28 C
Phnom Penh

មន្ត្រី​សិទ្ធិមនុស្ស UN បារម្ភ​ពី​ការ​បោះឆ្នោត​នៅ​កម្ពុជា​នា​ពេល​ខាងមុខ​ដោយសារ​បរិយាកាស​នយោបាយ​មិន​ល្អ

ដោយ ឌឹ ខេមបូឌា ដេលី

បទវិភាគ

អ្នក​រាយការណ៍​ពិសេស​ទទួល​បន្ទុក​សិទ្ធិមនុស្ស​របស់​អង្គការ​សហប្រជាជាតិ​ប្រចាំ​កម្ពុជា បង្ហាញ​ការ​ព្រួយបារម្ភ​អំពី​ការ​បោះឆ្នោត​ជាតិ​នៅ​កម្ពុជា​នា​ពេល​ខាងមុខ​នេះ ដោយសារ​លំហ​សិទ្ធិមនុស្ស និង​សិទ្ធិ​នយោបាយ​នៅ​កម្ពុជា​កាន់តែ​រួម​តូច​ចាប់តាំងពី​រំលាយ​បក្ស​សង្គ្រោះ​ជាតិ​កាលពី​ឆ្នាំ​២០១៧។

អ្នក​រាយការណ៍​ពិសេស​ទទួល​បន្ទុក​សិទ្ធិមនុស្ស​របស់​អង្គការ​សហប្រជាជាតិ​ប្រចាំ​កម្ពុជា លោក វីទិត ម៉ុនតាប៊ន (Vitit Muntarbhorn) បាន​ថ្លែង​នៅ​ក្នុង​សម័យប្រជុំ​ក្រុមប្រឹក្សា​សិទ្ធិមនុស្ស​របស់​អង្គការ​សហប្រជាជាតិ​លើក​ទី​៥១ ដែល​ធ្វើឡើង​នៅ​ទីក្រុង​ហ្សឺណែវ ប្រទេស​ស្វីស កាលពី​ថ្ងៃទី​៥ តុលា ដោយ​បាន​រំលឹក​ពី​ការ​រំលាយ​គណបក្ស​ប្រឆាំង​ដោយ​អយុត្តិធម៌ ខណៈ​ការ​កាត់ទោស​ទ្រង់ទ្រាយ​ធំ​លើ​ក្រុម​បក្ស​ប្រឆាំង​ក៏​នៅតែ​បន្ត​ធ្វើ​នា​ពេល​បច្ចុប្បន្ន។

លោក វីទិត ម៉ុនតាប៊ន អះអាង​ថា ការ​បន្ត​កាត់ទោស​ទ្រង់ទ្រាយ​ធំ​នេះ បាន​និង​កំពុង​រារាំង​ដល់​ការ​ចូលរួម​ការ​បោះឆ្នោត​ជាតិ​នៅ​ឆ្នាំ​២០២៣ របស់​ពួកគេ ខណៈ​លំហ​សិទ្ធិមនុស្ស និង​សិទ្ធិ​នយោបាយ​នៅ​កម្ពុជា​កាន់តែ​រួម​តូច​ចាប់តាំងពី​តុលាការ​កំពូល​កម្ពុជា បាន​រំលាយ​គណបក្ស​សង្គ្រោះ​ជាតិ​កាលពី​ឆ្នាំ​២០១៧ ដែល​បាន​ធ្វើឡើង​ដោយ​អយុត្តិធម៌។

លោក​បញ្ជាក់​ថា ការ​រួម​តូច​លំហ​សិទ្ធិមនុស្ស និង​សិទ្ធិ​នយោបាយ​នេះ ជា​ក្ដី​បារម្ភ​សម្រាប់​ការ​បោះឆ្នោត​ជាតិ​ឆ្នាំ​២០២៣ ខាងមុខ ដែល​កត្តា​ទាំងអស់​នេះ​ជំរុញ​ឲ្យ​រដ្ឋាភិបាល​ដឹកនាំ​ដោយ​លោក ហ៊ុន សែន ទម្លាក់​ការ​ចោទប្រកាន់​នានា និង​បញ្ចប់​ការ​គំរាមកំហែង​លើ​ពលរដ្ឋ​ដែល​ប្រឆាំង​លើ​ការ​គ្រប់គ្រង​របស់​ពួកគេ។

តំណាង​កម្ពុជា​ប្រចាំ​នៅ​អង្គការ​សហប្រជាជាតិ លោក អាន សុខខឿន បាន​ចាត់ទុក​ការ​លើកឡើង​របស់​លោក វីទិត ម៉ុនតាប៊ន (Vitit Muntarbhorn) នោះ​ថា​ជា​ការ​យល់​ឃើញ​ផ្ទាល់ខ្លួន និង​ខ្វះ​ភស្តុតាង​ជាក់លាក់ ដែល​ធ្វើ​ឲ្យ​ប៉ះពាល់​ដល់​របាយការណ៍​រដ្ឋាភិបាល។

យ៉ាងណា ក្នុង​សម័យ​ប្រជុំ​ដែល​ធ្វើឡើង​នៅ​ទីក្រុង​ហ្សឺណែវ តំណាង​សហរដ្ឋ​អាមេរិក​ក៏​បាន​លើកឡើង​ពី​ការ​ព្រួយបារម្ភ​ជុំវិញ​ការ​ប្រព្រឹត្ត​ឧក្រិដ្ឋកម្ម​លើ​សហជីព និង​របាយការណ៍​ជនរងគ្រោះ​នៃ​ការ​ជួញដូរ​មនុស្ស​រាប់​ពាន់​នាក់ រួម​ទាំង​ប្រតិបត្តិការ​ឆបោក​តាម​ប្រព័ន្ធ​អនឡាញ​ផង​ដែរ។

ការ​លើកឡើង​នេះ ក្រោយពី​អាមេរិក​រក​ឃើញ​ថា ការ​ជួញដូរ​ជនបរទេស​ចូល​មក​ប្រទេស​កម្ពុជា​កំពុង​មាន​ការ​កើនឡើង រួម​ទាំង​ការ​រំលោភ​បំពាន​ក្នុង​វិស័យ​ការងារ ហើយ​មន្ត្រី​មួយ​ចំនួន​បាន​សមគំនិត​ក្នុង​ប្រតិបត្តិការ​ឆបោក​តាម​ប្រព័ន្ធ​អ៊ីនធឺណិត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស