មេដឹកនាំអាស៊ានយល់ព្រមគ្នាជាគោលការណ៍សម្រេចឱ្យទីម័រឡេស្តេ ចូលជាសមាជិកអាស៊ានទី១១ នាឱកាសកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធ។
បើតាមសេចក្តីថ្លែងការណ៍រួមរបស់មេដឹកនាំអាស៊ាន ក្រោយកិច្ចប្រជុំពិភាក្សាលើសំណើសុំចូលជាសមាជិកអាស៊ានរបស់ទីម័រឡេស្តេ នៅព្រឹកថ្ងៃទី១១ ខែវិច្ឆិកា នាសណ្ឋាគារសុខា នាឱកាសកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ដោយពិចារណាលើលទ្ធផលនៃបេសកកម្មស្វែងរកការពិតរបស់សសរស្ដម្ភសហគមន៍សន្តិសុខ-នយោបាយអាស៊ាន សហគមន៍សេដ្ឋកិច្ចអាស៊ាន និងសហគមន៍សង្គម-វប្បធម៌អាស៊ាន ក្នុងនោះប្រមុខដឹកនាំអាស៊ានបានឯកភាពគ្នាថា អនុញ្ញាតឱ្យទីម័រឡេស្តេ ចូលរួមជាសមាជិកអាស៊ានទី១១។
សេចក្តីថ្លែងការណ៍រួមរបស់មេដឹកនាំអាស៊ានបានបន្តទៀតថា ផ្ដល់ឋានៈជាប្រទេសសង្កេតការណ៍ដល់ទីម័រឡេស្តេ និងអនុញ្ញាតឱ្យទីម័រឡេស្តេ ចូលរួមក្នុងកិច្ចប្រជុំអាស៊ានទាំងអស់ រួមបញ្ចូលទាំងសម័យប្រជុំពេញអង្គនៃកិច្ចប្រជុំកំពូលអាស៊ាន។ បន្ថែមពីនេះ អាស៊ានក៏បង្កើតជាផែនទីបង្ហាញផ្លូវផ្អែកលើលក្ខណៈវិនិច្ឆ័យអព្យាក្រឹតសម្រាប់ការចូលជាសមាជិកពេញសិទ្ធិរបស់ទីម័រឡេស្តេ រួមទាំងផ្អែកលើសមិទ្ធផលសំខាន់នានាដែលកំណត់ដោយរបាយការណ៍នៃបេសកកម្មស្វែងរកការពិតនៃសសរស្ដម្ភទាំង៣ របស់អាស៊ាន និងបានប្រគល់ភារកិច្ចជូនក្រុមប្រឹក្សាសម្របសម្រួលអាស៊ានក្នុងការបង្កើតផែនទីបង្ហាញផ្លូវនេះ ហើយត្រូវដាក់ជូនថ្នាក់ដឹកនាំអាស៊ានទាំងអស់ឱ្យអនុម័តក្នុងឱកាសកិច្ចប្រជុំកំពូលអាស៊ានលើកទី៤២។
ប្រទេសសមាជិកអាស៊ានទាំងអស់ និងដៃគូខាងក្រៅ ត្រូវផ្តល់ការគាំទ្រដោយពេញលេញចំពោះទីម័រឡេស្តេ ក្នុងការឈានទៅសម្រេចបាននូវសមិទ្ធផលដែលបានកំណត់ទាំងនោះ តាមរយៈការកសាងសមត្ថភាព និងផ្តល់ការគាំទ្រចាំបាច់នានាផ្សេងទៀតសម្រាប់ការចូលជាសមាជិកអាស៊ានពេញសិទ្ធិរបស់ទីម័រឡេស្តេ។ នេះបើតាមសេចក្តីថ្លែងការណ៍រួមរបស់មេដឹកនាំអាស៊ាន។
សាស្ត្រាចារ្យផ្នែកវិទ្យាសាស្ត្រនយោបាយ លោក ឯម សុវណ្ណារ៉ា បានប្រាប់សារព័ត៌មានក្នុងស្រុកថា ការជ្រោមជ្រែងរបស់កម្ពុជាក្នុងការជំរុញឲ្យទីម័រឡេស្តេ ចូលជាសមាជិកអាស៊ាន គឺជាចំណុចសំខាន់។ លោកថា កម្ពុជាទទួលបានជោគជ័យ ព្រមទាំងទទួលបានការគាំទ្រលើឆាកអន្តរជាតិតាមការជួយជំរុញរបស់កម្ពុជា អំឡុងពេលធ្វើជាប្រធានអាស៊ាន។
ក្រោយទទួលបានឯករាជ្យពីឥណ្ឌូនេស៊ី នៅឆ្នាំ២០០២ ទីម័រឡេស្តេ ដែលមានឈ្មោះជាផ្លូវការថា សាធារណរដ្ឋប្រជាធិបតេយ្យទីម័រឡេស្តេ បានដាក់ពាក្យចូលជាសមាជិកសមាគមប្រជាជាតិអាស៊ីអាគ្នេយ៍ (អាស៊ាន) ជាផ្លូវការនៅថ្ងៃទី៤ ខែមីនា ឆ្នាំ២០១១៕