ប្រធានគណបក្សសង្គ្រោះជាតិដែលកំពុងតស៊ូដើម្បីសេរីភាព និងយុត្តិធម៌សង្គម បានថ្វាយព្រះពរព្រះមហាក្សត្រខ្មែរ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ក្នុងខួប ១៨ឆ្នាំនៃការគ្រងព្រះបរមសិរីរាជសម្បត្តិ ដែលប្រព្រឹត្តទៅនៅថ្ងៃសៅរ៍ ទី២៩ តុលា នេះ។
មេដឹកនាំបក្សប្រឆាំងដែលមិនទាន់មានសេរីភាព លោក កឹម សុខា បានសរសេរលើទំព័រហ្វេសប៊ុករបស់ខ្លួននៅថ្ងៃទី២៨ ខែតុលា ឆ្នាំ២០២២ នេះថា ក្នុងឱកាសដ៏មហានក្ខត្តឫក្សនៃព្រះរាជពិធីបុណ្យខួបលើកទី១៨ ដែលប្រព្រឹត្តទៅនៅថ្ងៃទី២៩ ខែតុលា ឆ្នាំ២០២២ នេះ លោកសូមក្រាបបង្គំថ្វាយព្រះពរសព្ទសាធុការពរជ័យ បវរសួស្តីមហាប្រសើរគ្រប់ប្រការ ថ្វាយចំពោះព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រខ្មែរនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដើម្បីរក្សានូវសុខសន្តិភាពសម្រាប់ទឹកដីកម្ពុជរដ្ឋទាំងមូល។
លោក កឹម សុខា បួងសួងសុំឱ្យព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ទទួលបាននូវព្រះពុទ្ធពរទាំងបួនប្រការ និងមានព្រះបញ្ញាឈ្លាសវៃ ដើម្បីគង់ជាម្លប់ដ៏ត្រជាក់ផ្តល់នូវភាពសុខដុមរមនាដល់ប្រជារាស្ត្រខ្មែរគ្រប់ៗគ្នា។
ការថ្វាយសារជូនពរនេះ ធ្វើឡើងដើម្បីអបអរសាទរខួប ១៨ឆ្នាំនៃការគ្រងព្រះបរមសិរីរាជសម្បត្តិ ព្រះបាទសម្តេចព្រះបរមនាថ នរោត្តម សីហមុនី ហើយក៏ស្របពេលដែលមេដឹកនាំនយោបាយខ្មែរផ្សេងទៀតកំពុងយកព្រះអង្គធ្វើជាផ្ទាំងស៊ីបដើម្បីទាញយកផលប្រយោជន៍នយោបាយរបស់ពួកគេរៀងៗខ្លួនដែរ។
ព្រះករុណាសម្តេចព្រះបរមនាថ នរោត្តម សីហមុនី បានប្រសូតនៅថ្ងៃទី១៥ ខែឧសភា ឆ្នាំ១៩៥៣ នៅទីក្រុងភ្នំពេញ និងត្រូវបានក្រុមប្រឹក្សារាជសម្បត្តិជ្រើសតាំងជាឯកច្ឆន្ទឱ្យឡើងសោយរាជ្យជាព្រះមហាក្សត្រខ្មែរជំនួសព្រះបាទ នរោត្តម សីហនុ ដែលជាព្រះបិតា នៅថ្ងៃទី១៤ ខែតុលា ឆ្នាំ២០០៤ ប៉ុន្តែរហូតដល់ថ្ងៃទី២៩ ខែតុលា ឆ្នាំ២០០៤ ទើបព្រះករុណាសម្តេចព្រះបរមនាថ នរោត្តម សីហមុនី ត្រូវបានប្រកាសឱ្យឡើងសោយរាជ្យសម្បត្តិជាព្រះមហាក្សត្រនៃព្រះរាជាណាចក្រកម្ពុជាជាផ្លូវការបន្តពីព្រះបិតារបស់ព្រះអង្គ។
រយៈពេលនៃការគ្រងរាជ្យរបស់ព្រះអង្គអស់ ១៨ឆ្នាំមកនេះ ត្រូវគេលើកឡើងថា ព្រះអង្គបានរងនូវការប្រមាថ និងរំលោភបំពានពីមេដឹកនាំបក្សកាន់អំណាច លោក ហ៊ុន សែន យ៉ាងធ្ងន់ធ្ងរ ដោយការបំបិទសិទ្ធិដែលជាព្រះរាជតួនាទីរបស់ទ្រង់គ្រប់បែបយ៉ាង ជាពិសេសការគំរាមកំហែងព្រះអង្គនៅផ្ទៃក្នុងនៃព្រះបរមរាជវាំងឱ្យឡាយព្រះហស្តលេខាលើសន្ធិសញ្ញាខុសច្បាប់ដែលខ្លួនបានឃុបឃិតជាមួយវៀតណាម និងឡាយព្រះហស្តលេខាលើការកែប្រែរដ្ឋធម្មនុញ្ញនានាក្នុងរយៈពេលចុងក្រោយនេះ ដែលគេឃើញថា លោក ហ៊ុន សែន ប្រើអំណាចរបស់ខ្លួនលើសដែនកំណត់លប់លើអំណាច និងព្រះរាជតួនាទីរបស់ព្រះមហាក្សត្រ។
អ្នកវិភាគនយោបាយ និងសង្គម បណ្ឌិត ឡៅ ម៉ុងហៃ ធ្លាប់បានលើកឡើងកាលពីពេលថ្មីៗនេះថា ក្នុងនាមជាអ្នកនយោបាយ ត្រូវគោរពក្រមសីលធម៌របស់ខ្លួនឲ្យបានខ្ជាប់ខ្លួនជានិច្ច និងចៀសវាងបំផុតនូវការប្រមាថព្រះមហាក្សត្រ ដែលត្រូវរក្សាគុណធម៌សម្រាប់ខ្លួនផង និងសង្គមជាតិផងដែរ នោះសង្គមជាតិដែលពួកគេដឹកនាំក្លាយទៅជាសង្គមដែលពោរពេញដោយគុណធម៌ ហើយក៏នឹងក្លាយជាសង្គមដែលមានភាពយុត្តិធម៌ពិតប្រាកដដែរ។
បណ្ឌិត ឡៅ ម៉ុងហៃ លើកឡើងថា អ្នកដឹកនាំនយោបាយទាំងនោះមានសិទ្ធិគ្រប់គ្រាន់ក្នុងការបញ្ចេញមតិយោបល់ តែសិទ្ធិនោះមិនត្រូវរំលោភលើព្រះរាជតួនាទី និងព្រះរាជកិច្ចរបស់ព្រះអង្គឡើយ ព្រោះថាក្នុងរដ្ឋធម្មនុញ្ញបានចែងយ៉ាងច្បាស់ពីតួនាទីរបស់ព្រះអង្គក្នុងការធានានូវអំណាចសាធារណៈ ដើម្បីសម្របសម្រួលជម្លោះអ្នកនយោបាយទាំងនោះក្នុងគោលដៅបញ្ចៀសនូវវិបត្តិដែលកើតមានដល់សង្គមជាតិទាំងមូលដូចសព្វថ្ងៃនេះ។
មាត្រា៧ នៃរដ្ឋធម្មនុញ្ញកម្ពុជាបានចែងច្បាស់ថា ព្រះមហាក្សត្រទ្រង់គ្រងរាជ្យសម្បត្តិ ប៉ុន្តែទ្រង់មិនកាន់អំណាចឡើយ ហើយទ្រង់នឹងគង់ជាប្រមុខរដ្ឋអស់មួយជីវិត ប៉ុន្តែអង្គព្រះមហាក្សត្រមិនអាចត្រូវបាននរណារំលោភបំពានបានឡើយ។
ព្រះអង្គគឺជានិមិត្តរូបនៃឯកភាពជាតិ និងនិរន្តរភាពជាតិ ធានាឯករាជ្យជាតិ អធិបតេយ្យ និងបូរណភាពទឹកដីនៃប្រទេសកម្ពុជា និងធានានូវការគោរពសិទ្ធិសេរីភាពរបស់ពលរដ្ឋ និងការគោរពសន្ធិសញ្ញាអន្តរជាតិនានាផងដែរ៕