ក្នុងកិច្ចប្រជុំក្រុមប្រឹក្សាសន្តិសុខ លោក ពូទីន ប្រធានាធិបតីរុស្ស៊ីបានប្រកាសផ្ដល់អំណាចបន្ទាន់ឱ្យមេដឹកនាំតំបន់ចំនួនបួនដែលទើបកាត់យកចេញពីអ៊ុយក្រែន តាមការបោះឆ្នោតប្រជាមតិដែលអង្គការសហប្រជាជាតិថ្កោលទោស ថាជាទង្វើខុសច្បាប់ និងរំលោភធម្មនុញ្ញអង្គការសហប្រជាជាតិយ៉ាងធ្ងន់ធ្ងរ។
តាមសារព័ត៌មាន Washington post តំបន់ចំនួនបួននេះ គឺតំបន់ដូណេត តំបន់លូហាន់ នៅភាគខាងកើត តំបន់ខឺសុន និងតំបន់ហ្សាប៉ូរីហ្ស៊ីយ៉ា នៅភាគខាងត្បូងប្រទេសអ៊ុយក្រែន ឱ្យប្រើប្រាស់ច្បាប់អាជ្ញាសឹក។
នៅក្នុងការចាក់ផ្សាយរបស់ទូរទស្សន៍រុស្ស៊ី លោក ពូទីន បាននិយាយក្នុងកិច្ចប្រជុំក្រុមប្រឹក្សាសន្តិសុខជាតិរុស្ស៊ី ថា ច្បាប់នេះមានគោលដៅការពារសុវត្ថិភាពរបស់ប្រជាជន និងប្រឆាំងជនណាដែលមកបង្កប់ខ្លួននៅក្នុងតំបន់នោះ។
តែអ្នកវិភាគចាត់ទុកក្រឹត្យច្បាប់អាជ្ញាសឹករបស់លោក ពូទីន មានន័យថា រុស្ស៊ីមិនចោលក្បួនក្នុងការពង្រីកការពាក់ព័ន្ធនឹងសកម្មភាពយោធាក្រោមប្រព័ន្ធច្បាប់របស់រុស្ស៊ីដ៏អាក្រក់នេះទេ។
តើច្បាប់អាជ្ញាសឹករបស់លោក ពូទីន មានអ្វីនៅពីក្រោយ?
យោងតាមស្មារតីនៃច្បាប់អាជ្ញាសឹកនេះ គឺជាការពង្រីកអំណាចរបស់យោធា និងការអនុវត្តច្បាប់តឹងរ៉ឹងដែលអនុញ្ញាតឱ្យយោធាអនុវត្តបម្រាមគោចរ ហើយរឹតត្បិតសេរីភាពនៃការដើរហើររបស់ប្រជាជន រឹបអូសទ្រព្យសម្បត្តិស៊ីវិល។ ពួកយោធាត្រូវតាមដានការទាក់ទងរបស់ប្រជាជន និងបញ្ជាឱ្យពលរដ្ឋកសាងទីក្រុងដែលបែកបាក់ជាមួយកម្លាំងអាជ្ញាធរ។
បើតាមលោក Mark Bergmann ដែលជានាយកកម្មវិធីអឺរ៉ុបនៃមជ្ឈមណ្ឌលសម្រាប់យុទ្ធសាស្ត្រ និងសិក្សាអន្តរជាតិ យល់ឃើញថា ច្បាប់អាជ្ញាសឹកនេះមានអំណាចព្យួរនូវអភិបាលកិច្ចទូទៅនៃសេដ្ឋកិច្ច និងនីតិរដ្ឋ។
លោកថា ច្បាប់នេះអនុញ្ញាតឱ្យយោធារឹបអូសទ្រព្យសម្បត្តិស៊ីវិល ដូចជាអគារលំនៅឋាន និងអនុញ្ញាតឱ្យកងទ័ពសម្លាប់ប្រជាជនបានទៀតផង។
អ្នកវិភាគរូបនេះអះអាងថា ក្រុងមូស្គូមិនបានគ្រប់គ្រងទាំងស្រុងនូវតំបន់ចំនួនបួននោះទេ។ ដូចនេះ គេមិនប្រាកដថា ក្រុងមូស្គូនឹងមានប្រសិទ្ធភាពក្នុងការអនុវត្តបញ្ញត្តិទាំងនោះឬអត់ ហើយថាតើគេអាចធ្វើឱ្យមានស្ថានភាពខុសពីលក្ខខណ្ឌនៃការកាន់កាប់យោធាដែរឬទេ។
បើតាមអ្នកវិភាគ Mark Bergmann ក្រឹត្យច្បាប់នេះអនុវត្តនូវអ្វីដែលរុស្ស៊ី បានកាន់កាប់ ដូចជាការបោះឆ្នោតនៅក្នុងតំបន់ដែលជាផ្នែកមួយត្រូវគេចាត់ទុកថាតម្រូវឱ្យប្រជាជនរុស្ស៊ី ស្ថិតក្រោមរដ្ឋបាលនៃសមត្ថភាពរបស់កងទ័ពរុស្ស៊ី។ ច្បាប់នេះ លោកក៏ចាត់ទុកថាជាឱកាសដែលទ័ពរុស្ស៊ីអាចប្រមូល និងកាន់កាប់ធនធានបានកាន់តែច្រើន ហើយអាចដល់ការចាប់មនុស្សតាមដងផ្លូវ ដើម្បីឲ្យកាន់អាវុធទៅប្រយុទ្ធជាមួយនឹងទ័ពអ៊ុយក្រែន។
អ្វីដែលគួរឱ្យកត់សម្គាល់ គឺថាជារឿងដ៏កម្រណាស់ដែលក្រុងមូស្គូ ដាក់ច្បាប់អាជ្ញាសឹកនេះ។ ក្រុងមូស្គូ មិនបានប្រកាសច្បាប់អាជ្ញាសឹកតាំងតែពីសហភាពសូវៀត ប្ដូរខ្លួនជារុស្ស៊ីទំនើបដូចសព្វថ្ងៃ។
អ្នកវិភាគរូបនេះថា អស់រយៈពេលជាច្រើនទសវត្សហើយ ទោះរុស្ស៊ីលុកលុយប្រទេសជិតខាងដូចប្រទេសចចជា អ៊ុយក្រែន ហើយលោក ពូទីន លើកទ័ពអន្តរាគមន៍នៅស៊ីរី ក៏ជម្លោះទាំងនោះគ្មានដល់ការកេណ្ឌទ័ពគ្មានរៀបរយដូចសព្វថ្ងៃនេះទេ។
លោកថា កាលក្នុងអំឡុងសហភាពសូវៀតធ្វើសង្គ្រាម ក៏ពេលនោះសហភាពសូវៀតមានទ័ពច្រើនជាងនេះទៀត ក៏ប្រើត្រឹមទ័ពធម្មតា។ តែពេលនេះ លោក ពូទីន កំពុងផុងខ្លួនក្នុងសង្គ្រាមអ៊ុយក្រែន ហើយរុញឲ្យប្រជាជនរុស្ស៊ីទៅស្លាប់យ៉ាងច្រើន។
ប្រជាជនរុស្ស៊ីត្រូវបានប្រាប់ថាជាប្រតិបត្តិការសឹកពិសេស តែបែរជាកេណ្ឌទ័ពដូចជំនាន់សង្គ្រាមលោកលើកទី២។
តើកម្រិតនៃការប៉ះពាល់នៃក្រឹត្យច្បាប់អាជ្ញាសឹកមានវិសាលភាពប៉ុនណា?
បន្ថែមពីនេះ ការប្រកាសនៃច្បាប់អាជ្ញាសឹកនេះ លោក ពូទីន បានដាក់កម្រិតលើ ២៦តំបន់រួមមានក្រុងមូស្គូ ដែលអ្នកជំនាញខ្លះនិយាយថា ជាការប៉ះពាល់ទ្រង់ទ្រាយធំនៃសេដ្ឋកិច្ចប្រទេសរុស្ស៊ី។
នៅតំបន់ជិតនឹងព្រំដែនអ៊ុយក្រែន ដូចជាតំបន់ Krasnodar តំបន់ Belgorod តំបន់ Bryansk តំបន់ Voronezh តំបន់ Kursk and Rostov និងតំបន់ Crimea ក៏ត្រូវរឹតបន្តឹងក្នុងចំណាត់ការសង្គ្រាម តែតំបន់ទាំងនេះមានកម្រិតតិចជាងតំបន់ចំនួនបួនខាងលើនេះ។
វិធានការនេះក៏មានកម្រិតថ្មីមួយទៀតនៃឧស្សាហកម្ម គឺជាការដាក់លើគោលបំណងសហគ្រិនក្នុងការគាំទ្រវិស័យយោធា។
អ្នកវិភាគ Mark Bergmann យល់ទៀតថា នេះគេហៅថាជាយុទ្ធសាស្ត្រកង្កែបលោត ដែលធ្វើឲ្យច្របល់ដល់អារម្មណ៍សាធារណជនរុស្ស៊ី។
សម្រាប់លោក Oleksiydanilov ជារដ្ឋលេខាធិការនៃក្រុមប្រឹក្សាការពារជាតិ និងសន្តិសុខជាតិអ៊ុយក្រែន បានលើកឡើងថា វិធានការនៃការកាត់យកដីអ៊ុយក្រែន ចូលជាឧបសម្ពន្ធ គឺរុស្ស៊ីបានដឹកប្រជាជនឲ្យរស់នៅតំបន់នោះ តែដល់ពួកគាត់មិនអាចស៊ូទ្រាំរស់នៅលើតំបន់នោះ គឺលោក ពូទីន ក៏បង្កើតច្បាប់អាជ្ញាសឹកដូចនេះ។ លោកយល់ថា រុស្ស៊ីពិតជាកំពុងរកទៅផ្លូវនៃការចាញ់សង្គ្រាម ទើបលោក ពូទីន ចេញក្រឹត្យច្បាប់សឹកដូចនេះ។
សម្រាប់អ្នកវិភាគ Mark Bergmann ថាច្បាប់សឹកនេះនឹងគ្មានប្រសិទ្ធភាពអ្វីទេ ព្រោះវាស្ថិតនៅលើទឹកដីរបស់អ៊ុយក្រែន ហើយម្យ៉ាងទៀត តំបន់ទាំង ៤ នេះ មិនប្រាកដថារុស្ស៊ីអាចកាន់កាប់បានច្រើនថ្ងៃទៀតនោះទេ ព្រោះទ័ពអ៊ុយក្រែន កំពុងតែវាយរំដោះបានជាបណ្ដើរៗហើយនោះ៕