28 C
Phnom Penh

រដ្ឋមន្ត្រី​កសិកម្ម​ថ្មី​មាន​មោទកភាព​ដែល​កម្ពុជា​ទទួល​សិទ្ធិ​នាំចេញ​ផ្លែ​មៀន​ស្រស់​ទៅ​ទីផ្សារ​ចិន

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​កសិកម្ម សម្ដែង​នូវ​មោទកភាព​ដែល​កម្ពុជា​ទទួល​បាន​សិទ្ធិ​នាំចេញ​ផ្លែ​មៀន​ស្រស់​ទៅ​កាន់​ទីផ្សារ​ចិន គឺជា​ការ​បោះ​ជំហាន​ទៅ​មុខ​យ៉ាង​វែង​សម្រាប់​កម្ពុជា លើ​វិស័យ​អភិវឌ្ឍ​កសិកម្ម​ដើម្បី​រួម​ចំណែក​ដល់​ការ​អភិវឌ្ឍ​វិស័យ​កសិកម្ម​របស់​កម្ពុជា​ទៅ​ថ្ងៃ​អនាគត។

រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ លោក ឌិត ទីណា បាន​លើកឡើង​ក្នុង​ពិធី​សម្ពោធ​នាំចេញ​ផ្លែ​មៀន​ទៅ​កាន់​ប្រទេស​ចិន នៅ​ថ្ងៃទី​២៧ ខែ​តុលា ឆ្នាំ​២០២២ នេះ​ថា ការ​ទទួល​បាន​សិទ្ធិ​នាំចេញ​ផ្លែ​មៀន​ស្រស់​របស់​កម្ពុជា​ជា​ផ្លូវការ​ទៅ​កាន់​ប្រទេស​ចិន គឺជា​ការ​បោះ​ជំហាន​ទៅ​មុខ​យ៉ាង​វែង​សម្រាប់​កម្ពុជា លើ​វិស័យ​អភិវឌ្ឍ​កសិកម្ម ក្រោយ​ការ​ចរចា​លក្ខខណ្ឌ​អនាម័យ។

លោក ឌិត ទីណា លើកឡើង​ថា ការ​សម្រេច​បាន​នូវ​ការ​នាំចេញ​ផ្លែ​មៀន​ស្រស់​របស់​កម្ពុជា​នៅ​ពេលនេះ គឺជា​ជោគជ័យ​ថ្មី​មួយ​ដែល​កើត​ចេញពី​កិច្ច​សហប្រតិបត្តិការ​ភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​រវាង​កម្ពុជា-ចិន ដែល​នឹង​ចូលរួម​ចំណែក​យ៉ាង​សំខាន់​ដល់​ការ​អភិវឌ្ឍ​វិស័យ​កសិកម្ម តាមរយៈ​នៃ​ការ​ជួយ​បង្កើន​ផលិតកម្ម ការ​ទាក់ទាញ​វិនិយោគទុន​ចិន​ក្នុង​វិស័យ​ផលិតកម្ម​កសិកម្ម​របស់​កម្ពុជា​ទៅ​ថ្ងៃ​មុខ។

រដ្ឋមន្ត្រី​ក្រសួង​កសិកម្ម​រូប​នេះ​បញ្ជាក់​ថា សមិទ្ធផល​ដ៏​ធំធេង​នេះ​នឹង​ជំរុញ​ឱ្យ​កម្ពុជា​បោះ​ជំហាន​ទៅ​រក​ការ​អភិវឌ្ឍ​ក្នុង​ការ​សាងសង់​ហេដ្ឋារចនាសម្ព័ន្ធ​វេច​ខ្ចប់ និង​កែច្នៃ​សម្រាប់​បម្រើ​ឱ្យ​ការ​នាំចេញ​ដែល​អាច​បង្កើត​ការងារ និង​បង្កើន​ប្រាក់ចំណូល​របស់​កសិករ​កាន់តែ​ខ្ពស់​ក្នុង​ការ​ការ​អភិវឌ្ឍ​សេដ្ឋកិច្ច និង​សង្គម​នៅ​កម្ពុជា។

កាលពី​ដើម​ឆ្នាំ​២០១៩ ក្រសួង​កសិកម្ម រុក្ខាប្រមាញ់ និង​នេសាទ បាន​ចាប់ផ្តើម​ទំនាក់ទំនង​ចរចា​លក្ខខណ្ឌ​តម្រូវ​ភូតគាម​អនាម័យ​បើក​ទីផ្សារ​ជាមួយ​អគ្គ​រដ្ឋបាល​គយ​នៃ​សាធារណរដ្ឋ​ប្រជាមានិត​ចិន (GACC) ដើម្បី​ជំរុញ​ការ​នាំចេញ​ផ្លែ​មៀន​ស្រស់​កម្ពុជា​ទៅ​កាន់​ប្រទេស​ចិន ប៉ុន្តែ​កម្ពុជា​ត្រូវ​រង់ចាំ​រហូត​ដល់​ថ្ងៃទី​១៦ ខែ​មីនា ឆ្នាំ​២០២២ ទើប​ទទួល​បាន​ការ​ឯកភាព និង​ចុះហត្ថលេខា​លើ​ពិធីសារ​ស្ដីពី​លក្ខខណ្ឌ​អនាម័យ​សម្រាប់​ការ​នាំចេញ​ផ្លែ​មៀន​នេះ។

ចម្ការ​មៀន​ដែល​ទទួល​បាន​ការ​អនុម័ត​ចុះបញ្ជី​ជា​ផ្លូវការ​នាំចេញ​ទៅ​កាន់​ទីផ្សារ​ចិន មាន​ចំនួន ៧៤​កន្លែង គឺ​នៅ​ខេត្ត​ប៉ៃលិន ចំនួន ៤០​ចម្ការ បាត់ដំបង​ចំនួន ២៨​ចម្ការ និង​បន្ទាយមានជ័យ ចំនួន ៦​ចម្ការ។ ដោយឡែក​រោងចក្រ​វេច​ខ្ចប់​មាន​ចំនួន ៨​កន្លែង​ផង​ដែរ រួម​មាន​នៅ​ខេត្ត​កណ្តាល ១​កន្លែង ខេត្ត​បាត់ដំបង ៣​កន្លែង ខេត្ត​ប៉ៃលិន ២​កន្លែង និង​ខេត្ត​ព្រះសីហនុ ២​កន្លែង។

អតីត​ប្រធាន​អង្គការ​សេដាក និង​ជា​ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៧ តុលា នេះ​ថា ដើម្បី​ធានា​នូវ​ការ​នាំចេញ​ផលិតផល​កសិកម្ម​របស់​កម្ពុជា​ទៅ​កាន់​ទីផ្សារ​ចិន កម្ពុជា​ត្រូវ​កំណត់​នូវ​ផលិតផល​សក្ដានុពល​ផ្សេង​ទៀត​ដែល​ទីផ្សារ​ចិន​ត្រូវការ។ ជាង​នេះ​ទៀត កម្ពុជា​ក៏​ត្រូវ​ពង្រឹង​នូវ​គុណភាព​នៃ​ផលិតផល​របស់​ខ្លួន​ឱ្យ​ត្រឹមត្រូវ​តាម​ស្តង់ដារ​របស់​ចិន​ផង​ដែរ។

បណ្ឌិត យ៉ង សាំងកុមារ លើកឡើង​ថា ក្រសួង​កសិកម្ម​ក៏​ត្រូវ​សិក្សា​លើ​ថ្លៃដើម​ក្នុង​ការ​ផលិត​របស់​កសិករ​ថែម​ទៀត ដើម្បី​ជួយ​ជ្រោមជ្រែង​ឱ្យ​ពួកគាត់​អាច​ទទួល​បាន​ផល​ចំណេញ​ខ្ពស់​តាមរយៈ​នៃ​ការ​កាត់បន្ថយ​ថ្លៃដើម​ផលិត រហូត​ឈាន​ដល់​ការ​វេច​ខ្ចប់ ដែល​បង្ក​លក្ខណៈ​ងាយស្រួល​សម្រាប់​កសិករ​ក្នុង​ការ​ជំរុញ​ការ​នាំចេញ​ឱ្យ​បាន​កាន់តែ​ច្រើន​បន្ថែម​ទៀត។

អតីត​ប្រធាន​អង្គការ​សេដាក​រូប​នេះ​ជំរុញ​ឱ្យ​ក្រសួង​កសិកម្ម ប្រមូល​ចងក្រង​កសិករ​ទាំងនោះ​ដើម្បី​កំណត់​ឱ្យ​បាន​ច្បាស់លាស់​ក្នុង​ទំហំ​ផលិតផល​របស់​ខ្លួន ដើម្បី​ឆ្លើយតប​ទៅ​នឹង​តម្រូវការ​ទីផ្សារ​របស់​ចិន។

លោក​បន្ត​ថា ក្រសួង​ក៏​ត្រូវ​រៀបចំ​ឥណទាន​កសិករ​សម្រាប់​ជួយ​ពួកគេ​ឱ្យ​មាន​ទុន​គ្រប់គ្រាន់​ក្នុង​ការ​ផលិត​ដែល​មាន​ការប្រាក់​ទាប នោះ​វិស័យ​កសិកម្ម​នឹង​រីក​លូតលាស់​ទៅ​មុខ​ជាមិនខាន។

កាលពី​អំឡុង​ខែ​សីហា ឆ្នាំ​២០២១ កន្លងទៅ ម្ចាស់​ចម្ការ​ផ្លែ​មៀន​ម្នាក់​ត្រូវ​បាន​សាលាដំបូង​ខេត្ត​បាត់ដំបង សម្រេច​ឲ្យ​ជាប់​ពន្ធនាគារ ១០​ខែ ដោយ​ចោទប្រកាន់​ពី​បទ ញុះញង់​ឲ្យ​ប្រព្រឹត្ត​បទឧក្រិដ្ឋ​ជាអាទិ៍ បន្ទាប់ពី​ម្ចាស់​ចម្ការ​រូប​នោះ​បាន​រិះគន់​អាជ្ញាធរ​ថា​មិន​ជួយ​រក​ទីផ្សារ​ផ្លែ​មៀន​ឱ្យ​កសិករ​តាម​បណ្តា​ខេត្ត​បណ្តោយ​ព្រំដែន​ខ្មែរ-ថៃ ដែល​បាន​កកស្ទះ​លក់​មិន​ចេញ​រាប់​ម៉ឺន​តោន​នៅ​ពេល​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស