មេដឹកនាំបក្សកាន់អំណាច លោក ហ៊ុន សែន បង្ហើបថា មានខ្មែរមួយក្រុមកំពុងគប់គិតគ្នាជាមួយថៃ គ្រោងបង្កើតកម្លាំងវាយប្រហារកម្ពុជា ដូច្នេះបុគ្គលទាំងនោះកំពុងប្រព្រឹត្តអំពើក្បត់ជាតិ ហើយពួកគេក៏ជាគោលដៅនៃច្បាប់ដកសញ្ជាតិនេះដែរ។
លោក ហ៊ុន សែន លើកឡើងក្នុងកិច្ចប្រជុំពិនិត្យលើសេចក្ដីស្នើច្បាប់រដ្ឋធម្មនុញ្ញ ស្ដីពីវិសោធនកម្មមាត្រា៣៣ ពាក់ព័ន្ធនឹងការដកសញ្ជាតិខ្មែរ នៅថ្ងៃទី១៤ ខែកក្កដា ឆ្នាំ២០២៥ នេះថា ការបញ្ចេញមតិជំទាស់ជាមួយរាជរដ្ឋាភិបាល ឬអ្នកនយោបាយប្រឆាំងជាមួយនឹងបក្សកាន់អំណាច មិនមែនជាទោសក្បត់ជាតិដែលត្រូវបារម្ភរឿងច្បាប់ដកសញ្ជាតិនេះទេ។
លោក ហ៊ុន សែន លើកឡើងថា បុគ្គលដែលត្រូវយកច្បាប់ដកសញ្ជាតិមកប្រើដើម្បីដកសញ្ជាតិនោះ គឺជាអ្នកដែលប្រព្រឹត្តសកម្មភាពទាំងឡាយណាដែលគប់គិតជាមួយជនបរទេស ដើម្បីបំផ្លាញជាតិខ្មែរខ្លួនឯង ទើបជាគោលដៅនៃការដកសញ្ជាតិនេះ រីឯអ្នកដែលមិនបានប្រព្រឹត្តអំពើក្បត់ជាតិដោយគប់គិតជាមួយបរទេស មិនមានអ្វីត្រូវព្រួយបារម្ភចំពោះច្បាប់នេះឡើយ។
មេដឹកនាំបក្សកាន់អំណាចរូបនេះ បញ្ជាក់ថា គ្មានពលរដ្ឋខ្មែរណាម្នាក់ត្រូវបានដកសញ្ជាតិទេ ប្រសិនបើពួកគេមិនបានធ្វើអ្វីមួយដែលប្រឆាំង ឬក្បត់ផលប្រយោជន៍ជាតិសាសន៍របស់ខ្លួន ចំណែកពលរដ្ឋខ្មែរមួយចំនួនដែលខ្លាចគេដកសញ្ជាតិ កុំតែធ្វើអំពើក្បត់ជាតិទៅ គឺបានហើយ។
នៅថ្ងៃដដែលនេះដែរ លោក ហ៊ុន សែន ក៏បានគំរាមវាយខ្នោះសមាជិកព្រឹទ្ធសភាមកពីគណបក្សឆន្ទៈខ្មែរ ២រូប គឺលោក គង់ មុនីកា និងលោក សេង ម៉ារ៉ាឌី បន្ទាប់ពីសមាជិកព្រឹទ្ធសភាទាំងពីររូបនេះមិនលើកដៃគាំទ្រការអនុម័តសេចក្តីស្នើច្បាប់ស្ដីពីវិសោធនកម្មមាត្រា៣៣ នៃរដ្ឋធម្មនុញ្ញដើម្បីដកសញ្ជាតិខ្មែរពីកំណើត ដែលធ្វើឱ្យមានសំឡេងជំទាស់ចំនួន ២សំឡេងក្នុងចំណោមសមាជិកព្រឹទ្ធសភាដែលមានវត្តមានសរុបចំនួន ៦០រូប។
ជុំវិញបញ្ហានេះ ប្រធានគណបក្សឆន្ទៈខ្មែរ លោក គង់ មុនីកា បានប្រាប់សារព័ត៌មានក្នុងស្រុកនៅថ្ងៃទី១៤ កក្កដា នេះថា លោកមិនបានលើកដៃគាំទ្រការអនុម័តច្បាប់ដកសញ្ជាតិខ្មែរនេះទេ ប៉ុន្តែលោកក៏មិនមានការបារម្ភចំពោះការគំរាមកំហែងនឹងច្បាប់នេះដែរ ព្រោះលោកមិនមែនជាគោលដៅនៃការបង្កើតច្បាប់ដកសញ្ជាតិខ្មែរដែលត្រូវបានចោទពីបទ ក្បត់ជាតិ នោះឡើយ។
លោក គង់ មុនីកា បញ្ជាក់ថា លោកមិនដឹងថា តើលក្ខខណ្ឌអ្វីខ្លះ ឬកត្តាអ្វីខ្លះដែលអាចនាំឲ្យមានការវិនិច្ឆ័យថាជាជនក្បត់ជាតិ ឬគប់គិតជាមួយបរទេសនោះទេ ដូច្នេះគឺវាអាស្រ័យទៅលើការកំណត់និយមន័យឱ្យបានច្បាស់លាស់របស់ច្បាប់នេះប៉ុណ្ណោះ។
ជុំវិញការធ្វើវិសោធនកម្មច្បាប់ដកសញ្ជាតិពីពលរដ្ឋខ្មែរនាពេលនេះ ចលនាយុវជនសង្គ្រោះជាតិប្រចាំប្រទេសកូរ៉េខាងត្បូង ក៏កំពុងត្រៀមប្រមូលផ្ដុំធ្វើមហាបាតុកម្មប្រឆាំងនឹងច្បាប់ដកសញ្ជាតិខ្មែរពីកំណើតក្នុងទីក្រុងសេអ៊ូល ប្រទេសកូរ៉េខាងត្បូង នៅថ្ងៃទី២៧ ខែកក្កដា ឆ្នាំ២០២៥ នេះដែរ។
ក្រុមអ្នកសង្កេតការណ៍ចាត់ទុកច្បាប់ដកសញ្ជាតិខ្មែរពីកំណើត គឺជាការធ្វើសង្គ្រាមប្រឆាំងជាតិសាសន៍ខ្មែរខ្លួនឯង ដើម្បីផ្តល់សញ្ជាតិឱ្យជនជាតិវៀតណាមមានសិទ្ធិបោះឆ្នោតសម្រេចជោគវាសនាជំនួសខ្មែរម្ចាស់ស្រុក។
គេសង្កេតឃើញលោក ហ៊ុន សែន ខំប្រឹងពន្លឿនការអនុម័តច្បាប់ដកសញ្ជាតិខ្មែរពីកំណើតនាពេលនេះ ប៉ុន្តែរាប់ទសវត្សរ៍កន្លងមក រដ្ឋាភិបាលក្រោមការដឹកនាំរបស់គណបក្សប្រជាជនកម្ពុជា ក៏ខំប្រឹងផ្តល់សញ្ជាតិខ្មែរឲ្យជនបរទេសយ៉ាងច្រើនសន្ធឹកសន្ធាប់ដែរ ក្នុងនោះជនជាតិវៀតណាម ទទួលបានសញ្ជាតិខ្មែរច្រើនជាងគេ។ ជាក់ស្តែង កាលពីអំឡុងឆ្នាំ២០២២ ក្រសួងមហាផ្ទៃ បានចេញផ្សាយរបាយការណ៍ថា ចាប់តាំងពីឆ្នាំ១៩៩៩ ដល់ឆ្នាំ២០២២ ជនបរទេសដែលបានសុំចូលសញ្ជាតិខ្មែរតាមរយៈសញ្ជាតូបនីយកម្ម និងតាមរយៈនៃការបរិច្ចាគប្រាក់ដល់រដ្ឋាភិបាលកម្ពុជា គឺមានចំនួនសរុបដល់ជាង ២ពាន់នាក់ហើយ (២៥២៨នាក់) ដែលមកពីសញ្ជាតិដើមចំនួន ៥០ ខុសៗគ្នា៕
© 2025, ឌឹ ខេមបូឌា ដេលី. All rights reserved.