29 C
Phnom Penh

មហាសន្និបាត UN បោះឆ្នោត​ប្រឆាំង​រុស្ស៊ី​កាត់​យក​ទឹកដី​អ៊ុយក្រែន​ជា​ការ​វាយ​សំពង​រុស្ស៊ី​យ៉ាង​អាម៉ាស់

ដោយ ឌឹ ខេមបូឌា ដេលី

បទវិភាគ

នៅ​ឯ​កិច្ចប្រជុំ​ពិសេស​របស់​មហាសន្និបាត​អង្គការ​សហប្រជាជាតិ ដែល​បាន​ធ្វើឡើង​នៅ​បុរី​ញីវយ៉ក ដែនដី​សហរដ្ឋ​អាមេរិក កាលពី​ថ្ងៃ​ពុធ ទី​១២ ខែ​តុលា អំពី​ករណី​រុស្ស៊ី ប្រកាស​កាត់​យក​ទឹកដី​អ៊ុយក្រែន ចំនួន​បួន​តំបន់​មក​ជា​របស់​ខ្លួន បាន​ឈាន​ដល់​ការ​បោះឆ្នោត​ដើម្បី​ស្វែងរក​សំឡេង​គាំទ្រ​រុស្ស៊ី និង​សំឡេង​ប្រឆាំង​មហាអំណាច​យោធា​ទី​២ នៃ​ពិភពលោក​នេះ។

នៅ​ទីបំផុត មាន​តែ ៤​ប្រទេស​ប៉ុណ្ណោះ​ដែល​គាំទ្រ​រុស្ស៊ី​ប្លន់​ទឹកដី​ប្រទេស​អ៊ុយក្រែន។ ប្រទេស​ទាំង​បួន​នោះ​រួម​មាន កូរ៉េ​ខាងជើង ស៊ីសេរី បេឡារ៉ុស និង​ប្រទេស​នីការីហ្គ័រ។

ចំណែក​ប្រទេស​ដែល​ប្រឆាំង​រុស្ស៊ី មាន​ដល់​ទៅ ១៤៣​ប្រទេស ហើយ​ប្រទេស​ដែល​បោះឆ្នោត​អនុប្បវាទ​មាន​ចំនួន ៣៥​ប្រទេស ប៉ុន្តែ​ប្រទេស​ដែល​បោះឆ្នោត​អនុប្បវាទ​នេះ បើ​តាម​នីតិវិធី​បោះឆ្នោត​នៅ​ក្នុង​មហាសន្និបាត​នេះ គឺ​មិន​ត្រូវ​បាន​ចាត់ទុក​ជា​សំឡេងឆ្នោត​ដើម្បី​ទប់ទល់​នឹង​សំឡេង​ប្រឆាំង​នោះ​ទេ។ វា​គឺ​សំឡេង​ក្នុង​កម្រិត​សូន្យ ទោះ​ជា​បរិមាណ​ធ្វើ​ឲ្យ​មាន​តុល្យភាព​នឹង​សំឡេង​ប្រឆាំង​ក៏ដោយ។ ដូចនេះ គេ​ហៅ​សំឡេង​ឆ្នោត​ប្រឆាំង​រុស្ស៊ី​មាន​សំឡេង​លើសលប់​បំផុត គឺ ១៤៣​ទល់​នឹង ៤​សំឡេង។

បើ​តាម​បណ្ដាញ​ផ្សាយ​ព័ត៌មាន BBC ឲ្យ​ដឹង​ថា រុស្ស៊ី​ខ្លួន​គេ​ផ្ទាល់​ក៏​ស្ថិត​ក្នុង​សំឡេង​គាំទ្រ​ខ្លួនឯង​ដែរ ប៉ុន្តែ​មិន​ត្រូវ​បាន​រាប់​នោះ​ទេ។

យ៉ាងណាក៏ដោយ សំឡេង​ឆ្នោត​ដែល​មាន​ចំនួន​លើសលប់​នេះ គឺ​ជា​តម្លៃ​ការទូត​ខ្ពស់​បំផុត​ដែល​ចង់​ប្រាប់​ទៅ​ទីក្រុង​មូស្គូ ថា រុស្ស៊ី​កំពុង​ធ្វើការ​ឈ្លានពាន​អ៊ុយក្រែន ហើយ​ប្លន់​ទឹកដី​ប្រទេស​នេះ​ដែល​ជា​អំពើ​ខុស​ច្បាប់​ធ្ងន់ធ្ងរ​ណាស់ ជាពិសេស​រំលោភ​ធម្មនុញ្ញ​អង្គការ​សហប្រជាជាតិ។ លទ្ធផល​នេះ​មាន​ន័យ​ជា​និមិត្តរូប​នៃ​សំឡេង​យុត្តិធម៌​នៃ​ការ​តស៊ូ​ផ្នែក​ការទូត​សម្រាប់​ប្រជាជន​អ៊ុយក្រែន ដែល​មាន​តម្លៃ​ខ្លាំង​ណាស់។

ជ័យជម្នះ​របស់​អ៊ុយក្រែន​លើ​ផ្នែក​ការទូត​នៅ​ពេលនេះ គឺ​ពិត​ណាស់​ជា​ការ​ឆ្លើយតប​យ៉ាង​ពិតប្រាកដ​របស់​សហគមន៍​អន្តរជាតិ​ប្រឆាំង​រុស្ស៊ី ដែល​សភា​របស់​ប្រទេស​មហាអំណាច​នេះ​បាន​អនុម័ត​យក​តំបន់ Luhansk, Donetsk, Zaporizhzhia និង Kherson ទឹកដី​អ៊ុយក្រែន មក​ជា​ទឹកដី​របស់​ខ្លួន។

តាម​អ្នកវិភាគ​របស់ BBC ចាប់​ពី​ពេលនេះ​ទៅ ទោះ​ជា​រុស្ស៊ី​ចាត់ទុក​ទឹកដី​នៃ​តំបន់​ទាំង ៤ នេះ​ជា​របស់​ខ្លួន​ក៏​គ្មាន​ន័យ​ដែរ ហើយ​ជា​ការ​លើក​ទឹកចិត្ត​ថែម​ទៀត​ដល់​ប្រជាជន និង​កងទ័ព​អ៊ុយក្រែន​ក្នុង​ការ​បង្កើន​កម្លាំង​សាមគ្គីភាព​ប្រឆាំង​នឹង​កម្លាំង​ទ័ព​រុស្ស៊ី ដែល​គេ​ហៅថា​ទ័ព​ឈ្លានពាន។ ដូចនេះ ទឹកដី​ទាំង ៤​តំបន់​នេះ​គ្មាន​ផ្លូវ​រុស្ស៊ី​បន្ត​អះអាង​ថា​ជា​ដែនដី​របស់​ខ្លួន​បាន​ដាច់ខាត ទោះជា​ដែនដី​នោះ​មាន​ប្រជាជន​រុស្ស៊ី​មក​រស់នៅ​ក៏ដោយ។

អ្នក​សង្កេតការណ៍​ថា របប​ក្រុង​មូស្គូ អស់​ផ្លូវ​ដើម្បី​ប្រើ​ឥទ្ធិពល​នៅ​ឯ​អង្គការ​សហប្រជាជាតិ​ចាប់​ពី​ពេលនេះ​តទៅ ហើយ​មិន​តែប៉ុណ្ណោះ គឺ​មហាអំណាច​នេះ​នៅ​សល់​តែ​ការ​តស៊ូ​មួយ​ទៀត គឺ​ការ​ខំ​ការពារ​អាសនៈ​របស់​ខ្លួន​នៅ​អង្គការ​សហប្រជាជាតិ​ដែល​កំពុង​ប្រឈម​នឹង​ការ​ព្យួរ​តែប៉ុណ្ណោះ ព្រោះ​ប្រទេស​នេះ​បាន​រំលោភ​ធ្ងន់ធ្ងរ​ណាស់​លើ​ធម្មនុញ្ញ​របស់​អង្គការ​សហប្រជាជាតិ ដែល​ហាម​ការ​បង្ក​សង្គ្រាម​ឈ្លានពាន​ប្រទេស​ណា​មួយ​នាំ​ឱ្យ​ពិភពលោក​ជួប​វិបត្តិ​អសន្តិសុខ​ធ្ងន់ធ្ងរ។

អ្នក​ការទូត​របស់​បស្ចិម​ប្រទេស​បាន​បញ្ចេញ​សំឡេង​រួម​គ្នា​ថា រុស្ស៊ី​មិន​ត្រឹម​ចាញ់​ជា​បណ្ដើរៗ​នៅ​លើ​សមរភូមិ​នោះ​ទេ តែ​មហាអំណាច​នេះ​បាន​ចាញ់​យ៉ាង​អាម៉ាស់​នៅ​លើ​ផ្លូវ​តស៊ូ​ការទូត​ចំពោះ​ការ​ឈ្លានពាន​ប្រទេស​អ៊ុយក្រែន។

ភ្លាមៗ​បន្ទាប់ពី​ទទួល​បាន​ដំណឹង​ថា​សំឡេង​ប្រឆាំង​រុស្ស៊ី​មាន​ភាព​លើសលប់​នៅ​ឯ​មហាសន្និបាត​អង្គការ​សហប្រជាជាតិ ប្រធានាធិបតី​អ៊ុយក្រែន Volodymyr Zelensky បាន​ថ្លែង​សាទរ និង​អរគុណ​ប្រទេស​ទាំង ១៤៣​ប្រទេស​នេះ។ លោក​ចាត់ទុក​ថា​ជា​ជ័យជម្នះ​រួម​គ្នា​របស់​កម្លាំង​អ្នក​ការពារ​យុត្តិធម៌ និង​សេរីភាព។

លោក Zelensky បាន​សង្កត់​ធ្ងន់​ថា ពិភពលោក​បាន​បង្ហាញ​ជំហរ​យ៉ាង​ច្បាស់ គឺ​ថា​ការ​កាត់​ទឹកដី​ដោយ​ខុស​ច្បាប់​ពី​សំណាក់​រុស្ស៊ី គឺ​គ្មាន​តម្លៃ និង​គ្មាន​ថ្ងៃ​ទទួលស្គាល់​ដោយ​ក្រុម​ប្រទេស​ស្រឡាញ់​យុត្តិធម៌​នោះ​ទេ។ លោក​ក៏​បាន​ទទូច​ឱ្យ​ពិភពលោក​រួម​គ្នា​មួយ​លើក​ទៀត​ដក​រុស្ស៊ី​ចេញពី​សមាជិក​ក្រុមប្រឹក្សា​សន្តិសុខ​អង្គការ​សហប្រជាជាតិ។ លោក​ថា ប្រទេស​ដែល​បំពាន​ធម្មនុញ្ញ​អង្គការ​សហប្រជាជាតិ​ដ៏​ធ្ងន់ធ្ងរ​នេះ មិន​សម​ជា​ប្រទេស​ជួយ​កសាង​សណ្ដាប់ធ្នាប់​ពិភពលោក​នោះ​ទេ។

បន្ទាប់ពី​មហាសន្និបាត​អង្គការ​សហប្រជាជាតិ​បាន​បោះឆ្នោត​ក្នុង​សំឡេង​ច្រើន​លើសលប់​ថ្កោលទោស​ទៅលើ​រុស្ស៊ី ដោយសារតែ​កាត់​យក​ទឹកដី​អ៊ុយក្រែន ប្រធានាធិបតី​អាមេរិក លោក ចូ បៃដិន បាន​ចេញ​មុខ​ស្ងើច​សរសើរ​លទ្ធផល​នេះ ហើយ​ថា​វា​គឺជា​ការ​ផ្ញើ​សារ​យ៉ាង​ច្បាស់​ចំពោះ​ទីក្រុង​មូស្គូ។

បើ​តាម​សេចក្តី​ថ្លែងការណ៍​របស់​សេតវិមាន លោក បៃដិន បាន​និយាយ​ថា វា​ជា​ការ​ឆ្លើយតប​ទៅ​កាន់​ប្រទេស​រុស្ស៊ី ថា​ប្រទេស​នេះ​មិន​អាច​លុបបំបាត់​រដ្ឋ​អធិបតេយ្យ​មួយ​ចេញពី​ផែនទី​ពិភពលោក​បាន​ដាច់ខាត។

លោក​ប្រធានាធិបតី​អាមេរិក​បាន​បន្ត​ទៀត​ថា រុស្ស៊ី​មិន​អាច​កែប្រែ​បន្ទាត់​ព្រំដែន​ដោយ​ប្រើ​កម្លាំង​យោធា ហើយ​រុស្ស៊ី​ក៏​មិន​អាច​ដណ្តើម​ទឹកដី​ប្រទេស​ដទៃ​មក​ធ្វើជា​កម្មសិទ្ធិ​របស់​ខ្លួន​បាន​ឡើយ។

ប្រទេស​មហាអំណាច​រុស្ស៊ី ដែល​ជួប​រឿង​អាម៉ាស់​ដ៏​ធ្ងន់​ក្នុង​ការ​តស៊ូ​ការទូត​នេះ​នៅ​ឯ​មហាសន្និបាត​អង្គការ​សហប្រជាជាតិ គឺ​មាន ៤​លើក​មក​ហើយ ចាប់ពី​ថ្ងៃទី​២៤ កុម្ភៈ ដែល​ប្រទេស​នេះ​លើក​ទ័ព​ឈ្លានពាន​អ៊ុយក្រែន ជា​ប្រទេស​មាន​ព្រំដែន​ជាមួយ​គ្នា៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស