តមទីប្រឹក្សានៃគណបក្សភ្លើងទៀនផងដែរ។
ឧត្ដមក្រុមប្រឹក្សាពិគ្រោះ និងផ្តល់យោបល់ ត្រូវបានបង្កើតឡើងកាលពីឆ្នាំ២០១៨ ក្រោយការបោះឆ្នោតអាណត្តិទី៦ ដែលមានសមាជិកមកពីគណបក្សចំនួន១៦ ដោយមានភារកិច្ចជាអ្នកប្រឹក្សាផ្តល់យោបល់ដល់រដ្ឋាភិបាល។
ប៉ុន្តែរយៈពេលចុងក្រោយនេះ ឧត្ដមក្រុមប្រឹក្សាពិគ្រោះ និងផ្តល់យោបល់ បានបញ្ចប់សមាសភាពសមាជិកចំនួន ២នាក់ ក្នុងនោះលោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក ពាក់ព័ន្ធនឹងបញ្ហាដីធ្លីក្នុងតំបន់ឧទ្យានជាតិខេត្តព្រះសីហនុ និងមួយករណីទៀត គឺលោក ចាន់ យ៉េត ប្រធានគណបក្សនគរប្រជាធិបតេយ្យ ទាក់ទងនឹងទំនាស់ដីធ្លីនៅខេត្តបន្ទាយមានជ័យ កាលពីថ្ងៃទី៩ ខែធ្នូ ឆ្នាំ២០២០។
រដ្ឋាភិបាលបានដាក់ចេញគោលការណ៍ ដោយសម្រេចយកថ្ងៃទី២៣ ខែកក្កដា ឆ្នាំ២០២៣ ជាការបោះឆ្នោតជ្រើសតាំងតំណាងរាស្ត្រសម្រាប់នីតិកាលទី៧៕