មន្ត្រីការពារសិទ្ធិមនុស្សអាដហុក អះអាងថា តុលាការកំពូលមិនមានឆន្ទៈក្នុងការផ្ដល់យុត្តិធម៌ដល់អ្នកការពារសិទ្ធិមនុស្ស ក្រោយពីតុលាការមួយនេះបដិសេធទម្លាក់បទចោទប្រកាន់លើពួកគាត់ទាំង ៥រូប ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី» ដែលតុលាការថ្នាក់ក្រោមសម្រេចផ្ដន្ទាទោសឱ្យពួកគាត់ជាប់ពន្ធនាគារម្នាក់ៗ ៥ឆ្នាំទុកជាបានការដដែល។
ប្រធានក្រុមប្រឹក្សាជំនុំជម្រះតុលាការកំពូល លោក និល ណុន បានប្រកាសសាលដីកាបណ្ដឹងសាទុក្ខមន្ត្រី និងអតីតមន្ត្រីការពារសិទ្ធិមនុស្ស ៥រូបនៅថ្ងៃសុក្រ ទី១៨ វិច្ឆិកា នេះ បន្ទាប់ពីបើកសវនាការកាលពីថ្ងៃទី៤ ខែវិច្ឆិកា ឆ្នាំ២០២២។
ការប្រកាសសាលដីកានៅថ្ងៃនេះ លោក និល ណុន បានសម្រេចបដិសេធទម្លាក់បទចោទប្រកាន់លើមន្ត្រី និងអតីតមន្ត្រីការពារសិទ្ធិមនុស្ស ៥រូបដូចការសម្រេចរបស់សាលាឧទ្ធរណ៍រាជធានីភ្នំពេញដែរ។
ប្រាប់អ្នកក្រុមអ្នកសារព័ត៌មាននៅខាងមុខតុលាការកំពូល បន្ទាប់ពីស្ដាប់ការប្រកាសសាលដីកាមន្ត្រីការពារសិទ្ធិមនុស្ស លោក យី សុខសាន្ត បានបង្ហាញការសោកស្ដាយដែលតុលាការកំពូលមិនទម្លាក់ចោលបទចោទប្រកាន់លើពួកគាត់ទាំង ៥រូប។ លោកបន្តថា ការមិនទម្លាក់នេះ បង្ហាញឲ្យឃើញថា តុលាការកំពូលមិនមានឆន្ទៈក្នុងការផ្ដល់យុត្តិធម៌ដល់ពួកគាត់ដែលជាអ្នកការពារសិទ្ធិមនុស្ស។
ចំណែកអ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ចាត់ទុកការសម្រេចរបស់តុលាការជាន់ខ្ពស់ថាជារឿងអយុត្តិធម៌ និងឆ្លុះបញ្ចាំងឲ្យឃើញថា អ្នកការពារសិទ្ធិមនុស្សនៅតែរងការធ្វើទុក្ខបុកម្នេញ និងបំបាក់ស្មារតីអ្នកធ្វើការងារសង្គម ដើម្បីបម្រើផលប្រយោជន៍ពលរដ្ឋក្នុងការពង្រឹងវិស័យសិទ្ធិមនុស្សនៅកម្ពុជា។
លោកបន្តថា ការតម្កល់នេះវាក៏បង្ហាញឲ្យឃើញដែរថា តុលាការនៅកម្ពុជាមានរហូតដល់ ៣ថ្នាក់ក៏ពិតមែន ប៉ុន្តែនៅមិនអាចរកយុត្តិធម៌ឲ្យអ្នកការពារសិទ្ធិមនុស្សបាន ទោះបីជាមន្ត្រីសិទ្ធិមនុស្សមានភស្តុតាងបញ្ជាក់ច្បាស់លាស់ក៏ដោយ។
ចំណែកជនដែលចោទប្រកាន់មកលើមន្ត្រីសិទ្ធិមនុស្សទាំង ៥រូបមានតែលិខិត ៤សន្លឹក ហើយមិនដែលចូលខ្លួនបំភ្លឺនៅតុលាការទាល់តែសោះ តែបែរជាតុលាការយករឿងនេះមកពិចារណា និងចោទប្រកាន់លើអ្នកការពារសិទ្ធិមនុស្សទៅវិញ។
លោក ស៊ឹង សែនករុណា ចាត់ទុកការបដិសេធនេះមិនបានចំណេញអ្វីនោះឡើយ ប៉ុន្តែផ្ទុយទៅវិញ វាបង្ហាញពីភាពអាម៉ាស់នៃប្រព័ន្ធយុត្តិធម៌ និងធ្វើឲ្យសហគមន៍ជាតិ និងអន្តរជាតិបាត់បង់ជំនឿបន្ថែមទៀត។
អ្នកនាំពាក្យសមាគមការពារសិទ្ធិមនុស្សអាដហុក បញ្ជាក់ថា ទោះបីជាតុលាការកំពូលមិនព្រមទម្លាក់ចោលបទចោទប្រកាន់លើមន្ត្រីទាំង ៥រូប ហើយសាលក្រមសំណុំរឿងនេះនឹងត្រូវចូលជាស្ថាពរក្ដី ប៉ុន្តែពួកគាត់នៅតែមិនបោះបង់បេសកកម្ម និងការងារការពារសិទ្ធិមនុស្ស ដើម្បីជួយដល់សង្គមជាតិ និងអ្នករងគ្រោះឡើយ។
បើតាមអង្គការគម្រោងយុត្តិធម៌ពិភពលោក (World Justice Project) បានចេញផ្សាយរបាយការណ៍មួយកាលពីថ្ងៃទី២៦ ខែតុលា ឆ្នាំ២០២២ បានដាក់ចំណាត់ថ្នាក់កម្ពុជានៅជិតបាតតារាង ដោយស្ថិតនៅលេខរៀង១៣៩ ក្នុងចំណោមប្រទេស១៤០ លើពិភពលោក ដែលបានធ្វើការវាយតម្លៃ។
របាយការណ៍ដដែលបន្តថា មូលហេតុចម្បងដែលទាញទម្លាក់នីតិរដ្ឋនៅកម្ពុជាឲ្យធ្លាក់ចុះដល់បាតតារាងនេះ ដោយសារតែអំណាចនយោបាយជ្រៀតជ្រែកស្ថាប័នរដ្ឋសភា និងតុលាការ ដែលជាសសរស្ដម្ភកំពូលរបស់ជាតិនោះ បានបាត់បង់ប្រព័ន្ធត្រួតពិនិត្យអំណាចតាមបែបប្រជាធិបតេយ្យ មានកម្សោយលើការទប់ស្កាត់អំពើពុករលួយ និងការរំលោភសិទ្ធិមនុស្ស រួមទាំងអយុត្តិធម៌សង្គម ជាដើម។
បុគ្គលិក និងអតីតបុគ្គលិកសមាគមការពារសិទ្ធិមនុស្សអាដហុក ៥រូបនោះរួមមាន លោក នី សុខា លោក យី សុខសាន្ត និងលោកស្រី លឹម មុន្នី និងអតីតមន្ត្រីអាដហុកចំនួន ២រូបទៀត គឺលោក ណៃ វ៉ង់ដា និងលោក នី ចរិយា។
ពួកគាត់ទាំង ៥រូបត្រូវបានសាលាដំបូងរាជធានីភ្នំពេញកាត់ទោសឱ្យជាប់ពន្ធនាគារម្នាក់ៗចំនួន ៥ឆ្នាំ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី» ប៉ុន្តែតុលាការសម្រេចឲ្យអនុវត្តទោសក្នុងពន្ធនាគាររយៈពេល ១៤ខែ ហើយទោសដែលនៅសល់ត្រូវព្យួរ។
ពួកគាត់ទាំង ៥នាក់ត្រូវបានសមត្ថកិច្ចចាប់ខ្លួនកាលពីខែមេសា ឆ្នាំ២០១៦ ដោយរងការចោទថាបានផ្ដល់ប្រាក់ជាង ២០០ដុល្លារទៅឲ្យអ្នកនាង ខុម ចាន់តារាទី ហៅស្រីមុំ ក្នុងនាមជនរងគ្រោះដែលរត់មករកអាដហុកឲ្យជួយពេលនោះ៕