រដ្ឋមន្ត្រីក្រសួងកសិកម្ម លោក ឌិត ទីណា អះអាងថា ក្រោយពីសិក្សាតម្លៃស្រូវដែលធ្លាក់ចុះរួចរាល់ លោកបានដាក់ចេញនូវគោលការណ៍ដែលមានស្ថិរភាពមួយសម្រាប់តម្លៃស្រូវផ្ការំដួលកម្រិតលេខ១ ដោយកំណត់តម្លៃខ្ពស់បំផុតត្រឹម ៩បាត ដែលស្មើនឹង ១០៤០រៀលក្នុងមួយគីឡូក្រាមសម្រាប់ស្រូវនៅក្នុងខេត្តបាត់ដំបង និងខេត្តបន្ទាយមានជ័យ។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានសរសេរលើទំព័រហ្វេសប៊ុករបស់ខ្លួននៅថ្ងៃទី១៧ វិច្ឆិកា នេះថា គោលការណ៍ទិញស្រូវនៅខេត្តបន្ទាយមានជ័យ នឹងត្រូវអនុវត្តដូចគ្នាទៅនឹងខេត្តបាត់ដំបង ដែរ ដែលត្រូវកំណត់តម្លៃ ១០៤០រៀលក្នុងមួយគីឡូក្រាម។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទរូបនេះបញ្ជាក់ថា នៅថ្ងៃទី១៧ ខែវិច្ឆិកា នេះ អង្ករកម្ពុជាពូជ “ផ្ការំដួល” ទទួលបានជ័យលាភីលេខ១ សម្រាប់ឆ្នាំ២០២២ នេះជា “អង្ករល្អដាច់គេ” លំដាប់ថ្នាក់ពិភពលោកនៅក្នុងការប្រកួតប្រជែងនៃវេទិកាស្រូវអង្ករពិភពលោក នៅខេត្តភូកេត ប្រទេសថៃ ហើយនេះគឺជាលើកទី៥ ហើយដែលអង្ករកម្ពុជាបានទទួលជ័យលាភីនេះ និងនាំមកនូវមោទកភាពសម្រាប់កម្ពុជា។
ការអះអាងនេះ ធ្វើឡើងបន្ទាប់ពីពលរដ្ឋក្នុងខេត្តបាត់ដំបង និងខេត្តបន្ទាយមានជ័យ ត្អូញត្អែរពីតម្លៃស្រូវធ្លាក់ចុះអំឡុងពេលដែលពួកគាត់ប្រមូលផលស្រូវក្នុងរដូវវស្សានេះ។
កាលពីថ្ងៃទី១៦ ខែវិច្ឆិកា ឆ្នាំ២០២២ នេះ ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីប្រកាសព័ត៌មានថា ក្រសួងបានសហការជាមួយរដ្ឋបាលឃុំ ដើម្បីផ្សព្វផ្សាយពីតម្លៃស្រូវរួចហើយ គឺ ១០៤០រៀល បន្ទាប់ពីក្រសួងបានជួបប្រជុំពិភាក្សាជាមួយពលរដ្ឋ និងអ្នកពាក់ព័ន្ធរួចមក។
កាលពីថ្ងៃទី១២ ខែវិច្ឆិកា ឆ្នាំ២០២២ ពលរដ្ឋដែលរស់នៅភូមិប្រី ឃុំទ្រាស ស្រុកស្វាយចេក ខេត្តបន្ទាយមានជ័យ ដែលកំពុងប្រមូលផលស្រូវប្រភេទស្រូវផ្ការំដួល ត្អូញត្អែរថា ស្រូវដែលពួកគាត់ធ្វើបានមានតម្លៃថោកត្រឹមតែ ៧០០រៀលទៅ ៨០០រៀលប៉ុណ្ណោះ ដូច្នេះពួកគាត់នឹងមិនអាចចំណេញពីការធ្វើស្រែបានឡើយ។
នៅថ្ងៃទី១៧ ខែវិច្ឆិកា ឆ្នាំ២០២២ នេះ អភិបាលខេត្តបន្ទាយមានជ័យ លោក អ៊ុំ រាត្រី អះអាងថា ស្រូវដែលកសិករកំពុងប្រមូលផលនៅពេលនេះមានប្រមាណ ១០ម៉ឺនហិកតារ ប៉ុន្តែពេលនេះកសិករបានប្រមូលផលអស់ប្រមាណ ២ម៉ឺនហិកតារហើយ ខណៈ ៧-៨ម៉ឺនហិកតារទៀតកំពុងចុះច្រូតជាបន្តបន្ទាប់។
អតីតប្រធានអង្គការសេដាក និងជាប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន (GDP) បណ្ឌិត យ៉ង សាំងកុមារ បានប្រាប់សារព័ត៌មាន The Cambodia Daily នៅថ្ងៃទី១៧ វិច្ឆិកា នេះថា តាមរយៈសេចក្តីប្រកាសព័ត៌មានរបស់ក្រសួងកសិកម្ម ចំពោះការធានាតម្លៃស្រូវរបស់ពលរដ្ឋនៅពេលនេះ បង្ហាញថា រដ្ឋាភិបាលមិនមានគោលនយោបាយ និងវិធានការជាក់លាក់ក្នុងការជួយដោះស្រាយបញ្ហាទីផ្សារ និងតម្លៃស្រូវក្រៅពីការកំណត់តម្លៃអប្បបរមា ១០៤០រៀលក្នុងមួយគីឡូក្រាម ដើម្បីដោះទាល់នៅពេលនេះទេ។
បណ្ឌិត យ៉ង សាំងកុមារ លើកឡើងថា អ្វីដែលសំខាន់បំផុតនៅពេលនេះ គឺរដ្ឋាភិបាលគួរតែទម្លាក់ទុនដល់រោងម៉ាស៊ីនកិនស្រូវឯកជន និងសហគមន៍នានា ដើម្បីធ្វើការទិញស្រូវស្តុកទុក ហើយរដ្ឋាភិបាលក៏ត្រូវតែទិញស្រូវស្តុកទុកដែរ ដែលជាផ្នែកមួយនៃការចូលរួមរក្សាស្ថិរភាពតម្លៃស្រូវ និងធានានូវការស្តុកស្រូវសម្រាប់សន្តិសុខស្បៀងរបស់ជាតិទាំងមូលថែមទៀត។
មន្ត្រីជាន់ខ្ពស់គណបក្សក្រៅរដ្ឋាភិបាលរូបនេះបញ្ជាក់ថា ចំពោះដំណោះស្រាយវែងឆ្ងាយ រដ្ឋាភិបាលត្រូវតែកសាងនូវសង្វាក់ផលិតកម្មស្រូវអង្ករឱ្យបានច្រើនតាមតម្រូវការរបស់ពលរដ្ឋ ដើម្បីជាផលប្រយោជន៍របស់កសិករផង និងជាផលប្រយោជន៍របស់ភាគីពាក់ព័ន្ធផង ព្រមទាំងដើម្បីសេដ្ឋកិច្ចជាតិទាំងមូលថែមទៀត។
កាលពីខែតុលា រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុន្នីរ័ត្ន អះអាងថា វិស័យកសិកម្មនៅកម្ពុជាកំពុងប្រឈមនឹងបញ្ហាមួយចំនួនដែលធ្វើឲ្យផលិតភាពក្នុងការផលិតក្នុងវិស័យនេះ នៅមានកម្រិតទាប ត្បិតប្រព័ន្ធហេដ្ឋារចនាសម្ព័ន្ធសម្រាប់គាំទ្រដល់ការនាំចេញនូវផលិតផលកសិកម្មនៅមានភាពទន់ខ្សោយ ដែលមិនអាចឆ្លើយតបនឹងលក្ខខណ្ឌតម្រូវក្នុងការបញ្ជាទិញរបស់បរទេសបាន។
ក្រុមអ្នកឃ្លាំមើលសង្គម លើកឡើងថា ទីផ្សារកសិកម្មរបស់កម្ពុជាបច្ចុប្បន្ននេះត្រូវប្រទេសវៀតណាម គ្រប់គ្រងទាំងស្រុង ក្នុងនោះផលិតផលកសិកម្មដែលកសិករផលិតបាន ដូចជាដំណាំស្រូវ ដំឡូងមី ស្វាយចន្ទី និងជ័រកៅស៊ូ ជាដើម ត្រូវពឹងផ្អែកលើទីផ្សារវៀតណាមគ្រប់ពេលទាំងអស់ ជាពិសេសតម្លៃនៃកសិផលខ្មែរទាំងនោះត្រូវឈ្មួញវៀតណាម កំណត់ស្រេចតែនឹងចិត្តរហូតមក។
យ៉ាងណាក៏ដោយ កាលពីថ្ងៃទី២៤ ខែវិច្ឆិកា ឆ្នាំ២០២១ មេដឹកនាំបក្សកាន់អំណាច លោក ហ៊ុន សែន បានជំរុញឱ្យប្រទេសវៀតណាម រៀបចំកិច្ចព្រមព្រៀងជាមួយកម្ពុជាលើវិស័យកសិកម្មឱ្យកាន់តែច្រើនឡើងបន្ថែមទៀតរវាងប្រទេសទាំងពីរ ដើម្បីឱ្យវិស័យនេះកាន់តែរីកធំធាត់ជាងពេលបច្ចុប្បន្ននេះ៕