អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ អះអាងថា ករណីវិវាទរវាងកម្មករនិយោជិត និងក្រុមហ៊ុនណាហ្គាវើលដ៍ បានឈានដល់ដំណាក់កាលត្រូវឡើងតុលាការ បន្ទាប់ពីកម្មករនិយោជិតបដិសេធសេចក្តីបង្គាប់របស់ក្រុមប្រឹក្សាអាជ្ញាកណ្ដាលនាពេលកន្លងមក។
អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានលើកឡើងក្នុងសន្និសីទសារព័ត៌មានកាលពីថ្ងៃទី១២ ខែតុលា ឆ្នាំ២០២២ ថា បញ្ហាដែលជាប់គាំង គឺនៅត្រង់ថា ភាគីបុគ្គលិកកម្មករទាមទារឱ្យក្រុមហ៊ុនទទួលបុគ្គលិកដែលខ្លួនបានបញ្ឈប់ចូលធ្វើការវិញ ចំណែកភាគីក្រុមហ៊ុនបដិសេធមិនទទួលយកវិញដាច់ខាត ប៉ុន្តែក្រុមហ៊ុនសុខចិត្តផ្តល់សំណងតាមច្បាប់ជាធរមាន។
លោក ហេង សួរ លើកឡើងថា ការដោះស្រាយវិវាទការងាររួមនៃបុគ្គលិកក្រុមហ៊ុនណាហ្គាវើលដ៍ ត្រូវធ្វើឡើង ៤ដំណាក់កាល គឺដំណាក់កាលផ្សះផ្សានៅក្រុមហ៊ុន ដំណាក់កាលផ្សះផ្សានៅកម្រិតក្រសួង ដំណាក់កាលផ្សះផ្សានៅក្រុមប្រឹក្សាអាជ្ញាកណ្ដាល និងដំណាក់កាលប្ដឹងទៅតុលាការ ខណៈក្រសួងមិនមានសិទ្ធិចាប់បង្ខំឲ្យភាគីណាមួយទទួលយកនូវអ្វីដែលជាគំនិតរបស់ខ្លួននោះទេ។
អ្នកនាំពាក្យក្រសួងការងាររូបនេះបញ្ជាក់ថា បច្ចុប្បន្ននេះ តំណាងអតីតបុគ្គលិកណាហ្គាវើលដ៍បានសុំឱ្យក្រសួងធ្វើការផ្សះផ្សាឡើងវិញ ប៉ុន្តែក្រសួងបានផ្សះផ្សានៅក្រុមហ៊ុន នៅក្រសួង និងរុញទៅអាជ្ញាកណ្ដាលរួចហើយ ដូច្នេះករណីនេះមិនអាចរុញទៅក្រសួងវិញទេ ពោលគឺត្រូវឡើងទៅតុលាការជាដាច់ខាត ត្បិតនៅពេលផុតដំណាក់កាលមួយហើយនោះ គឺត្រូវតែបញ្ជូនទៅដំណាក់កាលមួយទៀត មិនអាចវិលត្រឡប់ថយក្រោយវិញបានឡើយ។
ចាប់តាំងពីខែមេសា ឆ្នាំ២០២១ ដែលកម្មករនិយោជិតនៃក្រុមហ៊ុនណាហ្គាវើលដ៍ចំនួន ៣៦៥នាក់ត្រូវបានបញ្ឈប់ពីការងារដោយបង្ខំ និងចេញតវ៉ាទាមទារបញ្ចប់ការរំលោភសិទ្ធិការងាររបស់ពួកគេចាប់តាំងពីថ្ងៃទី១៨ ខែធ្នូ ឆ្នាំ២០២១ មក។ កម្មករនិយោជិតទាំងនោះត្រូវបានបង្ក្រាបដោយអាជ្ញាធរកម្ពុជាជាបន្តបន្ទាប់ ក្នុងនោះមានការចាប់ខ្លួន ការបង្ក្រាបដោយហិង្សា ដូចជាការវាយដំទៅលើកម្មការិនីរហូតធ្វើឱ្យមានរបួសស្នាម សន្លប់ និងរលូតកូនក្នុងផ្ទៃ ជាដើម។
មន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា បានប្រាប់សារព័ត៌មាន The Cambodia Daily នៅថ្ងៃទី១៣ តុលា នេះថា បញ្ហាដើមដំបូងនៃវិវាទក្រុមហ៊ុនណាហ្គាវើលដ៍ គឺកើតឡើងដោយសារតែក្រុមហ៊ុនបានរំលោភលើសិទ្ធិការងាររបស់កម្មករនិយោជិតដោយបង្ខំ ដែលមានចេតនាលុបបំបាត់ថ្នាក់ដឹកនាំសហជីពក្នុងក្រុមហ៊ុនរបស់ខ្លួន ទើបជំរុញឱ្យមានការតវ៉ាពីបុគ្គលិកកម្មករនៃក្រុមហ៊ុននេះរហូតមក មិនមែនបនល្បែងស៊ីសងមួយនេះបញ្ឈប់បុគ្គលិកទាំងនោះដោយការអនុវត្តច្បាប់ស្ដីពីការងាររបស់កម្ពុជា បានត្រឹមត្រូវដូចការលើកឡើងរបស់លោក ហេង សួរ នោះទេ។
លោក មាជ សុវណ្ណារ៉ា រំឭកឡើងវិញថា កាលពីថ្ងៃទី៨ ខែមេសា ឆ្នាំ២០២១ ក្រុមហ៊ុនណាហ្គាវើលដ៍បានប្រកាសគម្រោងកាត់បន្ថយបុគ្គលិកចំនួនជាង ១៣០០នាក់ ក្នុងនោះភាគច្រើនសុទ្ធសឹងតែជាសកម្មជនសហជីពក្នុងចំណោមបុគ្គលិកបម្រើការ ៨ពាន់នាក់ ក្រោមលេសថា ក្រុមហ៊ុនជួបវិបត្តិCovid-19 ហើយបញ្ហានេះ កម្មករនិយោជិតភាគច្រើនត្រូវបង្ខំចិត្តឈប់ពីការងារដោយមិនហ៊ានតវ៉ាជាមួយក្រុមហ៊ុននោះទេ បើទោះបីជាដឹងថាខ្លួនកំពុងរងភាពអយុត្តិធម៌ក៏ដោយ។
មន្ត្រីជាន់ខ្ពស់បក្សប្រឆាំងរូបនេះបញ្ជាក់ថា ដោយសារតែមានការរំលោភបំពានសិទ្ធិការងារលើកម្មករបែបនេះហើយ ទើបពួកគេនាំគ្នាចាប់ផ្តើមចេញតវ៉ាកាលពីចុងខែធ្នូ ឆ្នាំ២០២១ កន្លងទៅ ប៉ុន្តែអាជ្ញាធរកម្ពុជាបានចេញមុខការពារក្រុមហ៊ុន ដោយធ្វើការបង្ក្រាបទៅលើកម្មករទាំងនោះយ៉ាងធ្ងន់ធ្ងរ ខណៈស្ថាប័នពាក់ព័ន្ធ ដូចជាក្រសួងការងារ ជាដើម ព្យាយាមទម្លាក់កំហុសទៅលើកម្មករក្នុងចេតនាជួយបិទបាំងការរំលោភច្បាប់របស់ថៅកែក្រុមហ៊ុនល្បែងស៊ីសងនេះរហូតមក។
ជុំវិញបញ្ហានេះ កាលពីថ្ងៃទី១៩ ខែធ្នូ ឆ្នាំ២០២១ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានចោទក្រុមកូដករអហិង្សានៃបុគ្គលិកក្រុមហ៊ុនណាហ្គាវើលដ៍ថា ការប្រើប្រាស់អនីតិជន ឬស្ត្រី ជាពិសេសស្ត្រីមានកូនខ្ចី ឬស្ត្រីមានផ្ទៃពោះចូលរួមតវ៉ា គឺជាតាក់តិចមួយដែលរៀបចំចលនាបដិវត្តន៍ពណ៌ ហើយអ្នករៀបផែនការនេះតែងតែបន់ស្រន់ឲ្យមានគ្រោះថ្នាក់ដោយចៃដន្យណាមួយកើតឡើងលើអនីតិជន ឬលើស្ត្រីទាំងនោះ ដើម្បីទាញសមានចិត្ត និងបញ្ឆេះកំហឹងពីមហាជន ប៉ុន្តែក្រោយពីមានការប្រតិកម្មពីពលរដ្ឋ លោក ហេង សួរ ក៏បានលួចលុបសំណេររបស់ខ្លួនចេញពីបណ្ដាញសង្គមហ្វេសប៊ុកដោយស្ងាត់ៗដោយគ្មានការបកស្រាយអ្វីទាំងអស់៕