29 C
Phnom Penh

ក្រសួង​កសិកម្ម​ច្រាន​ចោល​ព័ត៌មាន​ដែល​ថា​ក្រសួង​មិន​ជួយ​ដោះស្រាយ​ការ​ធ្លាក់​ចុះ​តម្លៃ​ស្រូវ​កសិករ

ដោយ ឌឹ ខេមបូឌា ដេលី

បទវិភាគ

ក្រសួង​កសិកម្ម ច្រាន​ចោល​ការ​បង្ហោះ​ព័ត៌មាន​នៅ​លើ​បណ្ដាញ​សង្គម​មួយ​ចំនួន​ដែល​រិះគន់​ថា ក្រសួង​មិន​បាន​អើពើ​រក​ដំណោះស្រាយ​ជូន​កសិករ។ ក្រសួង​មួយ​នេះ​អំពាវនាវ​ឱ្យ​ពលរដ្ឋ​ក្នុង​បណ្ដាញ​សង្គម បញ្ឈប់​បង្ហោះ​ព័ត៌មាន​មិន​ពិត បង្ក​ការ​ព្រួយបារម្ភ​ដល់​កសិករ​ដែល​មិន​ទាន់​ប្រមូល​ផល ឱ្យ​ប្រញាប់​ប្រមូល​ស្រូវ​របស់​ពួកគេ​ទាំង​មិន​ទាន់​គ្រប់​គុណភាព​ដើម្បី​លក់ បណ្ដាល​ឱ្យ​តម្លៃ​ស្រូវ​ធ្លាក់​ចុះ​ថែម​ទៀត។

សេចក្តី​ប្រកាស​ព័ត៌មាន​របស់​ក្រសួង​កសិកម្ម រុក្ខាប្រមាញ់ និង​នេសាទ កាលពី​ថ្ងៃទី​១៥ ខែ​វិច្ឆិកា ឲ្យ​ដឹង​ថា ក្រសួង​បាន​ដឹង​រួច​ហើយ​អំពី​ការ​ធ្លាក់​ចុះ​នៃ​តម្លៃ​ស្រូវ​នៅ​ពេលនេះ ប៉ុន្តែ​ក្រសួង​ក៏​បាន​បញ្ជូន​ក្រុម​ការងារ​គោលដៅ​ចុះ​ទៅ​មូលដ្ឋាន​ខេត្ត​បាត់ដំបង និង​ខេត្ត​បន្ទាយមានជ័យ ដើម្បី​ពិនិត្យ​បញ្ហា​ជាក់ស្ដែង និង​រក​ដំណោះស្រាយ​ឱ្យ​បាន​សមស្រប​នៅ​នឹង​កន្លែង​ជូន​ប្រជាកសិករ ក្នុង​ពេល​ប្រមូល​ផល​ស្រូវ​នៅ​ពេលនេះ​ហើយ​ដែរ។

ក្រសួង​កសិកម្ម​អះអាង​ថា ពេញ​មួយ​ខែ​វិច្ឆិកា រហូត​ដល់​ពាក់កណ្តាល​ខែ​ធ្នូ គឺជា​ពេលវេលា​ប្រមូល​ផល​ស្រូវ​រដូវ​វស្សា ជាពិសេស​ប្រភេទ​ពូជស្រូវ​ផ្ការំដួល ដែល​ជា​ហេតុ​ធ្វើ​ឱ្យ​រោង​ម៉ាស៊ីន​កិន​ស្រូវ​កំពុង​កកស្ទះ និង​ជះ​ឥទ្ធិពល​ដល់​ថ្លៃ​ស្រូវ​ដូច​កាលពី​ឆ្នាំ​កន្លងទៅ​ដែរ។

ប្រភព​ដដែល​បញ្ជាក់​ថា នៅ​ពេលនេះ​រោង​ម៉ាស៊ីន​កិន​ស្រូវ​ជាច្រើន​នៅ​ក្នុង​ខេត្ត​បាត់ដំបង និង​ខេត្ត​បន្ទាយមានជ័យ កំពុង​មមាញឹក​ក្នុង​ការ​ប្រមូល​ទិញ​ស្រូវ​យក​ទៅ​សម្ងួត និង​កិន​បញ្ចេញ​ទៅ​ជា​អង្ករ​ទៅ​តាម​សមត្ថភាព និង​លទ្ធភាព​រៀងៗ​ខ្លួន​របស់​ពួកគេ ខណៈ​ក្រសួង​ក៏​បាន​ចាត់តាំង​ក្រុម​ការងារ​នៃ​អគ្គនាយកដ្ឋាន​កសិកម្ម ដើម្បី​ពិនិត្យ​ជាក់ស្តែង​នៅ​ក្នុង​មូលដ្ឋាន​នៃ​ខេត្ត​ទាំង​ពីរ​រួចរាល់​ហើយ​នៅ​ពេលនេះ។

កាលពី​ថ្ងៃទី​១២ ខែ​វិច្ឆិកា ឆ្នាំ​២០២២ គណនី​ហ្វេសប៊ុក​មួយ​ឈ្មោះ ញៀប ស្រីហ៊ុម (Sreyhom Nhieb) បាន​បង្ហោះ​វីដេអូ​ប្រជាកសិករ​ដែល​កំពុង​ប្រមូល​ផល​ស្រូវ​ប្រភេទ​ស្រូវ​ផ្ការំដួល ដែល​ស្ថិត​ក្នុង​ភូមិ​ប្រី ឃុំ​ទ្រាស ស្រុក​ស្វាយចេក ខេត្ត​បន្ទាយមានជ័យ ដោយ​រៀបរាប់​ថា អ្នក​ស្រែ​មិន​ដឹង​ជា​ទៅ​ពឹង​អ្នក​ណា​នោះ​ទេ ព្រោះ​ស្រូវ​ដែល​ពួកគាត់​ធ្វើ​បាន​មាន​តម្លៃ​ថោក ១​គីឡូ​ត្រឹមតែ ១​ពាន់​រៀល ប៉ុន្តែ​ពេលនេះ​ចុះ​មក​នៅ​ត្រឹមតែ ៧០០​រៀល​ទៅ ៨០០​រៀល​ថែម​ទៀត ដូច្នេះ​ពួកគាត់​នឹង​មិន​អាច​ចំណេញ​ពី​ការ​ធ្វើ​ស្រែ​បាន​ទេ ខណៈ​ជី​មួយ​ការុង​ក្នុង​ទម្ងន់ ៥០​គីឡូក្រាម​មាន​តម្លៃ​ដល់​ទៅ​ជាង ១០​ម៉ឺន​រៀល​ឯណោះ។

ទាក់ទិន​នឹង​បញ្ហា​នេះ អតីត​ប្រធាន​អង្គការ​សេដាក និង​ជា​ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន (GDP) បណ្ឌិត យ៉ង សាំងកុមារ បាន​ប្រាប់​សារព័ត៌មាន The Cambodia Daily នៅ​ថ្ងៃទី​១៦ វិច្ឆិកា នេះ​ថា តម្លៃ​ស្រូវ​ធ្លាក់​ចុះ​នៅ​រដូវ​ប្រមូល​ផល គឺជា​បញ្ហា​ដែល​កើតឡើង​ដដែលៗ​ជា​រៀង​រាល់​ឆ្នាំ ប៉ុន្តែ​រដ្ឋាភិបាល​នៅតែ​មិន​ទាន់​មាន​វិធានការ​ជាក់លាក់​ណា​មួយ​ក្នុង​ការ​ដោះស្រាយ​បញ្ហា​នេះ​នៅឡើយ ខណៈ​រដ្ឋមន្ត្រី​ដែល​ទើប​នឹង​កាន់​តំណែង​ថ្មី ក៏​នៅតែ​មិន​ទាន់​មាន​ដំណោះស្រាយ​ចំពោះ​បញ្ហា​នេះ​ដែរ។

បណ្ឌិត យ៉ង សាំងកុមារ លើកឡើង​ថា តម្លៃ​ស្រូវ ៧០០​រៀល ឬ ៨០០​រៀល​ក្នុង​មួយ​គីឡូក្រាម​មិន​អាច​ឱ្យ​កសិករ​ចំណេញ​បាន​ទេ ខណៈ​ថ្លៃ​ចំណាយ​លើ​ជី លើ​ថ្នាំ​សម្លាប់​សត្វល្អិត និង​លើ​ពូជស្រូវ ជាដើម នៅតែ​មាន​តម្លៃ​ខ្ពស់ ប៉ុន្តែ​កសិករ​នៅតែ​អាច​នឹង​បង្ខំ​ចិត្ត​លក់​ទាំង​ខាត ព្រោះ​កសិករ​ខ្លះ​ប្រញាប់​ប្រមូល​លុយ​សង​ថ្លៃ​ជី និង​ថ្នាំ ជាដើម ដែល​ពួកគាត់​ជំពាក់​ឈ្មួញ​កន្លងមក។

អតីត​ប្រធាន​អង្គការ​សេដាក​រូប​នេះ​បញ្ជាក់​ថា ដើម្បី​ជួយ​កសិករ​ឱ្យ​ចៀស​ផុត​ពី​បញ្ហា​នេះ រដ្ឋាភិបាល​ត្រូវ​ធានា​នូវ​ការ​កាត់បន្ថយ​ថ្លៃ​ចំណាយ​របស់​ពួកគាត់ និង​បង្កើត​ឱ្យ​មាន​សហគមន៍​កសិកម្ម​ដើម្បី​រៀបចំ​ឲ្យ​មាន​កន្លែង​សម្ងួត និង​ស្តុក​ស្រូវ​នៅ​គ្រប់​ឃុំ​ផលិត​ស្រូវ និង​ជួយ​ឲ្យ​សហគមន៍​មាន​ដើមទុន​សម្រាប់​កសិករ​ចំណាយ​ពេល​ច្រូត ដែល​ជា​មូលហេតុ​ជួយ​កសិករ​មិន​ឱ្យ​ពួកគាត់​បង្ខំ​ចិត្ត​លក់​ស្រូវ​ដំណាល​គ្នា​ជាមួយ​តម្លៃ​ចុះ​ថោក​ដូច​ដែល​កំពុង​កើតមាន​នៅ​ពេលនេះ។

ទាក់ទិន​នឹង​បញ្ហា​នេះ ប្រជាពលរដ្ឋ រួម​ទាំង​មជ្ឈដ្ឋាន​នានា​ក៏​កំពុង​រង់ចាំ​មើល​វិធានការ​របស់​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ លោក ឌិត ទីណា ដែល​ទើប​នឹង​កាន់​តំណែង​ថ្មី​ជំនួស​លោក វេង សាខុន ផង​ដែរ ថា​តើ​រដ្ឋមន្ត្រី​រូប​នេះ​អាច​ធ្វើ​ឱ្យ​វិស័យ​កសិកម្ម​មាន​ភាព​ប្រសើរ​ឡើង ឬ​អន់​ថយ​ជាង​ពេល​ដែល​លោក វេង សាខុន នៅ​ដឹកនាំ ខណៈ​បញ្ហា​កំពុងតែ​ចាប់ផ្តើម​កម្រើក​ឡើងវិញ​បណ្តើរៗ​ហើយ​នៅ​ពេលនេះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស